▪︎စစ်တပ်က နိုင်၍ရှို့ခြင်းမဟုတ်ဘဲ ရှုံး၍၊ ထောက်ခံမှုမရ၍ ရှို့ခြင်းဖြစ်ကြောင်း တော်လှန်ရေးရဲဘော်ပြော
စစ်အာဏာသိမ်းကာလအတွင်းစစ်ကောင်စီနှင့်လက်အောက်ခံအဖွဲ့အစည်းများက နိုင်ငံတဝန်းမီးရှို့ဖျက်ဆီးမှုကြောင့် အရပ်သားပြည်သူ နေအိမ်ပေါင်း ၆၀,၄၅၉ လုံး ပျက်စီးဆုံးရှုံးခဲ့ရကြောင်း Data For Myanmar က ယမန်နေ့တွင် ထုတ်ပြန်သည်။
အထက်ပါ အရပ်သားပြည်သူ နေအိမ်ပေါင်းခြောက်သောင်းကျော် ပျက်စီးဆုံးရှုံးမှုသည် ဖေဖော်ဝါရီ ၂၈ ရက်အထိ ရေတွက်ကောက်ယူထားခြင်းဖြစ်ပြီး စစ်ကိုင်းတိုင်းတွင် ၄၇,၇၇၈ လုံး၊ မကွေးတိုင်းတွင် ၉,၀၁၉ လုံး၊ ချင်းပြည်နယ်တွင် ၁,၄၈၅ လုံးနှင့် ကျန်ပြည်နယ်နှင့် တိုင်းများတွင် ၂,၁၇၇ လုံး ပျက်စီးဆုံးရှုံးခဲ့ကြောင်း ဖော်ပြသည်။
စစ်အုပ်စုက နိုင်ငံတစ်ဝန်းပြည်သူ့အိုးအိမ်များမီးရှိူ့ဖျက်ဆီးနေမှုများကိုData For Myanmar ကပုံအချက်အလက်စုဆောင်းထုတ်ပြန်ပေးနေသည်။ ဆက်သွယ်ရေးအခက်အခဲကြောင့် အတည်ပြုရန်ခက်ခဲသဖြင့် ကျန်ရှိသောမီးရှို့ခံရသောစာရင်းများကျန်ရှိနိုင်သေးပြီး ၊အမှန်တစ်ကယ်တွင် ယခုထက်ပင်ပိုများနိုင်ကြောင်းသိရသည်။
ယခု မတ်လထဲတွင်လည်း စစ်အုပ်ချုပ်ရေးကြေညာသတ်မှတ်ထားသည့် စစ်ကိုင်းတိုင်းအတွင်းရှိ မြို့နယ်အများစုတွင် စစ်ကောင်စီတပ်က စစ်ကြောင်းထိုးခြင်း၊ အပြစ်မဲ့ပြည်သူများ၏ နေအိမ်များကို မီးရှို့ဖျက်ဆီးခြင်းများ တိုးမြှင့်လုပ်ဆောင်လာသည်ဟု ဒေသတွင်းသတင်းရင်းမြစ်များက ပြောသည်။
Public Service Announcement
မတ်လ ၁၇ ရက်ကပင် ဝက်လက်မြို့နယ် သမ္မာရိုးစံပြကျေးရွာကို စစ်ကောင်စီတပ်က ဝင်ရောက်အကြမ်းဖက်ဖျက်ဆီးမီးရှို့ခဲ့ရာ နေအိမ် ၂၆၉ အိမ်နှင့်ဘုန်းကြီးကျောင်းတစ်ကျောင်းကို ပြာကျစေခဲ့ပြီး အဘွားအိုတစ်ဦးကို အရှင်လတ်လတ်မီးရှို့သတ်ဖြတ်သွားကြောင်း ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီက သတင်းထုတ်ပြန်ထားသည်။
“အကြောက်တရားနဲ့အုပ်ချုပ်ပြီး ပြည်သူလူထုဆင်းရဲအောင်လုပ်တာ။ ဆင်းရဲရင် နိုင်ငံရေးဘက်ကို မလှည့်နိုင်ဘူး။ ထောက်ပံ့မှုမလုပ်နိုင်ဘူး။ ထောက်ခံမှုမလုပ်နိုင်ဘူး။ အကြောက်တရားသွင်းပြီး အုပ်ချုပ်ချင်လို့ ရက်ရက်စက်စက် လုပ်တာ။ အဓိက,က သူတို့ကို ထောက်ခံမှုမရှိလို့ လုပ်တာပဲ”ဟု ဝက်လက်မြို့နယ်ပြည်သူ့ကာကွယ်ရေးအဖွဲ့မှ ကိုဂျိန်းစ်ဘွန်းက ပြောသည်။
ဆက်လက်ပြီး “ဒီမိဘဘိုးဘွားလက်ထက်ကတည်းက စုဆောင်းထားတဲ့ နှစ်ပေါင်း ရာနဲ့ချီ၊ ၇၀၊ ၆၀ စုဆောင်းထားတဲ့ ဒီအိမ်၊ ဒီယာလေးတွေက ဒါလေးတွေက သူတို့၊ ကျွန်တော်တို့ ဘဝတွေပဲဟာ ဒါတွေကို မီးရှို့ဖျက်ဆီးမှတော့ ဘယ်သူကျေနပ်မှာလဲ။ ဘယ်လိုမှလည်း ကျေနပ်နိုင်စရာအကြောင်းမရှိဘူး တစ်သက်လုံး” ဟု ၎င်းက ဆက်ပြောသည်။
စစ်ကောင်စီတပ်သည် ပြည်သူ့စစ်မဟာဗျူဟာဟု မကြာခဏပြောဆိုကာ လုပ်ဆောင်ခြင်းဖြစ်သော်လည်း ပြည်သူလူထုက ပူးပေါင်းဆောင်ရွက်ခြင်းမရှိသလို ထောက်ခံမှုလည်း မရှိကြောင်း ဒေသခံအချို့က ပြောသည်။
“ပြည်သူ့စစ်မဟာဗျူဟာကျဆုံးပြီး မကြာခင် စစ်အာဏာရှင်တွေ ပြုတ်ကျဖို့ အလားအလာအကောင်းဆုံးအချိန်ပဲ။ ဒါ နိုင်လို့ ရှို့တာမှမဟုတ်တာ ရှုံးလို့ရှို့တာပဲ။ သူတို့ ထောက်ခံမှုမရှိလို့ ရှို့တာ”ဟု တော်လှန်ရေးရဲဘော် ကိုဂျိန်းစ်ဘွန်းက ပြောသည်။
