ဖာပွန်ခရိုင်ရှိ စစ်ကောင်စီတပ် တပ်စခန်း ၃ ခုထက်မနည်းကို KNU တပ်မဟာ(၅) တိုက်ခိုက်

▪︎ညာတခိုကျိုးတပ်စခန်းအပါအဝင်စခန်းအချို့ကိုသိမ်းပိုက်

ကရင်အမျိုးသားအစည်းအရုံး(KNU)တပ်မဟာ(၅)နယ်မြေ ဖာပွန်ခရိုင်ရှိ စစ်ကောင်စီ တပ်စခန်း ၃ ခုထက်မနည်းကို ယနေ့ (ဒီဇင်ဘာ ၆ရက်)တွင် စခန်းသိမ်းတိုက်ခိုက်ခဲ့ရာ ညာတခိုကျိုး စစ်ကောင်စီတပ်စခန်း အပါအဝင် တပ်စခန်းအချို့သိမ်းပိုက်ရရှိခဲ့ကြောင်း KNUသတင်းရင်းမြစ်ကပြောသည်။

ယနေ့မနက်တွင်ညာတခိုကျိုးတပ်စခန်း၊ လယ်တိုးတပ်စခန်း အပါအဝင် စစ်ကောင်စီတပ်စခန်းသုံးခုထက်မနည်းကို တိုက်ခိုက်ခဲ့ခြင်းဖြစ်သည်။

ညာတခိုကျိုးတပ်စခန်း သိမ်းတိုက်ပွဲတွင်စစ်ကောင်စီတပ်မှ သေဆုံးထိခိုက်မှုများပြီး KNU ရဲဘော်နှစ်ဦးကျဆုံးခဲ့သည်ဟုKNU သတင်းရင်းမြစ်က​ပြောသည်။

“သူတို့ ဘက်က ၆ယောက်လောက်သေတယ်။ထိခိုက်တာက သူတို့ ပြေးတာဆိုတော့ အတိအကျမသိဘူး။ တက်သိမ်းတာ သွေးတွေဘာတွေတွေ့တာပဲ။ လက်နက်ခဲယမ်းရတယ်။ ကျနော်တို့ဆီမှာရဲဘော် ၂ဦးကျသွားတယ်။” ဟု KNU သတင်းရင်းမြစ်က ပြောသည်။

Public Service Announcement

သိမ်းဆည်းရရှိသည့် လက်နက်များအနက် ၆၀ မမ လက်နက်ကြီး ပါဝင်ကြောင်း ၎င်းကဆက်​ပြောသည်။

အဆိုပါ ညာတခိုကျိုး စစ်ကောင်စီတပ်စခန်းသည် အရေးပါတဲ့စခန်းတစ်ခုဖြစ်ပြီး စခန်းသိမ်းပြီး​နောက် စစ်ကောင်စီတပ်က လေကြောင်း ပစ်ကူပေး တိုက်ခိုက်မှုရှိခဲ့ကြောင်း KNU သတင်းရင်းမြစ်က ပြောသည်။

ထိုအပြင်သံလွင်မြစ်ကမ်းတွင်စစ်​တပ်၏ သက်တမ်းအရှည်ဆုံးစခန်းတစ်ခုဖြစ်​သော သီးရိုထာစခန်းကိုလည်းတိုက်ခိုက်သိမ်းပိုက်ရာ စစ်​ကောင်စီတပ် ​သေဆုံးထိ့ခိုက်မှုများပြီး စခန်းကိုသိမ်းဆည်းနိုင်ခဲ့​ကြောင်း ​ဒေသတွင်းသတင်းဌာနဖြစ်​သော Salween Press ကလည်း​ဖော်ပြသည်။

သို့​သော်လယ်တိုးစခန်းနှင့်အခြားစခန်းသိမ်းတိုက်ပွဲအ​ခြေအ​​နေကိုမူ အ​သေးစိပ်မသိရ​သေး​ပေ။

ယခင်က KNU တပ်မဟာ(၅)အနေဖြင့် စစ်ကောင်စီတပ်စခန်းများကို ပြောက်ကျားတိုက်ခိုက်ခိုက်နေရာမှ ယနေ့တွင် စခန်းသိမ်းတိုက်ပွဲ ဆင်နွှဲလာခြင်းဖြစ်သည်။

“အရှိန်မြှင့်တာပေါ့။ကိုယ်နယ်မြေကိုယ်ပြန်ထိန်းဖို့ တစ်ဖက်တစ်လမ်းက တိုက်ပွဲအရှိန်မြှင့်လာမှာပဲ။ ပြည်တွင်းမှာလည်းမြင့်လာသလို ကိုယ့်နယ်မြေမှာလည်းကိုယ်ထိန်းသိမ်းဖို့ ပြန်လည်ထိန်းသိမ်းတာပေါ့” ဟု KNU သတင်းရင်းမြစ်က ပြောသည်။

စစ်ကောင်စီတပ်ကို ဖြုတ်ချနိုင်ရန် နိုင်ငံရေးအရ စစ်ရေးအရ သံတမန်ရေးအရ တပြိုင်တည်းအရှိန်မြှင့်ရမည်ဟု KNU သတင်းရင်းမြစ်က​ပြောသည်။ ပြည်တွင်းရှိ ပြည်သူ

လူထုများကလည်း သူ့နည်းသူ့ဟန်နှင့်လုပ်ဆောင်နေကြကြောင်း KNU သတင်းရင်းမြစ်က ဆက်ပြောသည်။

KNU တပ်မဟာ(၅)နယ်မြေတွင် နိုဝင်ဘာလအတွင်းကလည်း တိုက်ပွဲ ၁၁၆ကြိမ်ဖြစ်ပွားခဲ့ပြီး စစ်ကောင်စီတပ်မှ သေဆုံးထိခိုက်မှုများခဲ့သည်။