အာဏာသိမ်းစစ်ကောင်စီလက်အောက်ခံ Non CDM ဝန်ထမ်းများအအနေဖြင့် CDM ပြုလုပ်ရန် တအာင်းတပ်မတော်(TNLA)က တရားဝင်ကြေညာချက်ထုတ်ပြန်ထားရာ ရှမ်းမြောက်ဒေသရှိ မြို့နယ်အများစုအပါအဝင် မြို့နယ် ၉ခု၌ အကျုံးဝင်ကြောင်း TNLA သတင်းနှင့် ပြန်ကြားရေးဌာန တာဝန်ခံ ဒုဗိုလ်မှူးကြီးတားအိုက်ကျော်က အသိပေးသည်။
မကြာသေးမီက TNLA ၏ အုပ်ချုပ်ရေးဌာနက တရားဝင်ထုတ်ပြန်ခဲ့သည့် ကြေညာချက်တွင် Non CDMများ CDM ပြုလုပ်ရန်နှင့် လာမည့် ၆လအတွင်း CDM မလုပ်ပါက အရေးယူမည်ဟု အသိပေးထားသည်။
“ကျနော်တို့ လှုပ်ရှားဂွင်အကုန်လုံးပါတယ်။ လှုပ်ရှားတဲ့ဂွင်ဆိုတာ အဓိကတော့ ကျောက်မဲ၊ သီပေါ၊ နမ့်ဆန်၊ မန်တုံ၊ မိုးမိတ်၊ မိုးကုတ်၊ နမ့်ခမ်း၊ ကွတ်ခိုင် ၊ မူဆယ်ပေါ့ အဲဒီမြို့နယ်တွေပါတာပေါ့။ ဒါပေမဲ့ ကျောက်မဲ ၊ သီပေါ ၊ မိုးကုတ်၊ မိုးမိတ် တချို့ဟာတော့ ကျနော်တို့ ထိန်းချုပ်မှု၊ လှုပ်ရှားမှု အကုန်လုံးတော့ မရှိဘူး”ဟု ဒုဗိုလ်မှူးကြီးတားအိုက်ကျော်က ပြောသည်။
စစ်ကောင်စီ အုပ်ချုပ်ရေးကို လက်မခံကြောင်း TNLAက တရားဝင်ကြေညာချက် ထုတ်ပြန်ဆောင်ရွက်ခြင်းဖြစ်ရာ စစ်ရေးအရ တုံ့ပြန်လာနိုင်ခြင်းနှင့်ပတ်သက်ပြီး TNLA၏ သဘောထားကို မေးမြန်းရာ TNLA အနေဖြင့် ယခင်ကတည်းက ခုခံစစ်အနေဖြင့် ပြင်ဆင်ထားသည်ဟု ဒုဗိုလ်မှူးကြီးတားအိုက်ကျော်က ပြောသည်။
Public Service Announcement
“တိုက်ပွဲကတော့ မျှော်လင့်ကောင်းတဲ့အရာတော့ မဟုတ်ဘူး။ ဒီဟာက ဘယ်လိုဖြစ်မလဲဆိုတာမသိဘူး။ နဂိုရ်ကတည်းက တိုက်ပွဲကိစ္စကတော့ ကျနော်တို့ ခံစစ်အနေနဲ့ပဲရှိတယ်။ ထိုးစစ်အနေနဲ့ ဆောင်ရွက်ဖို့မရှိဘူး။ မလွှဲမရှောင်သာကိစ္စက တခါတလေ ရန်ဖန်ရန်ခါရှိတာပေါ့”ဟု ၎င်းက ဆိုသည်။
ယခု Non CDMများ CDMလုပ်ရန် ကြေညာချက်သည် နွေဦးတော်လှန်ရေးနှင့် ချိတ်ဆက် ဆောင်ရွက်ခြင်း ဟုတ်၊မဟုတ်မေးမြန်းရာ မှတ်ချက်ပေးရန်မရှိကြောင်း ဒုဗိုလ်မှူးကြီးတားအိုက်ကျော်က ပြောသည်။
