စစ်ကိုင်းတိုင်း၊ ရွှေဘိုနှင့် ဝက်လက်မြို့နယ်ရှိ စစ်ကောင်စီတပ်၏ ဘန်ကာနှင့် စစ်ကြောင်းတို့အား ဒရုန်းဖြင့် တိုက်ခိုက်ရာ ထိခိုက်မှုများရှိကြောင်း Black Wolf Army အဖွဲ့ ပြန်ကြားရေးတာဝန်ခံက ပြောသည်။
ယမန်နေ့ (မေလ ၃၀ ရက်) ညနေပိုင်းက ရွှေဘိုမြို့နယ်၊ ကျောက်မြောင်းမြို့နယ်ခွဲ၊ ဆယ့်သုံးမိုင်ရွာမှ ထွက်လာသော အင်အား ၅ဝ ခန့်ပါ စစ်ကောင်စီစစ်ကြောင်းအား ညနေ ၆ နာရီခွဲခန့်က ဝက်လက်မြို့နယ် စခန်းသာရွာတွင် ဒရုန်းဖြင့် ဗုံးသီးခုနစ်လုံးချ တိုက်ခိုက်ခဲ့ကြောင်း Black Wolf Army အဖွဲ့ ပြန်ကြားရေးတာဝန်ခံက ပြောသည်။
သိူ့သော် စစ်ကောင်စီတပ်သား ထိခိုက်မှုရှိသော်လည်း အတည်မပြုနိုင်သေးဟု ဆိုသည်။
အဆိုပါ စစ်ကောင်စီတပ်သည် ညနေ ၅ နာရီခန့်တွင် စခန်းသာကျေးရွာသို့ရောက်ရှိပြီးနောက် ၁နာရီကျော်အကြာတွင် ဒရုန်းဖြင့်တိုက်ခိုက်ခံရခြင်းဖြစ်ကြောင်း ဒေသခံများက ပြောသည်။
Public Service Announcement
မေလ ၂၈ ရက် ည ၁၀ နာရီခွဲခန့်ကလည်း ဝက်လက်မြို့နယ် ဟန်လင်းကျေးရွာတွင် တပ်စွဲထားသော အင်အား ၆၀ခန့်ရှိ စစ်ကောင်စီတပ်သားများအား ဗုံးသီးလေးလုံးချ တိုက်ခိုက်ခဲ့ရာ ဘန်ကာ ထိမှန်ပြီး စစ်သား လေးဦး အပြင်းအထန် ဒဏ်ရာရသည်ဟု အတည်ပြုနိုင်ကြောင်း အထက်ပါတာဝန်ခံက ဆိုသည်။
စစ်ဆင်ရေး နှစ်ခုကို BLACK WOLF – ARMY တပ်ဖွဲ့ နှင့် WHO AM I – ARMY တို့ပူးပေါင်းတိုက်ခိုက်ခဲ့ပြီး ဟန်လင်းကျေးရွာဖြစ်စဥ်တွင် ပြည်သူ့အစေခံတပ်ဖွဲ့တို့က ပူးပေါင်းတိုက်ခိုက်ခဲ့ကြောင်း အသိပေးထားသည်။
“ခြေလျင်စစ်ကြောင်းက စခန်းသာမှာတပ်စွဲထားတာ။ ရွာနားလေးပဲ ဖြစ်တာ။ ဟန်လင်းရွာဖြစ်စဥ်က ဘန်ကာကတော့ ရွာဘုန်းကြီးကျောင်းထဲမှာဆောက်ထားတာပါ။”ဟု Black Wolf Army အဖွဲ့ ပြန်ကြားရေးတာဝန်ခံက ပြောသည်။
ပြီးခဲ့သည့် မေလ ၁၆ ရက် နံနက်ပိုင်းကလည်း ရွှေဘို – ကျောက်မြောင်းလမ်းပိုင်းတွင်အင်အား ၅၀ ဦးခန့်ပါ စစ်ကောင်စီစစ်ကြောင်းအား မဟာမိတ်အဖွဲ့က မိုင်းဆွဲတိုက်ခိုက်ခဲ့ရာ စစ်ကောင်စီတပ်သား သုံးဦးသေဆုံးကြောင်း BLACK WOLF – ARMY အဖွဲ့က ထုတ်ပြန်ထားသည်။
