စစ်ကောင်စီရွေးကောက်ပွဲအတွက် လူဦးရေစာရင်းလိုက်လံကောက်ယူပေးနေတဲ့ စစ်ကောင်စီလက်အောက်ခံအဖွဲ့တွေကို အကြမ်ဖက်မှုတိုက်ဖျက်ရေးဥပဒေနဲ့ ပြင်းပြင်းထန်ထန် တရားစွဲအရေးယူမယ်လို့ NUG အစိုးရရဲ့ ပြည်ထဲရေးဝန်ကြီးဌာနက ထုတ်ပြန်သတိပေးလိုက်ပါတယ်။
မြေပြင်လူဦးရေစာရင်းကောက်ယူနိုင်ဖို့အတွက်ပါဝင် ဆောင်ရွက်နေတဲ့ စစ်ကောင်စီရဲ့အုပ်ချုပ်ရေးအဖွဲ့တွေ ၊ လဝကနဲ့ စစ်ကောင်စီဒေါက်တိုင်တွေကို အရေးယူမယ်လို့ NUG ပြည်ထဲရေးဝန်ကြီးဌာနရဲ့ မနေ့က ရက်စွဲနဲ့ထုတ်ပြန်တဲ့ ကြေညာချက်မှာဖော်ပြထားပါတယ်။
ရန်ကုန်အပါအဝင် တိုင်းနဲ့ပြည်နယ်အချို့မှာ စစ်ကောင်စီဟာရွေးကောက်ပွဲကျင်းပနိုင်ဖို့ ရှေ့ပြေးအကြိုမဲစာရင်းအဖြစ် လူဦးရေ စာရင်း ကောက်ယူတာတွေကို မနေ့က ဇန်နဝါရီလ ၉ ရက်စတင်ပြီးကောက်ယူနေတာပါ။
ရန်ကုန်မြို့တွင်းမှာ ကောက်ယူရာမှာတော့ ရပ်ကွက်ရုံးလို နေရာမှာ ထွေအုပ် ၊ လဝက ဌာနဆိုင်ရာတွေထံ ပြည်သူတွေက စာရင်းသွားပေးသွင်းရတာတွေ့ရပါတယ်။
Public Service Announcement
မန္တလေးက အချို့နေရာတွေမှာ စစ်ကောင်စီက လူဦးရေ စာရင်းကောက်ယူတယ်လို့ မကြေညာဘဲ မှတ်ပုံတင်မရှိသူတွေ ၊ အိမ်ထောင်စုစာရင်းမရှိသူတွေကို မှတ်ပုံတင် ၊အိမ်ထောင်စုစာရင်းလုပ်ပေးဖို့ ရပ်ကွက်ရုံးထံစာရင်းပေးကြဖို့ လိုက်လံကြေညာတာတွေရှိတယ်လို့ ဒေသခံတစ်ဦးက ပြောပြပါတယ်။
လူဦးရေစာရင်းလိုက်လံကောက်ယူရာမှာ စစ်ကောင်စီတပ်ဖွဲ့ဝင်တွေ ၊ ရဲတပ်ဖွဲ့ဝင်တွေ လုံခြုံရေး ယူပေးတာကို ဓာတ်ပုံမှတ်တမ်းတွေအရ တွေ့ရပါတယ်။
မနေ့က တနင်္သာရီတိုင်း ၊လောင်းလုံးမြို့နယ်ထဲ စာရင်းလိုက်ကောက်တဲ့အဖွဲ့ ကို လိုက်လံလုံခြုံရေးယူပေးတဲ့ ဒုရဲအုပ်ဟာ ပစ်သတ်ခံလိုက်ရပါသေးတယ်။
NGU၊ တော်လှန်ရေးအဖွဲ့တွေနဲ့ အင်အားကောင်းတဲ့ တိုင်းရင်းသားလက်နက်ကိုင်အဖွဲ့အချို့က စစ်ကောင်စီရဲ့ ရွေးကောက်ပွဲ ကိုလက်မခံကြောင်းနဲ့ ရွေးကောက်ပွဲမဖြစ်အောင် တားမြစ်သွားမယ်လို့တရားဝင် ထုတ်ပြောထားကြပါတယ်။
ဒါအပြင် လူထုအနေနဲ့ စစ်ကောင်စီရွေးကောက်ပွဲ လုပ်ငန်းစဉ်မှာ မပူးပေါင်းကြဖို့လည်းတိုက်တွန်းထားကြပါတယ်။
