ချင်းပြည်နယ် ထန်တလန်မြို့ရှိ စစ်ကောင်စီတပ်မှ စစ်သားနှစ်ဦးလက်နက်နှင့်အတူ ချင်းတပ်ဖွဲ့များဖြစ်သည့် ချင်းအမျိုးသားတပ်မတော်(CNA)နှင့် ချင်းကာကွယ်ရေးတပ်(CDF)ထံသို့ ခိုလှုံလာကြောင်း The Chin Journalက ဖော်ပြသည်။
ဒီဇင်ဘာ ၂၄ရက် ညပိုင်းတွင် လက်နက်နှစ်လက် နှင့်အတူ ထွက်ပြေးခိုလှုံလာခြင်းဖြစ်ကြောင်း မြေပြင် သတင်းရင်းမြစ်ကို ကိုးကားဖော်ပြထားခြင်းဖြစ်သည်။
“ထန်တလန်မြို့တွင်း CDFနဲ့ CNAတပ်ဖွဲ့ဝင်များ အခြေချတဲ့ နေရာကို ထွက်ပြေးလာကြတာပါ။သေနတ် နှစ်လက်နဲ့ ကျည်ဆံတွေ ပါလာကြတယ်”ဟု မြေပြင်သတင်းရင်းမြစ်က ပြောကြားကြောင်း ဖော်ပြထားကာ ထွက်ပြေးလာသူများကို လုံခြုံသည့်နေရာသို့ ပို့ဆောင်ထားသည်ဟု ဆိုသည်။
အဆိုပါဖြစ်စဉ်နှင့်ပတ်သက်ပြီး CNAပြောရေးဆို ခွင့်ရှိသူ ဆလိုင်းထက်နီထံသို့ ယနေ့နံနက် ဆက်သွယ် မေးမြန်းရာ ဖြစ်စဉ်နှင့်ပတ်သက်သည့် အသေးစိတ်အချက်အလက်များ မရသေးဟု ဖြေကြားသည်။
Public Service Announcement
ချင်းပြည်နယ်အခြေစိုက် စစ်ကောင်စီတပ်ဖွဲ့ဝင်များ ယခုလပိုင်းအတွင်း စစ်ကောင်စီတပ်မှ ထွက်ပြေးကာ ဒေသခံချင်းတပ်ဖွဲ့များထံ အလင်းဝင်လာသည့် ဖြစ်စဉ်များ ဆက်တိုက်ဖြစ်ပွားလျက်ရှိသည်။
တီးတိန်၊ ဟားခါး၊ ထန်တလန်၊ ပလက်၀နှင့် မင်းတပ် စသည့်ဒေသရှိ ချင်းတပ်ဖွဲ့များထံသို့ သက်ဆိုင်ရာဒေသရှိ စစ်သားနှင့် ရဲများခိုလှုံလာခြင်းဖြစ်ပြီး လက်နက်ပါသူများ ရှိသကဲ့သို့ လက်နက်မဲ့ အလင်းဝင် လာသူများလည်းရှိသည်။
