မကွေးတိုင်း၊ ပေါက်မြို့နယ်တွင် စစ်အုပ်စုနှင့်ပျူစခန်းအား ဝင်ရောက်တိုက်ခိုက်ခဲ့ရာ ထိခိုက်သေဆုံးမှုရှိကြောင်း မြိုင်မြို့နယ်ပြည်သူ့ကာကွယ်ရေးအဖွဲ့ခေါင်းဆောင် ကိုလယျာ်က ပြောကြားသည်။
ဒီဇင်ဘာ ၃၁ ရက် မွန်းလွဲ ၁နာရီခန့်က ပေါက်မြို့နယ်၊ ကုက္ကိုစုကျေးရွာ၊ ပျူစောထီးစခန်းသို့ လက်နက်ကြီး၊ လက်နက်ငယ်တို့ဖြင့် ဝင်ရောက်တိုက်ခိုက်ခဲ့ခြင်းဖြစ်သည်။
အပြန်အလှန်ပစ်ခတ်ချိန် ၁နာရီခန့်ကြာမြင့်ခဲ့ပြီး PDFရဲဘော်များဘက်က ပစ်အားအသာစီးရခဲ့သော်လည်း ရေပြာရဲစခန်းမှ တပ်ကူများ တက်လာသောကြောင့် ပြန်ဆုတ်ခဲ့ကြောင်း မြိုင်(ပကဖ)အဖွဲ့ခေါင်းဆောင် ကိုလယျာ်က ပြောသည်။
“စကစ တပ်သားတစ်ဦး ပျူ နှစ်ဦးသေတယ်။ ခြောက်ဦးဒဏ်ရာရတယ်လို့ ကြားပါတယ်။”ဟု အထက်ပါတာဝန်ရှိသူက ပြောသည်။
အဆိုပါ စစ်ဆင်ရေးကို မြိုင်မြို့နယ်ပြည်သူ့ကာကွယ်ရေးတပ်ဖွဲ့ ၊ တပ်ရင်း (၁) ၊ တပ်ခွဲ (၁) ၊ တပ်ခွဲ – ၄ ( စင်္ကြာဒေသကာကွယ်ရေးတပ်ဖွဲ့ )၊ တပ်ရင်း ၇၀၃ (အနောက်ပိုင်းတိုင်း)၊ မုန်တိုင်းတပ်ဖွဲ့ ၊ ဘီးလုံးငှက်ပြောက်ကျားတပ်ဖွဲ့ ၊ ကိုအောင်ကြီးဦးဆောင်သော RGFတပ်ဖွဲ့ ၊ မြေပြန့်ဒေသကာကွယ်ရေးတပ်ဖွဲ့(MRDF) ၊ ဘာမထီလက်နက်ကြီးပြောက်ကျားတပ်ဖွဲ့ တို့ပူးပေါင်းတိုက်ခိုက်ခဲ့ကြောင်း အသိပေးထားသည်။
ပေါက်မြို့နယ်တွင် စစ်ကောင်စီတပ်က စစ်ကြောင်းထိုးမီးရှို့ဖျက်ဆီးမှုများ ပြုလုပ်နေပြီး ဒီဇင်ဘါလ ၃၁ ရက်နေ့ကပင် ပေါက်မြို့နယ်အရှေ့မြောက်ပိုင်း ဆူးလေကုန်းကျေးရွာရှိ အသက် ၃၅ နှစ်အရွယ် အမျိုးသားတစ်ဦးကို စစ်ကောင်စီတပ်က ပစ်ခတ်သတ်ဖြတ်သွားခဲ့သည်။