▪︎စစ်ကောင်စီက ယနေ့ည နမ့်ဆန်ယန်ကို တိုက်လေယာဉ်ဖြင့်ဗုံးကြဲ တိုက်ခိုက်
ကချင်လွတ်လပ်ရေးတပ်မတော်(KIA) ဌာနချုပ် လိုင်ဇာ နှင့်အနီး ဒေသများ၌ ယနေ့ တစ်နေကုန် တိုက်ပွဲပြင်းထန်ခဲ့ပြီး စစ်ကောင်စီတပ် အထိနာခဲ့သည်ဟု ကချင်ဒေသ စစ်ရေးသတင်းရင်းမြစ်ကပြောသည်။
ဇူလိုင် လဆန်းမှ စတင်ခဲ့သည့် နမ့်ဆန်ယာန်ဒေသသို့ စစ်ကောင်စီတပ်က တပ်အင်အား အများအပြားဖြည့်တင်းထားပြီး ယနေ့ နံနက်တွင် ထိုးစစ်ကြီးအသွင်ဖြင့် တိုက်ခိုက်လာရာ KIAက ခုခံတိုက်ခိုက်ခဲ့ခြင်းဖြစ်သည်ဟုသိရသည်။
“ဒီနေ့ တိုက်ပွဲ တစ်နေကုန်ဖြစ်တယ်။ နံနက် ၁၁နာရီကနေ ညနေ ၅နာရီခွဲအထိ။ လိုင်ဇာနားနမ့်ဆန်ယန်၊မဒီးယန်၊ အောင်ဂျာရွာတဝိုက်မှာဖြစ်တာ။ စကစတွေ တော်တော်အထိနာသွားတယ်။ တိုက်ပွဲ တော်တော် ပြင်းထန်တယ်” ဟု ကချင်ဒေသ စစ်ရေးသတင်းရင်းမြစ်က ပြောသည်။
ထိနောက်ယနေ့( ဇူလိုင် ၂၇) ည ၁၀နာရီ ၂၀ခန့်တွင် တံတားဦးလေတပ်မှ တက်လာသည့် တိုက်လေယာဉ် ၂စီးသည်နမ့်ဆန်ယန်ကိုဗုံးကြဲ တိုက်ခိုက်ခဲ့သည်ဟု ဒေသခံအချို့ကပြောသည်။ ထိုသို့လေကြောင်း တိုက်ခိုက်မှုကြောင့် ထိခိုက်မှု ရှိ၊မရှိကိုမူ People’s Spring က စုံစမ်းဆဲဖြစ်ပါသည်။
Public Service Announcement
စစ်ကောင်စီလေကြောင်းစောင့်ကြည့်ရေး ချန်နယ်ဖြစ်သော EAR ၏အချက်အလက်များအရ တံတားဦးလေတပ်မှ ဂျက်တိုက်လေယာဥ် ၂ စီးမှာ ဇူလိုင် ၂၇ ရက် ည ၉ နာရီ ၄၃ မိနစ်နှင့် ၄၅ မိနစ်တွင်အသီးသီး တက်လာပြီး ကချင်ပြည်နယ်သို့ ဗုံးသွားကျဲခဲ့သည်။ထိုနောက် ည ၁၀ နာရီ ၅၈ မိနစ်နှင့်ည ၁၁ နာရီ ၅ မိနစ်တွင် ပြန်လည်ဆင်းသက် သည်ကိုတွေ့ရသည်။
စစ်ကောင်စီတပ်သည် ဇူလိုင် ၂၁ ရက်ညကလည်း နမ့်ဆန်ယန်ရွာကို တိုက်လေယာဉ်ဖြင့် ဗုံးကြဲတိုက်ခိုက်ခဲ့သည်။ ထိုစဉ်က လူထိခိုက်မှုမရှိသော်လည်း နွား အချို့သေဆုံးကာ နမ်ဆန်ယန်ရွာ အုပ်ချုပ်ရေးမှူးရုံးပျက်စီးခဲ့သည်။
လက်တလောစစ်ရေးအခြေအနေများနှင့်ပတ်သက်ပြီး KIA သတင်းပြန်ကြားရေးဌာန တာဝန်ခံ ဗိုလ်မှူးကြီး နော်ဘူအား ယနေ့ညနေပိုင်း၌ဆက်သွယ်မေးမြန်းရန်ကြိုးစားသော်လည်း အဆက်အသွယ်မရသေးပေ။
