မြောင်မြို့နယ်တွင် ယမန်နေ့က တိုက်ပွဲ၌ စစ်ကောင်စီတပ်မှလေးဦးထက်မနည်းသေဆုံးခဲ့ကြောင်းမြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့ CDSOMတာဝန်ခံ ကိုနွေဦးကပြောသည်။
ယမန်နေ့(ဒီဇင်ဘာလ ၁၀ရက်)နံနက်ကမြောင်မြို့ ဆင်ခေါင်းတောင်အရှေ့ဘက် တောင်ကြောသို့ရောက်လာသော စစ်ကောင်စီတပ်စစ်ကြောင်းကို ပြည်သူ့ကာကွယ်ရေးမဟာမိတ်များက တိုက်ခိုက်ခဲ့ခြင်းဖြစ်သည်။ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၏စစ်ကိုင်းခရိုင် တပ်ရင်း (၆)တပ်ခွဲ(၃)နှင့် CDSOM ပါဝင်သော မဟာမိတ်များက ပူးပေါင်းမိုင်းခွဲတိုက်ခိုက်ခဲ့ခြင်းဖြစ်သည်။
“ကျွန်တော်တို့ကတိုက်ခိုက်တော့ဖွားစောရွာထဲဝင်သွားပြီး ပျောက်သွားတာ။သူတို့ဖက်က၄ယောက်သေတာနဲ့၆ယောက်ဒဏ်ရာရတာကို ညနေကျမှ အတည်ပြုနိုင်ပါတယ်။ အခုထိလည်း ဖွားစောရွာထဲမှာ ရှိနေသေးတယ် “ဟုCDSOMတာဝန်ခံ ကိုနွေဦးက ပြောသည်။
အဆိုပါစစ်ကောင်စီတပိစစ်ကြောင်းကြောင့် ကျေးရွာ ၄ ရွာမှ ဒေသခံများ ထွက်ပြေးတိမ်းရှောင်နေကြရသည်ဟု လည်းသိရသည်။စစ်ဘေးရှောင်ပြည်သူများကိုNUG၏အမျိုးသမီး၊လူငယ် နှင့်ကလေးသူငယ်ရေးရာဝန်ကြီးဌာနက လှူဒါန်းသောစားနပ်ရိက္ခာများကိုသွားရောက်ပေးဝေခဲ့ကြောင်း၎င်းကဆက်ပြောသည်။
Public Service Announcement
“မနေ့ကတော့ NUGရဲ့အမျိုးသမီးနဲ့ကလေးသူငယ်ရေးရာဝန်ကြီးဌာနက လှုုတာတွေကို စစ်ဘေးရှောင်တွေရောက်နေတဲ့တောထဲအထိ လိုက်ဝေခဲ့တယ်။ သူတို့( ဝန်ကြီးဌာန)က စစ်ဘေးရှောင်သတင်းကို နားစွင့်နေပုံရတယ်။ ချက်ချင်းလာကူညီထောက်ပံတယ်”ဟု ကိုနွေဦးကပြောသည်။
မြောင်မြို့နယ်တွင် ဒီဇင်ဘာလ ၆ ရက်ကလည်း ရွှေဘုံသာရွာကို မီးလာရှို့သည့် စစ်ကောင်စီတပ် တိုက်ခိုက်ခံရပြီး လေးဦးသေဆုံးခဲ့သည်။
