နိုင်ငံတကာအသိုင်းအဝိုင်းဟာ မြန်မာ့အရေးမှာ လုံလောက်တဲ့ ပံ့ပိုး ကူညီမှုတွေ မလုပ်ပေးခဲ့ဘူးလို့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ် တွန်အင်ဒရူးက ပြောလိုက်ပါတယ်။
မနေ့ တနင်္လာနေ့ က ဂျီနီဗာမြို့မှာ ကျင်းပတဲ့ ကုလလူ့အခွင့်အရေးကောင်စီရဲ့အစည်းအဝေးမှာ တွန်အင်ဒရူးက ပြောလိုက်တာပါ။
နိုင်ငံတကာရဲ့ ပျက်ကွက်မှုဟာ စိတ်ပျက်စရာကောင်းတယ်လို့လည်း တွန်အင်ဒရူးက ဆိုပါတယ်။
အာဏာသိမ်း ၂ နှစ်ကျော်ကာလအတွင်းမှာ မြန်မာ ပြည်သူ ၃၀၀၀ ကျော် သတ်ဖြတ်ခံထားရပြီး လူဦးရေ ၁ ဒဿမ ၃ သန်းခန့်ဟာ ပြည်တွင်းမှာ အိုးအိမ်စွန့်ခွာတိမ်းရှောင်နေရတဲ့အခြေအနေကို ကြုံနေရတယ်လို့ တွန်အင်ဒရူးက လူ့အခွင့်အရေးအစည်းအဝေးမှာပြောပါတယ်။
Public Service Announcement
ဒါအပြင် မြန်မာလူထုရဲ့ တဝက်ကျော်ဟာ ဆင်းရဲမွဲတေလာပြီး ပြည်သူတွေရဲ့နေအိမ် အလုံးပေါင်း ၅၈,၀၀၀ ခန့် စစ်တပ်ရဲ့မီးရှို့ဖျက်ဆီးတာကိုခံခဲ့ရတယ်လို့လည်း တွန်အင်ဒရူးကဆိုပါတယ်။
မြန်မာ စစ်တပ်ဟာ နိုင်ငံကို ဖျက်ဆီးနေသလို လူထုရဲ့ လူ့အခွင့်အရေး တွေဟာချိုးဖောက်ခံနေရပြီး အတိုက်အခံတွေကို ချေမှုန်းနေတယ်လို့လည်း ပြောပါတယ်။
ဒီလိုအခြေအနေတွေကို ကြုံနေရတဲ့မြန်မာလူထုတွေကို နိုင်ငံတကာက မေ့လျော့မထားဘူးဆိုတာကိုပြသဖို့ အရေးကြီးနေပြီလို့လည်း တွန်အင်ဒရူးက ဂျီနီဗာ မြို့ လူ့အခွင့်အရေးကောင်စီအစည်းအဝေးမှာ တင်ပြခဲ့ပါတယ်။
ဓာတ်ပုံ − AP
