ဂျာမုန်း/People Spring
ဗမာပြည်သူ့လွတ်မြောက်ရေးတပ်တော်(BPLA) မှ ရဲဘော်တစ်ဦး တိုက်ပွဲအတွင်း ဦးခေါင်းကျည်ထိမှန်ကာ ကျဆုံးခဲ့ကြောင်းသိရသည်။
“ရန်သူ့စခန်းကိုတက်သိမ်းတဲ့အချိန်မှာ ဦးခေါင်းကို ကျည်သင့်ပြီး ကျဆုံးသွားတာဖြစ်ပါတယ်” ဟု BPLA ၏ ကွပ်ကဲရေးမှူး မောင်ဆောင်းခ က ပြောသည်။
ပြီခဲ့သည့် ဇွန်လ ၅ ရက် ညပိုင်းတွင် ကရင်ပြည်နယ် KNU ထိန်းချုပ်ရာ တပ်မဟာ (၅) နယ်မြေအတွင်းရှိ စစ်ကောင်စီနှင့် BGF တို့၏တပ်စခန်းတစ်ခုအား ကရင်အမျိုးသားလွတ်မြောက်ရေးတပ်မတော်(KNLA) နှင့် ဗမာပြည်သူ့လွတ်မြောက်ရေးတပ်တော်(BPLA) ပူးပေါင်းအဖွဲ့တို့ ဝင်ရောက်တိုက်ခိုက်စဉ် ရဲဘော် မင်းချစ်ဦး ကျဆုံးခဲ့ခြင်းဖြစ်သည်။ ယင်းစခန်းသိမ်းတိုက်ပွဲရလဒ်ကိုမူ လက်ရှိအချိန်ထိ ထုတ်ပြန်ခြင်းမရှိသေးပေ။
“ရှေ့တန်းမှာ လိုင်းရတဲ့နေရာကို တောင်တက်ပြီး ၃ နာရီလောက်သွားရတဲ့အတွက် ကျွန်တော့်ဆီကို ရီပို့လေးတစ်စောင်နဲ့ ဓာတ်ပုံတချို့ပဲ ရောက်လာတယ်။ တိုက်ပွဲရလာဒ်အသေးစိတ်ကိုတော့ ပြန်မေးထားတုန်းပါပဲ” ဟု BPLA ၏ ကွပ်ကဲရေးမှူး က ပြောသည်။
Public Service Announcement
အသက် ၂၄ နှစ်အရွယ် ရဲဘော် မင်းချစ်ဦး (ကိုယ်ပိုင်အမှတ် BA – 00047) မှာ အခြေခံစစ်ပညာသင်တန်း အပတ်စဉ် ၂ ကတည်းက တပ်ဖွဲ့ဝင်ဖြစ်ကာ သင်တန်းနည်းပြဆရာတစ်ဦးလည်းဖြစ်သည်။
လွန်ခဲ့သည့် မေလတွင်မှ NCO အကြပ်သင်တန်းပြီးဆုံးချိန် စံပြရဲဘော်ဆု ရရှိခဲ့သူဖြစ်ပြီး ယင်းနောက် ရှေ့တန်းသို့တာဝန်ပေးအပ်ခံရခြင်းဖြစ်သည်။
တော်လှန်ရေးအတွက် ၎င်း၏ ကြိုးစားအားထုတ်မှု၊ ကိုယ်ကျိုးစွန့်အနစ်နာခံမှုနှင့် ကျရာတာဝန်ကို မငြီးမငြူဘဲ ကျေပွန်စွာထမ်းဆောင်နိုင်ခဲ့မှုတို့ကြောင့် တပ်မှူးအချင်းချင်းကပင် လေးစားအသိအမှတ်ပြုရသူတစ်ဦးဖြစ်ကြောင်း BPLA မှ ထုတ်ပြန်ထားသည်။
၎င်းကျဆုံးမှုအတွက် တပ်တော်မှ အဖိုးမဖြတ်နိုင်သောဆုံးရှုံးမှုကြီးတစ်ခုအဖြစ်မှတ်ယူကာ မိသားစုနှင့်ထပ်တူဝမ်းနည်းကြေကွဲကြောင်း ပြောကြားထားသည်။
ဗမာပြည်သူ့လွတ်မြောက်ရေးတပ်တော်(BPLA) တည်ထောင်သည်မှာ ၂ နှစ်ပြည့်သွားခဲ့ပြီဖြစ်ကာ ယင်းကာလအတွင်း ၎င်းတို့၏ရဲဘော် စုစုပေါင်း၇ ဦး ကျဆုံးခဲ့ရပြီးဖြစ်သည်။
