စလင်းနှင့် ပွင့်ဖြူကြား ပုသိမ်-မုံရွာလမ်းပိုင်းတွင် စစ်ကောင်စီတပ် အစစ်အဆေးကြမ်းနေ

▪︎ပြည်သူများသတိထားသွားလာကြရန်PDF အသိပေး

မကွေးတိုင်း စလင်းမြို့နယ်နှင့် ပွင့်ဖြူမြို့နယ်ကြား ပုသိမ်-မုံရွာလမ်းပိုင်းတွင် စစ်ကောင်စီတပ်မှ ကင်းပုန်းအများအပြားချထားသည့်အပြင် အင်အားအ ပြည့်ဖြင့် စစ်ဆေးနေကြောင်း ပြည်သူ့ကာကွယ်ရေးအဖွဲ့-ပွင့်ဖြူ(PDF-PwintPhyu)မှ တာ ၀န်ရှိသူတစ်ဦးက People’s Spring သတင်းဌာနသို့ ပြောသည်။

စစ်ကောင်စီတပ်က ယနေ့(ဧပြီ ၂၃)ညနေပိုင်းမှစပြီးပွင့်ဖြူ-ရှောက်တောတံတား၊ စလင်းမြို့နယ်တောင်ဘက်နှင့် ပွင့်ဖြူနယ် ပုသိမ်-မုံရွာလမ်းပိုင်းရှိ မဲဇလီတံတား စသည့်နေရာများတွင် အင်အားအပြည့်ဖြင့်လာရောက်စစ်ဆေးနေခြင်းြဖစ်သည်ဟု ဆိုသည်။

“ကင်းပုန်းတွေလည်း ရှိတယ်။ ညနေပိုင်းက ကားကြီးတစ်စီးလက်နက်အင်အားလူ အပြည့်နဲ့တက်သွားတာ။ ကပ်ရက်က ကားလေး နှစ်စီးပါတယ်ဗျ။ တက်သွားတယ်ဆိုတာက ပွင့်ဖြူကနေ မဲဇလီဘက်တက်တာပြောတာ။ စလင်းရဲ့ တောင်ဘက်မှာလည်း ပိတ်စစ်တယ်ဗျ။ ရှောက်တော တံတားမှာလည်း စစ်တယ်ဗျ။ ခုထိစစ်နေဆဲလို့လည်းသိရတယ်။ သရက်ကံမ ရဲဘော်တွေကျဆုံးတဲ့ရက်ကလည်း အဲလိုပဲဗျ။ စစ်တယ်”ဟု PDF-PwintPhyu မှ တာ၀န်ရှိသူတစ်ဦးက People’s Spring သို့ ပြောသည်။

စစ်ကောင်စီတပ်များ အင်အားအပြည့်ဖြင့်စစ်ဆေးနေသော ပုသိမ်-မုံရွာလမ်းပေါ်ရှိ မဲဇလီတံတားတွင် ပြီးခဲ့သည့် ၂၀၂၂ ခုနှစ် ဇွန်လအတွင်းက သရက်-ကံမ တော်လှန်ရေးရဲဘော်များစီးနင်းလိုက်ပါလာသည့်ယာဉ်တစ်စီး စစ်ကောင်စီတပ်၏ စောင့်ကြိုတိုက်ခိုက်ခြင်းခံရပြီး ရဲဘော်အချို့ကျဆုံးခဲ့ရသည်။

Public Service Announcement

ထို့ကြောင့် ယခုလက်ရှိတွင်လည်း အထက်ပါလမ်းပိုင်းများအား စစ်တပ်က ပိတ်ဆို့စစ်ဆေးမှုများလုပ်ဆောင်နေသည်မှာ သတင်းတစ်ခုခုရ၍ဖြစ်နိုင်သောကြောင့် ပြည်သူများနှင့် တော်လှန်ရေးရဲဘော်များအနေဖြင့် သက်ဆိုင်ရာလမ်းပိုင်းများကို သတိပြုသွားလာကြရန် PDF-PwintPhyu က သတိပေးသည်။

“(ပြည်သူတွေအနေနဲ့)ပြည်သူ့ကာကွယ်ရေးတပ်ဖွဲ့တွေကို စစ်ကောင်စီနဲ့ပတ်သက်တဲ့ သတင်းတွေပေးကြဖို့အကူညီတောင်းချင်ပါတယ်။ ပြီးတော့လည်း စစ်ကောင်စီနဲ့ ကင်းကင်းရှင်းရှင်းနေကြဖို့ မေတ္တာ ရပ်ခံလိုပါတယ်။ မလိုအပ်ပဲ သူတို့နဲ့ နီးနီးကပ်ကပ်မနေဖို့နဲ့ ကျရောက်လာမဲ့ အန္တရာယ်တွေကို သတိနဲ့ ယှဥ်ပြီး နေကြဖို့ တိုက်တွန်းလိုပါတယ်ခင်ဗျ”ဟု PDF-PwintPhyu က သတင်းစကားပါးထားသည်။