ရန်ကုန်မြို့ ကျောက်တံတားမြို့နယ် ပန်းဆိုးတန်းလမ်းမပေါ်ရှိ အခွန်ဦးစီးမှူးရုံးတွင် ယနေ့ (ဇွန်လ ၅) နေ့လယ်က ဗုံးပေါက်ကွဲမှုဖြစ်ပွားရာ ဒုဦးစီးမှူးအပါအ၀င် ၆ ဦးခန့်ထိခိုက်ဒဏ်ရာရရှိခဲ့ကြောင်း အဆိုပါမြို့နယ်နေ ပြည်သူများက ပြောသည်။
ယနေ့ နေ့လယ် ၁၂ နာရီကျော်တွင် ပန်းဆိုးတန်းလမ်းပေါ်ရှိ ပြည်တွင်းအခွန်များဦးစီးဌာန၊ အလယ်အလတ် အခွန်ထမ်းများဆိုင်ရာ အခွန်ဦးစီးမှူးရုံး (၃)လွှာတွင် ဗုံးပေါက်ကွဲမှု ဖြစ်ပွားခဲ့ပြီး ယင်းပေါက်ကွဲမှုကြောင့် ဒုဦးစီးမှူးအပါအ၀င် အမျိုးသမီး ၆ ဦးခန့် ထိခိုက်ဒဏ်ရာရရှိခဲ့ကြောင်း ကျောက်တံတားမြို့နယ်နေ ပြည်သူများက ပြောသည်။
” ၁၂ နာရီလောက်က ဗုံးပေါက်သံတစ်ချက် အကျယ်ကြီးပဲ ကြားလိုက်ရတယ်။ ပြီးမှ အခွန်ရုံး အပေါ်ထပ်မှာ ဗုံးပေါက်မှန်း သိရတာပါ။ အဲ့ရုံးက အသိတစ်ယောက်ပြောတာတော့ ဒုဦးစီးမှူး အမျိုးသမီး ထိတယ်။ နောက်ထပ် ရုံးဝန်ထမ်း ၅ ယောက်လောက် ဗုံးစမှန်တယ်လို့ သိရပါတယ်။ ဆေးရုံကားတွေလဲ တောက်လျှောက်သွားနေတာ တွေ့ရတယ် “ဟု ၎င်းက ပြောသည်။
အဆိုပါ ထိခိုက်ဒဏ်ရာ ရရှိသူများကို ရန်ကုန်ဆေးရုံကြီးသို့ အရေးပေါ် ပို့ဆောင်ခဲ့ကြောင်း နယ်မြေခံ လူမှုကူညီရေးအသင်းများထံမှ သိရသည်။
Public Service Announcement
“ပေါက်ကွဲမှုက ရုံးအတွင်းထဲ ၃ လွှာမှာဖြစ်ခဲ့တာပါ” ဟု ဗိုလ်တထောင်မြို့နယ်တွင် မြို့ပြ ပြောက်ကျားသတင်းများကို ဖော်ပြBotahtaung Scout Channel မှ တာဝန်ရှိသူကပြောသည်။
” ၁၂ နာရီ ၁၅ လောက်စပြီး စခ၊ ရခကားတွေ ဖြစ်စဉ်ဖြစ်ပွါးရာကို စရောက်လာပြီး ပန်းဆိုးတန်းပေါ် ဗန္ဓုလထိပ်ကိုတော့ ဘဲဥတွေလောက်ကပဲ လမ်းပိတ်ခဲ့ပြီး ကုန်သည်ထိပ်ကနေ ကမ်းနားထိပ်ကိုတော့ စခ SC ၊DC ၊ရခ DC၊ ဆလွန်း ပေါင်း ကား ၆ ၊၇ စီးလောက်ကလမ်းတစ်လျှောက် ပိတ်ဆို့မှုတွေရှိခဲ့ပါတယ်” ဟုအထက်ပါတာဝန်ရှိသူကပြောသည်။
ပေါက်ကွဲမှုဖြစ်ပြီးချိန်၌ ရုံးအတွင်းသို့ ဝင်ရောက်မည့်သူများကို အဝင်မခံခဲ့သလို ရုံးအတွင်းရှိ လူများကိုလည်း စစ်ဆေးမှုများပြုလုပ်ခဲ့သည်ဟု ဒေသခံတစ်ဦးကပြောသည်။
မွန်းလွှဲ ၃ နာရီအချိန်ခန့်အထိအခွန်ရုံးအဝင်အထွက်ကိုပိတ်ထားပြီး ယင်းနေရာအနီးအနားရှိ စီစီတီဗီများကို စစ်ဆေးခဲ့ကြောင်း ဒေသခံများကပြောသည်။
ပေါက်ကွဲမှုဖြစ်ပွားပြီးနောက် စစ်ကောင်စီဝင် အများအပြား ရောက်ရှိလာကာ အခွန်ဦးစီးမှူးရုံးရှိရာ ပန်းဆိုးတန်းလမ်းတစ်လျှောက် မဟာဗန္ဓုလလမ်းမှ ကမ်းနားလမ်းအထိ စစ်ကား သုံးစီး၊ ရဲကား တစ်စီးတို့ဖြင့် လမ်းများပိတ်ဆို့၍ စစ်ဆေးမှုများ ပြုလုပ်နေကြောင်း ဒေသခံများကပြောသည်။
ယင်းပေါက်ကွဲမှုနှင့် ပတ်သက်၍ မည်သည့်အဖွဲ့အစည်းက လုပ်ဆောင်သည်ကိုမူ ထုတ်ပြန်ထားခြင်း မရှိသေးပေ။
၂၀၂၁ ဒီဇင်ဘာ ၂၉ရက်ကလည်း အဆိုပါရုံးအနီး ပေါက်ကွဲမှုဖြစ်ပွားခဲ့သေးသည်။
