မြန်မာစစ်ကောင်စီလက်အောက်ခံ ဘဏ် ၂ ခု အပ်နှံထားတဲ့ ဒေါ်လာ ၁ သန်းကျော်ကို ဘင်္ဂလားဒေ့ရှ်ဘဏ်က ထုတ်ယူခွင့်မပေးတော့ဘဲ ပိတ်ဆို့လိုက်တယ်လို့ ဘင်္ဂလားဒေ့ရှ်သတင်းဌာန ဒါကာထရီဗျုးက ဖော်ပြလာပါတယ်။
စီးပွားရေးဒဏ်ခတ်ပိတ်ဆို့ထားတဲ့မြန်မာ့ရင်းနှီးမြှုပ်နှံမှုနဲ့ကူသန်းရောင်းဝယ်ရေးဘဏ် (MICB) ၊ မြန်မာ့နိုင်ငံခြားကုန်သွယ်မှုဘဏ်(MFTB ) တို့နဲ့ ဆက်ဆံတာရပ်တန့်ဖို့ ဒါကာမြို့မှာရှိတဲ့ အမေရိကန်သံရုံးဘက်က ဖိအားပေးပြီးနောက်မှာ ဘင်္ဂလားဒေ့ရှ်ရဲ့ Sonali ဘဏ်က အကောင့်တွေပိတ်လိုက်တာပါ။
Sonali ဘဏ်ဟာ မြန်မာ − ဘင်္ဂလားဒေ့ရှ် ၂နိုင်ငံကြား ကုန်သွယ်ရေး ငွေပေးချေမှုမှာ ကြားခံအဖြစ်ဆောင်ရွက်ပေးရတဲ့ဘဏ်လို့သိရပါတယ်။
Public Service Announcement
အဲဒီဘဏ်မှာ မြန်မာ စစ်တပ်ရဲ့ MICB နဲ့ MFTB တို့ရဲ့ ဘဏ်စာရင်းအကောင့်ဖွင့်ထားပြီး အမေရိကန် ဒေါ်လာ ၁ သန်းကျော် ရှိနေတယ်လို့ ဒါကာထရီဗျုးက ဆိုပါတယ်။
အခုတော့အဲဒီငွေစာရင်းအကောင့်တွေကို ဘဏ်ဘက်က ပိတ်ဆို့ထားလိုက်ပြီဖြစ်တဲ့အတွက် ငွေတွေကို ပြန်ထုတ်တာ ၊ လွှဲပြောင်းတာမျိုး လုပ်ဆောင်လို့မရတော့ဘူးလို့ ဒါကာထရီဗျုးရဲ့ဖော်ပြချက်အရသိရပါတယ်။
ပြီးခဲ့တဲ့ ဇွန်လအတွင်းမှာ မြန်မာစစ်တပ်ရဲ့ MFTB ဘဏ်နဲ့ MICB ဘဏ်တို့ကိုအမေရိကန် အစိုးရက ပိတ်ဆို့အရေးယူလိုက်တာပါ။
အဲဒီဘဏ် ၂ ခု ဟာ စစ်တပ်ရဲ့ နိုင်ငံခြားငွေ စီးဆင်းရာ အဓိက ရင်းမြစ်ဖြစ်လို့ အရေးယူရတာလို့အမေရိကန်က ကြေညာခဲ့ဖူးပါတယ်။
ပိတ်ဆို့အရေးယူပြီး သိပ်မကြာခင်မှာပဲ ဘင်္ဂလာဒေ့ရှ်နိုင်ငံခြားရေးဝန်ကြီးဌာနဆီ ဒါကာမြို့မှာရှိတဲ့ အမေရိကန် သံရုံးက MFTB နဲ့ MICB ဘဏ်အကောင့်တွေကိုပိတ်ပစ်ဖို့ ဖိအားပေးခဲ့တာပါ။
ဓာတ်ပုံ − ဒါကာထရီဗျုး
