မြန်မာနိုင်ငံအတွင်း နေရပ်စွန့်ခွာတိမ်းရှောင်နေသူ လူဦးရေ ၁ ဒသမ ၅ သန်းကျော်သည် ခက်ခဲသည့် အခြေအနေများတွင် နေထိုင်နေကြရသည့်အတွက် လူမူကယ်ဆယ်ရေး အကူအညီများ အပူတပြင်းလိုအပ်နေသည်ဟု ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး (OCHA) က ယနေ့ထုတ်ပြန်သည်။
စစ်တပ်အာဏာသိမ်းပြီးနောက်ပိုင်း ထိတွေ့တိုက်ပွဲများနှင့် မလုံခြုံမှုကြောင့် လူဦးရေ ၁ ဒသမ ၁ သန်းကျော် နေရပ်စွန့်ခွာခဲ့ရပြီး ယခင်ရှိနေပြီးသော ၃၃၀,၀၀၀ ကျော်နှင့် ထည့်သွင်းရေတွက်လျှင် ၂၀၂၂ နှစ်ကုန်တွင် ပြည်တွင်းနေရပ်စွန့်ခွာသူဦးရေ ၁ ဒသမ ၅ သန်းကျော်လာခဲ့ခြင်းဖြစ်သည်။
“အထူးသဖြင့် မြန်မာနိုင်ငံ အနောက်မြောက်ပိုင်းနဲ့ အရှေ့တောင်ပိုင်းတို့မှာ ပြင်းထန်တဲ့တိုက်ပွဲတွေ၊ လုံခြုံရေးတင်းကျပ်မှုတွေ၊ ဝင်ရောက်ကူညီခွင့်ကန့်သတ်ချက်တွေနဲ့ လူသားချင်းစာနာမှုဆိုင်ရာလုပ်သားတွေအပေါ်ခြိမ်းခြောက်မှုတွေကြောင့် အရပ်သားပြည်သူတွေရဲ့ ဘေးကင်းလုံခြုံမှုကို ခြိမ်းခြောက်နေသလို ရွှေ့ပြောင်းနေထိုင်မှုတွေ ထပ်မံဖြစ်ပေါ်စေပြီး လူသားချင်းစာနာမှုအကူအညီပေးရေးလုပ်ငန်းတွေကိုလည်း အဟန့်အတားဖြစ်စေပါတယ်” ဟု OCHA က ဆိုသည်။
ရခိုင်နှင့် ချင်းပြည်နယ်တောင်ပိုင်းတွင် ရက္ခိုင့်တပ်တော်(AA)နှင့် မြန်မာစစ်တပ်တို့အကြား အလွတ်သဘောအပစ်ခတ်ရပ်စဲရေး သဘောတူညီချက် ဆက်လက်တည်တံ့နေသော်လည်း အခြေအနေမှာ ထိလွယ်ရှလွယ်ဖြစ်နေဆဲဟု OCHA က ဖော်ပြသည်။ မကြာသေးမီက တကျော့ပြန်တိုက်ပွဲများကြောင့် ရခိုင်နှင့် ချင်းပြည်နယ်တောင်ပိုင်း ပလက်ဝမြို့နယ်တို့တွင် ရွှေ့ပြောင်းနေထိုင်သူဦးရေ ၁၆,၀၀၀ ကျော်ရှိကာ ယခင်နှင့်လက်ရှိ ပဋိပက္ခများကြောင့် ပြည်တွင်းရွှေ့ပြောင်းနေထိုင်ကြရသူပေါင်း ၈၉,၀၀၀ ကျော်အထိ ရှိလာပြီဟု ထုတ်ပြန်ထားသည်။
Public Service Announcement
စစ်အာဏာသိမ်းမှုအပြီး ပြည်တွင်းနေရပ်စွန့်ခွာထွက်ပြေးရသူမှာ စစ်ကိုင်းတိုင်းအတွင်း အများဆုံးဖြစ်ပြီး ၆၅၀,၀၀၀ ခန့်ရှိကြောင်း ကုလသဂ္ဂက မှတ်တမ်းတင်ထားသည်။ မကွေးတိုင်း၊ ကရင်နီနှင့် ကရင်ပြည်နယ်တို့တွင် ဒုတိယအများဆုံး အိုးအိမ်စွန့်ခွာခဲ့ကြပြီး လူဦးရေ ၃ သိန်းခန့်စီ ရှိကြောင်း သိရသည်။
