ဖမ်းဆီးအကျဉ်းချခံထားရတဲ့ ဒေါ်အောင်ဆန်းစုကြည်ရဲ့မွေးနေ့မှာကျင်းပတဲ့ ပန်းသပိတ်မှာပါဝင်လို့ဆိုပြီး မန္တလေးမှာ ဆရာဝန် ၁ ဦးအပါအဝင် အမျိုးသား၊အမျိုးသမီး ၂၀ ဦးထက်မနည်းဖမ်းဆီးခံရတယ်လို့ သိရပါတယ်။
ဖမ်းဆီးထားတဲ့သူတွေရဲ့ ဓာတ်ပုံတွေကို စစ်ကောင်စီရဲ့သတင်းတွေကိုဖြန့်ဝေပေးနေတဲ့ တယ်လီဂရမ်ချန်နယ်တွေ ၊ဖေ့ဘွတ်ခ်လူမှုကွန်ရက်တွေမှာတင်ထားတာတွေ့ရပါတယ်။
ဖမ်းဆီးခံရသူတွေဟာ ဒေါ်အောင်ဆန်းစုကြည်ရဲ့မွေးနေ့ကိုလူမှုကွန်ရက်မှာဆုတောင်းခဲ့သူတွေ ၊ ပန်းပန်ထားတဲ့ပုံတင်ထားတဲ့သူတွေနဲ့ မြေပြင်ပန်းသပိတ်မှာပါဝင်သူတွေ လို့ စစ်အုပ်စုဘက်ကဆိုထားပါတယ်။
မြေပြင်သတင်းတွေအရတော့ မြစ်ငယ်မြို့နယ်ထဲက အမျိုးသမီးအများအပြားဖမ်းခံခဲ့ရတယ်လို့သိရပါတယ်။
ဖမ်းခံရသူတွေထဲ မန္တလေးမြို့သစ်မှာ ကိုယ်ပိုင်ဆေးခန်းဖွင့်ထားသူ ဆရာဝန်အမျိုးသားလည်း ပါတယ်လို့ စစ်အုပ်စုက ဆိုထားပါတယ်။
အဲဒီဆရာဝန်အမျိုးသားကိုဒူးထောက် လက်မြှောက်ခိုင်းထားတဲ့ ပုံကိုလည်း စစ်အုပ်စုဘက်က ထုတ်ပြန်ထားပါသေးတယ်။
ပန်းသပိတ်နေ့မှာ စစ်အုပ်စုဟာ ရန်ကုန်မှာလည်း ကင်းလှည့်ပြီး ဖမ်းဆီးမှုတွေပြုလုပ်ခဲ့ပါတယ်။