စစ်ကောင်စီတပ် လက်နက်ကြီးဖြင့် ရမ်းပစ်၍ ကလေးငယ်အပါအဝင် နှစ်ဦး ဒဏ်ရာရ
စစ်ကိုင်းတိုင်း အင်းတော်မြို့ရှိ စစ်ကောင်စီလက်အောက်ခံ ရွေးကောက်ပွဲကော်မရှင်ရုံးကို သတိပေးသည့်အနေဖြင့် မိုင်းခွဲတိုက်ခိုက်ခဲ့ကြောင်း အင်းတော်ပြည်သူ့ကာကွယ်ရေးတပ် (PDF)မှ ရဲဘော်တစ်ဦးက ပြောသည်။
ဇန်နဝါရီ ၁၇ရက် ညနေပိုင်း၌ အင်းတော်မြို့ ရွေးကောက်ပွဲကော်မရှင်ရုံးအား ပြောက်ကျားအဖွဲ့တစ်ခုမှ လက်လုပ်မိုင်း နှစ်လုံးဖြင့် ပစ်ခတ်ခဲ့ခြင်းဖြစ်သည်ဟု ဆိုသည်။
” မဲကော်မရှင်ရုံးကို မိုင်းခွဲပြီး သတိပေးခဲ့တယ်။ အထိအခိုက်တော့မရှိဘူး။ သတိပေးတဲ့အနေနဲ့ ဆိုတော့။ ခွေးတွေ (စစ်ကောင်စီတပ်သားတွေ) ရမ်းပစ်တာတော့ သူတို့ရမ်းပစ်တဲ့ လက်နက်ကြီးက မြို့ထဲကိုကျတာ။ လူသွားလူလာများတဲ့နေရာကျတော့ သုံးနှစ်အရွယ် ကလေးတစ်ယောက်နည်း နည်းထိတယ်။ နောက် အသက် ၃၀ဝန်းကျင် အမျိုးသားတစ်ယောက်ထိတယ်။ အသက်အန္တရာယ်တော့မစိုးရိမ်ရပါဘူး”ဟု အင်းတော် PDF ရဲဘော်က ပြောသည်။
ကော်မရှင်ရုံး တိုက်ခိုက်ခံရပြီးနောက် စစ်ကောင်စီတပ် ပစ်ခတ်သည့် လက်နက်ကြီးကျည်မှာ အင်းတော်သင်္ချိုင်းကုန်း ဘက်သို့ ၂လုံး ကျရောက်ပေါက်ကွဲခဲ့ပြီး အင်းတော်မြို့စျေး အရှေ့ပေါက်သို့ တစ်လုံး ကျရောက်ပေါက်ကွဲခဲ့သည်ဟု ဆိုသည်။
Public Service Announcement
စစ်ကောင်စီက တရားမဝင် ရွေးကောက်ပွဲ ကျင်းပနိုင်ရန် လူဦးရေစာရင်း ကောက်ယူမှုများ လုပ်ဆောင်လျက်ရှိရာ စစ်ကောင်စီ၏ လုပ်ငန်းစဉ်တွင် ပူးပေါင်းပါဝင်သူများကို ပြင်းထန်စွာ အရေးယူမည်ဟု သက်ဆိုင်ရာဒေသရှိ ကာကွယ်ရေးတပ်ဖွဲ့များက ထုတ်ပြန်ထားသည်။
