မြစ်ကြီးနား – ဗန်းမော်လမ်းတွင် စစ်ကောင်စီတပ်ကို KIA တိုက်ခိုက်

ကချင်ပြည်နယ် မြစ်ကြီးနား – ဗန်းမော်လမ်းပိုင်းတွင် စစ်ကောင်စီတပ်ကို ကချင်လွတ်လပ်ရေး တပ်မတော်(KIA)က မိုင်းဖြင့်တိုက်ခိုက်ခဲ့ကြောင်း ကချင်ဒေသ စစ်ရေးသတင်းရင်းမြစ်က ပြောသည်။

ယနေ့ (ဇူလိုင် ၂၅ရက်) နံနက် ၇နာရီ ၄၅မိနစ်ခန့်တွင် တိုက်ခိုက်ခဲ့ခြင်းဖြစ်သည်ဟု ၎င်းကဆိုသည်။

“ဒဘတ်ယန်ဘက်ကလာတဲ့ စစ်ကူစစ်ကြောင်းကို လာကြိုတဲ့ မလန့်ယန်က ထွက်လာတဲ့ စစ်ကြောင်းကို KIA မိုင်းခွဲတိုက်ခိုက်တာပါ။ထိခိုက်ကျဆုံး စာရင်း မသိရပါ”ဟု ကချင်ဒေသ စစ်ရေးသတင်းရင်းမြစ်က ပြောသည်။

အခြားဒေသခံတစ်ဦးကလည်း ဗန်းမော် – မြစ်ကြီးနားလမ်း မလိယန်မှ ဒဘတ်ယန်သို့ လာတဲ့ စစ်ကောင်စီတပ်ကို KIA တပ်မဟာ(၁)က မိုင်းဆွဲတိုက်ခိုက်ခဲ့ရာ စစ်ကောင်စီတပ် သေဆုံးထိခိုက်ရှိခဲ့သည်ဟု ပြောသည်။

Public Service Announcement

ကချင်ပြည်နယ် ဝိုင်းမော်မြို့နယ် နမ့်ဆန်ယာန်ဒေသတွင် ဇူလိုင်လဆန်းမှစ၍ KIAနှင့် စစ်ကောင်စီတပ်တို့ တိုက်ပွဲများဖြစ်ပွားခဲ့ရာ စစ်ကောင်စီတပ်၏ စစ်ကူများကို KIAက ကြားဖြတ်တိုက်ခိုက်မှုမကြာခဏ လုပ်ဆောင်လျက်ရှိသည်။

ထို့ပြင် ဇူလိုင် ၁၆ရက်မှ ၂၃ရက်အတွင်း အဆိုပါဒေသ၌ ခယာတေင်၊ ဘွမ်ရယ်တောင်၊ အောင်ဂျာစခန်း၊ မဒီးယာန်ဒေသရှိ စစ်ကောင်စီတပ်များကို KIAကတိုက်ခိုက်မှုများ လုပ်ဆောင်ခဲ့ရာ စစ်ကောင်စီတပ်က သေဆုံးထိခိုက်မှုများရှိခဲ့သည်ဟု ဒေသခံက ပြောသည်။

စစ်ကောင်စီတပ်ကလည်း နမ့်ဆန်ယာန်ဒေသသို့ စစ်ကူအင်အားဖြည့်တင်းခြင်း၊ လက်နက်ကြီးများဖြင့် KIA ဌာနချုပ်နယ်မြေ လိုင်ဇာဘက်သို့ ပစ်ခတ်ခြင်း၊ နန်ဆန်ယာန်ရွာကို လေကြောင်းတိုက်ခိုက်ခြင်းများ လုပ်ဆောင်ခဲ့သည်။