တာရာ/People’s Spring
စစ်စရိတ်ထောင်းနေပြီး နိုင်ငံခြားငွေအမြဲလိုအပ်နေသည့် စစ်ကောင်စီက ပြည်ပသို့ ဆန်ပိုတင်ပို့ပြီးနိုင်ငံခြားငွေပိုရှာနိုင်ရေး နွေစပါးတိုး၍ စိုက်ပျိူးရန် နှင့် ပို့ကုန်ထုတ်လုပ်သည့် ဇုန်များသတ်မှတ်မည်ဟု စစ်ကောင်စီ လက်အောက်ခံ ဆန်စပါးအသင်းချုပ်က ထုတ်ပြန်ထားသည်။
ပြည်ပဆန်ပို့မှုမှ တလလျှင်ဒေါ်လာ သန်း ၁၀၀ ကျော်ရရှိနေသည့် စစ်ကောင်စီက ပြည်ပသို့ဆန် ပိုမိုတင်ပို့ရောင်းချရန် အရှိန်မြင့်တင်ရန်ယခုကဲ့သို့ စီစဉ်နေခြင်းဖြစ်သည်ဟု ဆန်လုပ်ငန်းရှင်များကပြောသည်။
“ပြီးခဲ့တဲ့ ရက်ပိုင်းက ဆန်စပါးကဏ္ဍ ဖွံဖြိုးတိုးတက်ရေးဆိုပြီး ဌာနဆိုင်ရာ(စစ်ကောင်စီလက်အောက်ခံဌာနများ)နဲ့ ဆန်စပါးအသင်းချုပ်တို့ အစည်းအဝေးလုပ်တဲ့အထဲမှာ အခုလို နွေစပါးနဲ့ export zoneတွေ သတ်မှတ်ပြီး ပြည်ပကို ဆန်တင်ပို့မယ်လို့ ပြောကြတာပါ”ဟု ဆန်လုပ်ငန်းရှင်တဦးကပြောသည်။
Public Service Announcement
စစ်ကောင်စီက ဆန်စပါးတင်ပို့မှုကို ကာလတိုအတွင်း ပိုမိုတင်ပင်နိုင်ရန်၊ နွေစပါးတိုးချဲ့ စိုက်ပျိုးရန်၊ ပို့ကုန်ဇုန်များသတ်မှတ်ရန် နှင့် စပ်မျိုးစပါးများစိုက်ပျိုးရန် စီစဉ်နေကြောင်း ဆန်စပါးလုပ်ငန်းရှင်အချို့ကပြောသည်။
နိုင်ငံခြားငွေလိုအပ်ချက်မြင့်မားနေသည့် စစ်ကောင်စီက ၂၀၂၄ နိုဝင်ဘာလအတွင်း ပြည်ပသို့ ဆန်တန်ချိန် ၃ သိန်းကျော်စံချိန်တင် တင်ပို့ခဲ့ပြီး နိုင်ငံခြားငွေ ဒေါ်လာ သန်း ၁၅၀ကျော်ရရှိခဲ့သည်ဟု ဆန်စပါးအသင်းချုပ်က ထုတ်ပြန်ထားသည်။
စစ်ကောင်စီသည် ၂၀၂၄ ဧပြီ ၁ရက်မှ နိုဝင်ဘာ ၃၀ ရက်အထိ ပြည်ပကို ဆန်တန်ချိန် ၁ ဒသမ ၇ သန်းတင်ပို့ခဲပြီး နိုင်ငံခြားငွေ ဒေါ်လာ သန်း ၈၀၀ ကျော်ရရှိထားသည်။
ပြည်တွင်း၌ ဆန်ဈေးများမြင့်တက်နေချိန်တွင် စစ်ကောင်စီက ပြည်ပသို့ ဆန်တင်ပို့မှုကိုမူ အရှိန်မြင့်တင်နေခြင်းဖြစ်သည်။ စစ်ကောင်စီက ဆန်ဈေးကို ၎င်းတို့သတ်မှတ်ထားသည့် ဈေးနှုန်းအတိုင်းရောင်းချရန် ဖိအားပေးထားပြီး မရောင်းချပါက အရေးကြီး ကုန်စည်နှင့် ဝန်ဆောင်မှု ဥပဒေဖြင့်အရေးယူမည်ဟု လုပ်ငန်းရှင်များကိုခြိမ်းခြောက်ထားသလို လုပ်ငန်းရှင်အချို့ကိုလည်းဖမ်းဆီးထောင်ချခဲ့သည်။
ပြင်ပဈေးကွက်တွင် ဆန်ကြမ်းတအိတ်ကို ကျပ် ၉၀,၀၀၀ပေါက်ဈေးရှိနေချိန်တွင် စစ်ကောင်စီက ကျပ် ၇၃၀၀၀ သာ သတ်မှတ်ထားသည်။ ရွှေဘိုပေါ်ဆန်းတအိတ်ကို ပြင်ပဈေးကွက်တွင် ကျပ် ၁၇၀,၀၀၀ပေါက်ဈေးရှိနေချိန်တွင် စစ်ကောင်စီက ကျပ်၁၄၅,၀၀၀ သတ်မှတ်ထားသည်။
စစ်တပ်အာဏာသိမ်းပြီးနောက်ပိုင်း နိုင်ငံခြားရင်းနှီးမြှပ်နှံမှု လျော့နည်းသွားခြင်း ၊ကုန်သွယ်မှုလျော့ကျပြီး နယ်စပ်ကုန်သွယ်ရေးစခန်းအားလုံးနီးပါးကို တော်လှန်ရေးတပ်များကသိမ်းပိုက်ထားခြင်း ၊ အမေရီကန်နှင့် နိုင်ငံတကာမှ အရေးယူဒဏ်ခတ်ပိတ်ဆို့ခြင်း စသည့်အကြောင်းများကြောင့်စစ်ကောင်စီတပ်အတွက် နိုင်ငံခြားငွေ ရရှိမှုနည်းလာသည်။ထိုအပြင် နိုင်ငံတစ်ဝန်း တိုက်ပွဲများကြောင့် လက်နက်ခဲယမ်းများ ၊ လေယာဥ်ဆီ စသည်တို့ ဝယ်ယူရန် နိုင်ငံခြားငွေကို ရနိုင်သမျှတိုးရရန်အားထုတ်နေခြင်းဖြစ်သည်။ ထိုအခြေအနေတွင် ဆန်စပါးအသင်းချုပ်မှာလည်း စစ်ကောင်စီနှင့် ပူးပေါင်း၍ တက်ကြွစွာ လုပ်ကိုင်ပေးနေခြင်းဖြစ်ကြောင်းလုပ်ငန်းရှင်များကပြောသည်။
