စစ်ကိုင်းတိုင်း၊ ချောင်းဦးမြို့နယ်၊ ဆင်ဖြူရှင်တံတားမှ အထက်သို့ဆန်တက်လာသော စစ်သင်္ဘောအုပ်စုက မြစ်ဘေးရှိ ကျေးရွာများအား ပစ်ခတ်နေ၍ ဒေသခံများမှာ ထွက်ပြေးတိမ်းရှောင်နေကြောင်း သတင်းရရှိသည်။
ယနေ့ (စက်တင်ဘာ ၃၀ရက်) နံနက် ၈နာရီ ၄၅ မိနစ်ခန့်က စစ်ကောင်စီတပ်သားနှင့် ပျူစောထီးအင်အား ၁၀၀ခန့် တင်ဆောင်လာသော စစ်သင်္ဘောတစ်စီးနှင့် ဖလက်ခွံရေယာဥ် ၈စီးသည် ဆင်ဖြူရှင်တံတားမှ ချင်းတွင်းမြစ်ကြောင်းအတိုင်း အထက်သို့ဆန်တက်လာခဲ့ကြောင်း မုံရွာ – အမြင့်လမ်း သတင်းမှန်ပြန်ကြားရေးအဖွဲ့ကလည်း ပြောသည်။
အဆိုပါ ရေယာဥ်များပေါ်ပါ စစ်ကောင်င်္စတပ်က လက်နက်ကြီး၊ ငယ်များဖြင့် ပစ်ခတ်နေ၍ ပြည်သူများမှာ ထွက်ပြေးတိမ်းရှောင်နေရကြောင်း ဒေသခံများက ပြောသည်။
“တအားကို ပစ်တယ်။ လေးစီးမြောက်က အမြှောက်ပါတယ်။ လတ်နတ်ကြီးနဲ့ပစ်ပြီး ဆန်လာတာပါ။”ဟု ဒေသခံတစ်ဦးက ပြောသည်။
ရေယာဥ်ပေါ်ပါ စစ်ကောင်စီတပ်သည် ချောင်းဦးမြို့နယ်၊ တောကျောင်းကြီးကျေးရွာအတွင်း ဝင်ရောက် ဖျက်ဆီးသွားကြောင်း သိရသည်။
Public Service Announcement
ရေယာဥ်အုပ်စုသည် မွန်းလွဲပိုင်းတွင် မုံရွာမြို့သို့ ရောက်ရှိလာခဲ့ကြောင်း အညာပစ်တိုင်းထောင်လေးများအဖွဲ့က ပြောသည်။
လမ်းတလျှောက်တွင် စစ်ကောင်စီတပ်ပစ်ခတ်မှုကြောင့် ထိခိုက်မှုများရှိနိုင်ပြီး အသေးစိတ်မသိရသေးဟု ဒေသတွင်းသတင်းရင်းမြစ်များက ဆိုသည်။
ထို့ကြောင့် မြစ်ကမ်းဘေးနေပြည်သူများအနေဖြင့် ဂရုစိုက်နေထိုင်ရန်ကြနှင့် ခိုင်မာသော အကာအကွယ်များမရှိပါက ဘေးလွတ်ရာသို့ ခေတ္တရွှေ့ပြောင်းနေထိုင်ကြပါရန် ဒေသတွင်းတော်လှန်ရေးအင်အားစုများက သတိပေးထားသည်။
စက်တင်ဘာ ၂၈ ရက် နံနက်ပိုင်းကလည်း အလုံမင်းဒေါင့်ဆိပ်ကမ်းမှစုန်ဆင်းလာသော စစ်ကောင်စီ၏ ရေယာဥ် ၁၅ စီးအား ဒေသတွင်း တော်လှန်ရေးအင်အားစုများက ပစ်ခတ်တိုက်ခိုက်ခဲ့သေးသည်။
