ကချင်ပြည်နယ် ဖားကန့်မြို့နယ် မဒဲယာန်(မှော်ဘုံ)ကျေးရွာရှိ ဘုန်းကြီးကျောင်း၌တပ်စွဲထားသည့် စစ်ကောင်စီတပ်ကို တိုက်ခိုက်ခဲ့ရာ လက်နက်ခဲယမ်းအချို့ရရှိခဲ့သည်ဟု ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက အသိပေးသည်။
KIA တပ်မဟာ(၉) တပ်ရင်း(၆)နယ်မြေ မဒဲယန်တွင် ဒီဇင်ဘာ ၆ရက် ညနေ ၄နာရီ ကစပြီး စစ်ကောင်စီတပ်နှင့် KIA ပူးပေါင်းတပ်တို့ တိုက်ပွဲဖြစ်ပွားခဲ့သည်။
မဒန်ယန်ကျေးရွာရှိ ဘုန်းကြီးကျောင်း၌ တပ်စွဲထားသည့် စစ်ကောင်စီတပ် အင်အား ၄၀ခန့်ရှိသည့် တပ်ဖွဲ့ကို KIAနှင့် KPDF ပူးပေါင်းတပ်မှ ထိုးစစ်ဆင် တိုက်ခိုက်ရာမှ တိုက်ပွဲဖြစ်ပွားခဲ့ခြင်းဖြစ်ပြီး ၇နာရီခွဲတွင် နှစ်ဖက်မှလက်နက်ကြီးများဖြင့် အပြန်အလှန် ပစ်ခတ်တိုက်ခိုက်ခဲ့ကြောင်း ဖော်ပြသည်။
ည၈နာရီခန့်မှ စ၍ ဖားကန့် တပ်မကုန်းမှ တိုက်ပွဲဖြစ်ပွားရာနေရာသို့ ၁၂၀ မမ လက်နက်ကြီး ၃ကြိမ်ထက်မနည်း ပစ်ခတ်သကဲ့သို့ စစ်ကောင်စီ ခလရ (၇၆) တပ်မှ ၆၀ မမ ၄ကြိမ်ထက်မနည်းပစ်ခတ်ခဲ့ကြောင်း၊ ယင်းလက်နက်ကြီး ပစ်ခတ်မှုကြောင့် စားသောက်ဆိုင်နှင့် ကား ၂စီး ထိခိုက်ခဲ့ကြောင်း KIA သတင်းပြန်ကြားရေး ဌာန သတင်းဖော်ပြချက်၌ ပါရှိသည်။
Public Service Announcement
မဒန်ယန်၌ ရှိနေသည့် စစ်ကောင်စီတပ်ကို KIAက ဒီဇင်ဘာ ၇ရက် မနက်ပိုင်း၌ နောက်တစ်ကြိမ် ထပ်မံ တိုက်ခိုက်ခဲ့ရာ စစ်ကောင်စီတပ်ဖွဲ့များ၏ စစ်အသုံးအဆောင် လက်နက်အချို့ကို KIA တပ်မှ သိမ်းဆည်းရယူနိုင်ခဲ့သည်ဟု ဖော်ပြသည်။ တိုက်ပွဲ၌ နှစ်ဖက်ထိခိုက်ကျဆုံးအခြေအနေကို သတင်း၌ ဖော်ပြထားခြင်းမရှိပေ။ KIA ကတိုက်ပွဲသတင်းများထုတ်ပြန်ရာတွင် ရန်သူသေဆုံး၊ထိခိုက်မှုအခြေအနေများကို ဖော်ပြလေ့မရှိပေ။
သို့သော်ဒေသခံအချို့ နှင့် ဒေသတွင်းသတင်းဌာနများကစစ်ကောင်စီတပ် ဆယ်နှင့်ချီ၍ သေဆုံးခဲ့ပြီး အထိနာခဲ့ကြောင်း ပြောကြား၊ဖော်ပြသည်။
ဖားကန့်မြို့ အပါအဝင် ဖားကန့်မြို့နယ်အတွင်း၌ ယခု ဒီဇင်ဘာလအတွင်း စစ်ကောင်ဏီတပ်ကို KIAက တိုက်ခိုက်မှုများ ဆက်တိုက်လုပ်ဆောင်လျက်ရှိသည်။
