မန္တလေးတိုင်း၊ နွားထိုးကြီးမြို့နယ်ရှိ မန္တလေး – မြင်းခြံလမ်းပိုင်းတွင် စစ်ကောင်စီယာဥ်တန်းအား တိုက်ခိုက်ခဲ့ရာ စစ်ကားတစ်စီးပျက်စီးကြောင်း မြင်းခြံခရိုင်အမှတ် (၄)တပ်ရင်း Natogyi People Defence Force အဖွဲ့ ပြန်ကြားရေးတာဝန်ခံက ပြောသည်။
ယမန်နေ့(သြဂုတ် ၉ ရက်) နံနက် ၈နာရီခန့်က နွားထိုးကြီးမြို့နှင့် ၁၀မိုင်ခန့်အကွာ မင်းစုံတောင်ရှောက်တောရိုးကွေ့တွင် နွားထိုးကြီးမြို့နယ်မှ မောင်းနှင်လာသော အင်အား ၄၀ကျော်ပါ စစ်ကောင်စီ ယာဥ်သုံးစီးအား မိုင်းဆွဲတိုက်ခိုက်ခဲ့ကြောင်း နွားထိုးကြီး PDFအဖွဲ့၏ ပြန်ကြားရေးတာဝန်ခံက ပြောသည်။
မျက်မြင်ပြည်သူများ၏အဆိုအရ ယာဥ်ပေါ်ပါ စစ်ကောင်စီတပ်သားများအနက် လေးသေဆုံးပြီး ဒဏ်ရာရသူ ၁၀ဦးအထက်ရှိနိုင်သည်ဟု နွားထိုးကြီး PDFက ခန့်မှန်းသည်။ သို့သော် စစ်အုပ်စု၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
“နှစ်စီးကတော့ ထိခိုက်ပါတယ်။ တစ်စီးကတော့ မီးလောင်တယ်လို့ သိရပါတယ်”ဟု နွားထိုးကြီး PDF အဖွဲ့၏ ပြန်ကြားရေးတာဝန်ခံက ပြောသည်။
Public Service Announcement
ထိခိုက်သေဆုံးသူများအား စစ်ကောင်စီတပ်က လာရောက်သယ်ယူသွားသည်ဟု ဆိုသည်။
မန္တလေး – မြင်းခြံလမ်း၊ နွားထိုးကြီး – မြစ်သားလမ်း၊ နွားထိုးကြီး – တောင်သာလမ်း၊ နွားထိုးကြီး – မလှိုင်လမ်း၊ နွားထိုးကြီး – မြို့သာလမ်းတို့တွင် မိုင်းကွင်းများရှိ၍ ခရီးသွားပြည်သူများအနေဖြင့် ထုတ်ပြန်ထားသည့် သတိပေးချက်များကို အထူးလိုက်နာကြရန် နွားထိုးကြီး PDF အဖွဲ့က သတိပေးသည်။
ပြီးခဲ့သည့် သြဂုတ် ၄ ရက်ကလည်း နွားထိုးကြီးမြို့နယ် ဖောင်ချဉ်းကျေးရွာရှိ စစ်ကောင်စီတပ်အား ဒေသကာကွယ်ရေးအဖွဲ့များက နှစ်ကြိမ်တိုက်ခိုက်ခဲ့သည်။
