ရှမ်း-ကရင်နီ(ကယား)ပြည်နယ်အစပ် မိုးဗြဲမြို့တွင် တိုက်ပွဲပြင်းထန်နေကြောင်း ကရင်နီအမျိုးသားများကာကွယ်ရေးတပ် KNDF တပ်ရင်း ၃ က ပြောသည်။
ယနေ့(ဧပြီ ၂၆ ရက်) နံနက် ၆ နာရီခန့်ကစ၍ယခုသတင်းရေးသားချိန် နံနက် ၁၀ နာရီကျော်အထိ မိုးဗြဲမြို့၌ တိုက်ပွဲ ဖြစ်ပွားနေခြင်းဖြစ်သည်။
“လွိုင်လင် နဲ့ လွိုင်ကော် က အမြောက်တပ်တွေကနေ လက်နက်ကြီးပစ်ကူ အဆမတန်ပေးနေတယ်။ပြီးတော့ တိုက်ပွဲက ပြင်းထန်နေတယ်လို့ပဲလောလောဆယ်ပြောနိုင်သေးတယ်”ဟု မိုးဗြဲ PDF တပ်ဖွဲ့ဝင်တစ်ဦးက People’s Spring သို့ပြောသည်။
ထို့ကြောင့် မိုးဗြဲမြို့နှင့်ဆက်စပ် သည့်လမ်းပိုင်းနေရာများသို့ အသွားအလာမပြုလုပ်ကြရန်လည်း ကာကွယ်ရေး တပ်များက သတိပေးထားသည်။
မိုးဗြဲမြို့တွင်း ပိတ်မိနေသော ပြည်သူများအနေဖြင့်လည်း လုံခြုံသော နေရာတွင် ပုန်းခိုနေကြရန် KNDF ကအကြံပြုသည်။
KNDF ဖယ်ခုံ ကလည်း ယနေ့ နံနက် ၁၀ နာရီခွဲတွင် အရေးပေါ်ထုတ်ပြန်ချက်ထုတ်ပြန်သည်။
“မိုးဗြဲရှိမိဘပြည်သူများ စစ်ရေးသတိရှိကြပါရန်။မိုးဗြဲ-ဖယ်ခုံလမ်းမတစ်လျှောက် ဖြတ်သန်းသွားလာခြင်း မပြုကြပါရန်။
အရေးပေါ်အကူညီလိုအပ်ပါက ကယ်ဆယ်ရေးအဖွဲ့များနှင့် ချိတ်ဆက်ရန်”ဟုကြေညာထားသည်။
မတ်လဆန်းပိုင်းကစ၍ ရှမ်း-ကရင်နီ အစပ် ဖယ်ခုံ ၊မိုးဗြဲ ဘက်သို့ စစ်ကြောင်းထိုးလာသည့် စစ်ကောင်စီတပ်ကို ကရင်နီပူးပေါင်းတပ်များက ခုခံနေပြီးနေ့စဥ် ထိတွေ့တိုက်ပွဲများ ဖြစ်ပွားလျက်ရှိနေသည်။
ဧပြီလ ၂၄ ရက်က ဖယ်ခုံ၊ မြောက်စလုံးတိုက်ပွဲ ၌စစ်တပ်မှသေဆုံးသူ ၂၀ ခန့်တွင် ဗိုလ်မှူးအဆင့်ပါဝင်ပြီးလက်နက် ၁၀ လက်ထက်မနည်းရရှိခဲ့သည်။
▪︎မှတ်ချက်-သတင်းကို ဧပြီ ၂၆ နံနက် ၁၁ နာရီ ၅၀ မိနစ်တွင်ထပ်မံဖြည့်စွက်ထားပါသည်။