မလိုက်နာပါက မည်သူမဆိုပြင်းထန်စွာအရေးယူမယ်လို့ သတိပေး
စစ်ကောင်စီကြိုးပမ်းနေသည့် ရွေးကောက်ပွဲကို ချင်းပြည်နယ် ဖလမ်းမြို့နယ်နှင့် အထက်ချင်းတွင်းဒေသတွင်း မပြုလုပ်ရန် တားမြစ်ကြောင်း ချင်းအမျိုးသားအဖွဲ့ချုပ်/ချင်းအမျိုးသား များကာကွယ်ရေးတပ်ဖွဲ့(CNO/CNDF)က ယနေ့ သတိပေးထုတ်ပြန်လိုက်သည်။
ဇန်နဝါရီ ၆ရက်မှ ၉ရက်အထိ ကျင်းပခဲ့သည့် ချင်းအမျိုးသားကာကွယ်ရေးတပ်ဖွဲ့၏ ဒုတိယအကြိမ်မြောက် ညီလာခံအစည်းအဝေးအပြီး ထုတ်ပြန်ချက်၌ ထိုသို့ ဖော်ပြခဲ့ခြင်းဖြစ်သည်။
လက်နက်မဲ့ပြည်သူလူထုများကို အကြမ်းဖက်သတ်ဖြတ်၊ ပြည်သူ့အိုးအိမ်များကို အကြောင်းမဲ့မီးရှို့ဖျက်စီး၊ ပြည်သူ့ကာကွယ်ရေးတပ်ဖွဲ့များအပေါ် စစ်ကြောင်း အဆမတန်ဖြင့် တိုက်ခိုက်နေသည့်အပြင် လေကြောင်းဖြင့်ပါ တိုက်ခိုက်နေသည့် အကြမ်းဖက်စစ်ကောင်စီ၏ တရားဝင်အစိုးရဖြစ်ရေးအတွက် ဦးဆောင်ပြုလုပ်မည့် ရွေးကောက်ပွဲအား လုံး၀တားမြစ်လိုက်ပြီး တားမြစ်သည့်ကြားမှ ရွေးကောက်ပွဲ အထမြောက်အောင်ကူညီမည့် မည်သည့်ပုဂ္ဂိုလ်မျိုးမဆို ပြင်းထန်စွာ အရေးယူသွားမည်ဟု CNO/CNDFက အသိပေးခဲ့သည်။
CNO/CNDFအနေဖြင့် အာဏာရှင်စနစ်အမြစ်ပြတ်ချေမှုန်းရေး၊ ချင်းအမျိုးသားတည်ဆောက်ရေးနှင့် ဖက်ဒရယ်ဒီမိုကရေစီပြည်ထောင်စုပေါ်ပေါက်ရေးအတွက် တော်လှန်ရေးအင်အားစုများနှင့်အတူ ဆုံးခန်းတိုင်အောင် ဆက်လက်တိုက်ပွဲဝင် သွားမည်ဟုလည်း ထုတ်ပြန်ခဲ့သည်။
Public Service Announcement
