စစ်ကောင်စီတပ် လက်နက်ကြီးရမ်းပစ်နေဟု ဒေသခံပြော
ကချင်ပြည်နယ် ဖားကန့်မြို့နယ်တွင် ကချင်လွတ်လပ်ရေးတပ်မတော်(KIA) တပ်ရင်း(၆)နှင့် စစ်ကောင်စီတပ်တို့ ထိတွေ့တိုက်ပွဲဖြစ်ခဲ့ကြောင်း ဒေသခံတစ်ဦးက ပြောသည်။
“တပ်ရင်း(၆)ဘက်မှာ စစ်ကောင်စီတပ်နဲ့ မနေ့က ထိတွေ့မှုရှိတယ်လို့ ပြောတယ်။ဖားကန့်ကုန်းပေါ်က ေးတွေကတော့ ရင်း(၆)ဘက်ရော ပြည်သူတွေအိမ်ဘက်ရော လက်နက်ကြီးတွေနဲ့ ပစ်နေတယ်လို့ ကြားတယ်။ ဖားကန့် ဗျူဟာကုန်းပေါ့ စကစပေါ့။ စစ်ကောင်စီကို စစ်ကောင်စီလို့ မခေါ်တော့ဘူး ခွေးကြီးပဲခေါ်တော့တာလေ”ဟု ဒေသခံသတင်းရင်းမြစ်က ပြောသည်။
မေလ ၃ရက် နံနက်ပိုင်းမှ ညနေပိုင်းအထိ တိုက်ပွဲဖြစ်ခဲ့ပြီး နှစ်ဖက်ထိခိုက်ကျဆုံး အခြေအနေအသေးစိပ်ကိုမူ People’s Spring ကအတည်မပြုနိုင်သေးပါ။
“ဖြစ်တာက လုံးခင်းနဲ့ ဖားကန့်ကြားလောက်ကျမယ်။ တပ်ရင်း(၆)မှော်ဘုံပေါ့။ မှော်ဘုံဆိုတာ ရွာကြီး။ အဲဒီဘက်မှာ ဖြစ်တယ်ကြားတယ်။ တိတိကျကျတော့ မသိရသေးဘူး”ဟု ဒေသခံက ပြောသည်။
Public Service Announcement
တိုက်ပွဲဖြစ်စဉ်နှင့်ပတ်သက်ပြီး မေးမြန်းရန် KIA သတင်းနှင့် ပြန်ကြားရေးဌာနတာဝန်ခံ ဗိုလ်မှူးကြီးနော်ဘူထံသို့ ယနေ့ ဆက်သွယ်ခဲ့သော်လည်း အဆက်အသွယ် မရသေးပေ။
ဖားကန့်နယ်တွင် KIAနှင့် စစ်ကောင်စီတပ်အကြား ထိတွေ့တိုက်ပွဲဖြစ်ပွားနေပြီး စစ်ကောင်စီတပ် စစ်ကြောင်းများကို KIAက မိုင်းဆွဲတိုက်ခိုက်မှု၊ ကြားဖြတ်တိုက်ခိုက်မှုများ မကြာခဏ ပြုလုပ်ခဲ့သည်။ စစ်ကောင်စီတပ်ကလည်း ဒေသခံ ပြည်သူများကို လူသားဒိုင်းအဖြစ် အသုံးပြုခြင်း၊ ဖမ်းဆီးခြင်းများလည်း အရှိန်မြှင့်လုပ်ဆောင်လျက်ရှိသည်။
