ကျော်ဇော/People’s Spring
ပဲခူးတိုင်း၊ ညောင်လေးပင်မြို့နယ်၊ ပုဇွန်မြောင်းကျေးရွာတွင် တပ်စွဲထားသော စစ်ကောင်စီတပ်က ပစ်ခတ်သည့် လက်နက်ကြီးကျည် နေအိမ်ပေါ် ကျရောက်ပေါက်ကွဲကာ အမျိုးသမီးနှစ်ဦး ထိခိုက်ဒဏ်ရာရသွားကြောင်း နွေဦးစစ်သည်တော်များစစ်ကြောင်း (Spring Warriors Column)က ထုတ်ပြန် သည်။
အောက်တိုဘာ ၄ရက် ည ၈ နာရီခွဲခန့်က ပုဇွန်မြောင်းကျေးရွာထိပ် တာပျက်တံတားတွင် အထိုင်ချထားသော စစ်ကောင်စီတပ်က လက်နက်ကြီးဖြင့် ရမ်းသမ်းပစ်ခတ်ရာ ရေဖြူကန်ကျေးရွာတောင်ပိုင်းရှိ နေအိမ်တစ် လုံးပေါ်ကျရောက်ပေါက်ကွဲခဲ့သည်ဟု ဆိုသည်။
ထို့ကြောင့် နေအိမ်ပိုင်ရှင် (၇၅)နှစ်အရွယ် ဒေါ်ကွန် မှာ ကျောကုန်းလက်နက်ကြီးစမှန် ဒဏ်ရာရကာ သမီးဖြစ်သူ (၅၀) အရွယ် ဒေါ်သီတာဝင်းမှာလည်း ရင်ဘတ်နှင့် လက်တို့တွင် ထိခိုက်ဒဏ် ရာများရရှိခဲ့ကြောင်း နွေဦးစစ်သည်တော်များစစ်ကြောင်း၏ ထုတ်ပြန်ချက်တွင် ဖော်ပြသည်။
“လက်နက်ကြီးကြောင့်ပါ။ ပြည်သူထိခိုက်တယ်လို့တော့ ကြားတယ်။ ဒါပေမဲ့ ကျနော်တို့ (မျက်မြင်)မတွေ့လိုက်ဘူး”ဟု မြေပြင်တော်လှန်ရေးရဲဘော်တစ်ဦးက People’s Spring သို့ ပြောသည်။
Public Service Announcement
နေအိမ်ပေါ် လက်နက်ကြီးကျရောက်ပေါက်ကွဲ၍ ကျည်စထိမှန်ဒဏ်ရာများရရှိခဲ့သော ဒေါ်ကွန်တို့သားအမိ၏အခြေအနေအား စစ်ကောင်စီတပ်က မည်သူ့ကိုမျှ ကြည့်ခွင့်၊ မေးမြန်းခွင့်မပေးဘဲ ညောင်လေးပင်ဆေးရုံသို့ ပို့ထားကြောင်း နွေဦးစစ်သည်တော်များစစ်ကြောင်းက အသိပေးသည်။
ညောင်လေးပင်မြို့နယ်အခြေစိုက် စစ်ကောင်စီလက်အောက်ခံ ခမရ(၂၀)၊ ခလရ (၂၆၄)စသည့် တပ်များမှနေ၍ တာပြတ်တံတား၊ ပေါက်တော၊ ပိန်းဇလုပ်၊ တော်ဝိ စသည့်ကျေးရွာအပါအဝင် ကျေးရွာအချို့သို့ လက်နက်ကြီးများဖြင့် နေ့စဥ်နီးပါး ရမ်းသမ်းပစ်ခတ်လေ့ရှိကြောင်း တော်လှန်ရေးရဲဘော်များနှင့် ဒေသခံပြည်သူများထံမှ စုံစမ်းသိရသည်။
အလားတူ အောက်တိုဘာ ၂ ရက်နှင့် ၃ ရက်များတွင် ညောင်လေးပင်နယ် ပုဇွန်မြောင်းကျေးရွာသို့ရောက်ရှိနေသော စစ်ကောင်စီတပ်က ပုဇွန်မြောင်းရွာအား နှစ်ရက်ဆက်မီးရှို့ဖျက်ဆီးခဲ့ရာ နေအိမ်၆၀ကျော် မီးလောင်ဆုံး ရှုံးခဲ့ကြောင်း တော်လှန်ရေးတပ်ဖွဲ့များက ထုတ်ပြန်ထားသည်။
