အနောက်တောင် မုတ်သုံလေ မကြာမီ ဆုတ်ခွာနိုင်သော်လည်း လာမည့် တစ်ပတ်အတွင်း ကရင်နှင့် မွန်ပြည်နယ်အပါအဝင် တိုင်းနှင့်ပြည်နယ် ငါးခု၌နောက်တစ်ကြိမ် မိုးကောင်းနိုင်သေး၍ ရေကြီးမှုနှင့် မြေပြိုမှုဘေး ထပ်မံသတိပြုရန် အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး၀န်ကြီးဌာန (MOHADM)က သတိပေးသည်။
သြဂုတ်လ ၁၄ ရက်နေ့မှ ဩဂုတ်လ ၂၀ ရက်နေ့အထိ ပဲခူးတိုင်း၊ စစ်ကိုင်းတိုင်းအထက်ပိုင်း၊ ကချင်ပြည်နယ်၊ မွန်ပြည်နယ်နှင့် တနင်္သာရီတိုင်းတို့တွင် နောက်တစ်ကြိမ်ထပ်မံ မိုးသည်းထန်နိုင်သည်ဟု ဟု MOHADM က ထုတ်ပြန်ထားသည်။
“မိုးများမှုကြောင့် နောက်ဆက်တွဲဆိုးကျိုးများ ဖြစ်သော ရေကြီးရေလျှံ၊ မြေပြိုဘေးများအထူးသတိထားပြင်ဆင်နေထိုင်သင့်ကြောင်း သတိပေးထားသည်။
မိုးလယ်ကာလသည် ယခုသြဂုတ်လကုန်တွင် ပြီးဆုံးမည်ဖြစ်ပြီး လာမည့်စက်တင်ဘာလ (၁)ရက်နေ့မှစတင်၍ အနောက်တောင်မုတ်သုံလေ မြန်မာနိုင်ငံ တနိုင်ငံလုံးမှ ပြန်လည်ဆုတ်ခွာနိုင်သည်ဟုလည်း အသိပေးထားသည်။
Public Service Announcement
ယခုနောက်ပိုင်းနှစ်များတွင်မုတ်သုံအဝင်နောက်ကျပြီး အထွက်စောလာနေသည်။ ယခင်က မုတ်သုံလေသည် မေလ၁၅ ရက်မှ စတင်ဝင်ရောက်ပြီး အောက်တိုဘာ ဒုတိယပါတ်မှထွက်ခွာလေရှိသော်လည်း နောက်ပိုင်းတွင် ဇွန်လဆန်းတွင်ဝင်ရောက်၍ စက်တင်ဘာ ၁၅ ရက်ဝန်းကျင်တွင်ထွက်ခွာလေ့ရှိသည်။ထိုကြောင့် စက်တင်ဘာ ၁ရက်တွင် မုတ်သုတ်လေ ဆုတ်ခွာသွားပါက ယခုနှစ် မုတ်သုံဆုတ်ခွာချိန် ပိုစောလာခြင်းဖြစ်သည်။
ဇူလိုင်လနှင့် ဩဂုတ်လဆန်းက မြန်မာနိုင်ငံ ဒေသအနှံအပြားတွင် မိုးကောင်းပြီးနောက် မွန်ပြည်နယ်၊ကရင်ပြည်နယ်နှင့် ပဲခူးတိုင်းတွင် ရေဘေးကြုံတွေ့ခဲ့ပြီး ထိခိုက်ပျက်စီးမှုများ ရှိခဲ့သည်။ ယခုအခါ MOHADM က ရေဘေးထပ်မံသတိပေးထားခြင်းဖြစ်သည်။
