ရွာဦးကျောင်းဆရာတော်ကိုပါ ဖမ်းဆီးသွား
ရွာဦးကျောင်းဆရာတော်ကိုပါ ဖမ်းဆီးသွားစစ်ကိုင်းတိုင်း၊ ကန့်ဘလူမြို့နယ်တွင် အကြမ်းဖက်စစ်ကောင်စီတပ်က ညောင်ဇင်ကြီးကျေးရွာအား မီးရှို့ဖျက်ဆီးပြီး စိတ်ကျန်းမာရေးမကောင်းသော အမျိုးသားတစ်ဦးအား မီးရှို့သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
အကြမ်းဖက်စစ်ကောင်စီတပ်က အဆိုပါ ကျေးရွာရှိ နေအိမ် ၃၀ ကျော်နှင့် လယ်ယာသုံးပစ္စည်းများ၊ စပါးများကိုပါ မီးရှို့ဖျက်ဆီးကာ ရွာဦးကျောင်းဆရာတော်ကိုလည်း ဖမ်းဆီးသွားကြောင်း ၎င်းတို့က ပြောသည်။
ယမန်နေ့ (မတ်လ ၂၃ ရက်) ညနေ ၄ နာရီခွဲခန့်က ကန့်ဘလူခရိုင်၊ ထန်းကုန်းတိုက်နယ်၊ညောင်ဇင်ကြီးကျေးရွာကို စစ်ကောင်စီတပ်နှင့်ပျူစောထီးများက အင်အား ၁၅၀ခန့်ဖြင့် ဝင်ရောက်မီးရှို့ဖျက်ဆီးခဲ့ခြင်း ဖြစ်သည်။
ထို့နောက် ညောင်ဇင်အရှေ့ကျောင်းရှိ သက်တော် (၆၀)နှစ်အရွယ် ကျောင်းထိုင်ဆရာတော် ဦးသောမလအား ဖမ်းဆီးခေါ်ဆောင်သွားကြောင်း၊ ထို့အပြင် စိတ်ကျန်းမာရေးမကောင်းသည့် အသက် (၃၅) နှစ်အရွယ် ကိုမျိုးမင်းဦး(ခ)ကိုထွန်းမင်းဦးအား မီးရှို့သတ်ဖြတ်သွားကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြော သည်။
Public Service Announcement
စစ်ကောင်စီတပ်နှင့် ပျူများ၏ မီးရှို့ဖျက်ဆီးမှုကြောင့် ညောင်ဇင်ကြီးရွာရှိ နေအိမ် ၃၂လုံး နှင့် ဆိုင်ကယ် ၁၇ စီးအပြင် လယ်ယာသုံးလက်တွန်းထွန်စက် သုံးစီး ၊ ထွန်စက် တစ်စီးနှင့် ဘုန်းကြီးကျောင်းတွင် လာထားကြသော စပါးတင်းရာနှင့်ချီပါ မီးလောင်ဆုံးရှုံးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။
“ညောင်ဇင်လေးမှာ တပ်စွဲတာ နည်းနည်းကြာပြီ။ ပျူရွာတော့ ပြောမရဘူး။ တချို့ပြည်သူတွေက ထွက်ပြေးနေကြတယ် မနေချင်လို့။ ပျူထဲနေရမှာမို့ အိမ်တွေမီးရှို့မယ်ခြိမ်းခြောက်ပြီးအမြဲပြန် ခေါ်နေတာ။ ဆရာတော်ကိုလည်း ပြန်မလွှတ်သေးဘူး။ဘာကြောင့်ဖမ်းလဲဆိုတာက သူတို့လိုလူစိတ် မရှိတဲ့သူတွေအတွက်တော့ အကြောင်းပြချက်လိုမယ်မထင်ပါဘူး။”ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ အဖွဲ့ဝင်တစ်ဦးကပြောသည်။
ထို့အပြင် စစ်ကောင်စီတပ်နှင့်ပျူများသည် ကျေးရွာအတွင်းရှိ ရေမီတာများနှင့် မီးမီတာများကိုပါ ရိုက်ခွဲဖျက်ဆီးခဲ့ပြီး ယမန်နေ့ညနေပိုင်းတွင် ညောင်ဇင်လေးရွာဘက်သို့ ပြန်လည်ဆုတ်ခွာသွားကြောင်း သိရသည်။
“ညောင်ဇင်ဘုန်းကြီးဖုန်းလဲပေါက်ခွဲတယ်။ ဘုန်းကြီးကိုလည်း ရိုက်နှက်တယ်လို့ သတင်းရတယ်။ သူတို့ထွက်သွားတော့ ရွာသားတွေ အပြေးအလွှား မီးပြန်လာငြှိမ်းကြတယ်လို့ သတင်းရတယ်။”ဟု ဒေသခံတစ်ဦးက ပြောသည်။
အဆိုပါ စစ်ကြောင်းကြောင့် ညောင်ဇင်ကြီးရွာနှင့်အနီးအနားရှိရွာမှ ဒေသခံ ပြည်သူတစ်သောင်းခန့် ထွက်ပြေးတိမ်းရှောင်နေရကြောင်း သတင်းရရှိသည်။
စစ်ကောင်စီက အာဏာသိမ်းပြီးနောက်ပိုင်း ၂၀၂၁ မေလမှ ၂၀၂၃ ဖေဖော်ဝါရီလကုန်အထိ နေအိမ်ပေါင်း ၆၀,၄၅၉လုံး မီးရှို့ဖျက်ဆီးခံထားရပြီး စစ်ကိုင်းတိုင်းမှာ အများဆုံးဖြစ်ကာ နေအိမ်ပေါင်း ၄၇,၇၇၈လုံး ပျက်စီးဆုံးရှုံးခဲ့ကြောင်း Data For Myanmar အဖွဲ့က ထုတ်ပြန်ထားသည်။
