မကွေးတိုင်း၊ မြိုင်မြို့မြောက်ဘက်ရှိ စစ်ကောင်စီတပ်၏ လုံခြုံရေးဂိတ်အား ပစ်ခတ်တိုက်ခိုက်ရာ စစ်အုပ်စုဝင် သုံးဦးသေဆုံးကြောင်း မြိုင်(ပကဖ) ခေါင်းဆောင် ကိုလယျာ်က ပြောကြားသည်။
ယမန်နေ့ (ဖေဖော်ဝါရီ ၂၈ ရက်) ညနေ ၄ နာရီ ၄၉ မိနစ်ခန့်က မြိုင်မြို့မြောက်ဘက်တွင် တပ်စွဲသော စစ်ကောင်စီတပ်၊ ရဲနှင့် ပျူစောထီးများ၏ လုံခြုံရေးဂိတ်အား မြိုင်တပ်ရင်း (၁)တပ်ခွဲ(၃) နှင့် နံသာမြေအဖွဲ့တို့ ပူးပေါင်း၍ ဝင်ရောက်စီးနင်းပစ်ခတ်ခဲ့ကြောင်း ကိုလယျာ်က ပြောသည်။
တိုက်ခိုက်မှုကြောင့် စစ်အုပ်စုဝင် သုံးဦးသေဆုံးပြီး နှစ်ဦးကျည်ထိမှန်ကာ ပြင်းထန်ဒဏ်ရာရရှိသွားကြောင်း မြိုင်(ပကဖ)အဖွဲ့က ပြောသည်။
“ကြာတာ ၁၂ မိနစ်လောက်ပဲ။ သူတို့ဘက်က ၁၈ ဦးလောက်ရှိတယ်။ အတွဲလိုက်ပစ်ခတ်ခဲ့တယ်။”ဟု မြိုင်(ပကဖ)ခေါင်းဆောင် ကိုလယျာ်က ပြောသည်။
Public Service Announcement
လူဝင်မှုကြီးကြပ်ရေး(လဝက)ရုံးမှ စစ်အုပ်စုဝင်များ တပ်ကူထွက်လာသောကြောင့် ရဲဘော်များ အလျင်အမြန် ပစ်ခတ်၍ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းလည်း အသိပေးသည်။
တိုက်ပွဲအရှိန်အဟုန်မြှင့်တင်သွားမည်ဖြစ်၍ မြို့နေပြည်သူများအနေဖြင့် စစ်အုပ်စုနှင့် နီးရာ၌ နေထိုင်ခြင်းမပြုကြရန် မြိုင်(ပကဖ)အဖွဲ့က မေတ္တာရပ်ခံထားသည်။
