ဆိုင်ကလုန်းမုန်တိုင်း မိုခါဝင်ရောက်မှုကြောင့် ကချင်လွတ်လပ်ရေးအဖွဲ့(KIO/KIA) ထိန်းချုပ်နယ်မြေရှိ စစ်ရှောင်စခန်း နှစ်ခုမှ နေအိမ်အဆောက်အဦးများ ပျက်စီးမှုရှိခဲ့ကြောင်း အဆိုပါဒေသသို့ ရောက်ရှိနေသည့် ကိုစောမင်းနောင်က ပြောသည်။
KIOထိန်းချုပ် ဒေသရှိ မဂါးယန်နှင့် ရှအစ်ယန် စစ်ရှောင်စခန်းနှစ်ခုမှ စစ်ရှောင်များ နေထိုင်ရာ အိမ်ခြေ ၂၀ ၊ အိမ်သာနှင့် မီးဖိုချောင် ၄၀ ခန့် ပျက်စီးမှု ရှိခဲ့သည်ဟု ဆိုသည်။
“ကျနော်တို့ အခုရောက်နေတဲ့ ရှအစ်ယန်နဲ့ မဂါးယန် စစ်ရှောင်စခန်းမှာတော့ လူအသေအပျောက်တော့ မရှိပေမယ့် အိုအိမ်အပျက်အစီးတွေတော့ရှိတယ်။ ဒီဘက်မှာကတော့ အမျိုးသမီးတွေက အိမ်ထောင်ဦးစီးတွေ ပိုများတော့ ပိုခက်ခဲကြတယ်”ဟု ကိုစောမင်းနောင်က ပြောသည်။
စခန်းထိခိုက်ပျက်စီးမှုများအပေါ် စခန်းကော်မတီများက ချက်ချင်း ပြင်ဆင်ဆောင်ရွက်မှုများတွေ့ရကြောင်း ၎င်းက ဆိုသည်။
Public Service Announcement
“အားလုံးက ကိုယ်ထူကိုယ်ထပဲ လုပ်ယူကြတာကို တွေ့ရတယ်။ ဒီလို လုပ်ဆောင်ကြတဲ့အခါ အိမ်ထောင်စုလူများတဲ့ သူတွေက ချက်ချင်းလုပ်နိုင်ပေမယ့် အမျိုးသမီး အိမ်ထောင်ဦးစီး မိသားစုတွေကတော့ ဒီလို နေနေကြရသေးတာကို မြင်တွေ့ရတယ်။ တာဝန်ရှိသူတွေဘက်က စီစဉ်ညွှန်ကြားတာ တွေလည်း အခုထိ ဘာမှ မရှိသေးတာကို တွေ့ရတယ်”ဟု ကိုစောမင်းနောင်က ယနေ့ ညပိုင်း၌ ပြောသည်။
မကြာသေးမီကလည်း KIO နယ်မြေရှိ စစ်ရှောင်စခန်း မီးလောင်မှု ဖြစ်ခဲ့ရာ KIOတာဝန်ရှိသူများလာရောက်ပြီး စခန်းနေအိမ်များ ပြန်လည်တည်ဆောက်နိုင်ရေး စီမံဆောင်ရွက်ပေးခဲ့သည်။
