▪︎မလေးရှားသွားအလုပ်လုပ်ဖို့အတွက် ပွဲစားကိုတစ်ယောက် ဘတ်တစ်သိန်းနှစ်သောင်းစီပေးခဲ့ရပြီး ပွဲစားကပက်စ်ပို့စာအုပ်ကိုယူသွားပြီးတံဆိပ်တုံးထုလာတာဖြစ်
နိုင်ငံကူးလက်မှတ်(ပတ်စ်ပို့)မှာ တံဆိပ်တုံး အတုထုပြီး လိမ်လည် ဝင်ရောက်လာတယ်ဆိုတဲ့ စွပ်စွဲချက်နဲ့ မြန်မာအယောက် ၂၀ ကို ထိုင်းအာဏာပိုင်တွေက ဖမ်းဆီးခဲ့ပါတယ်။
ပြီးခဲ့တဲ့ သီတင်းပတ်ကုန်က ဟတ်ရိုင်ဒေသမှာ အဖမ်းခံရသူတွေဟာ အမျိုးသား ၁၆ ဦးနဲ့ အမျိုးသမီး ၄ ဦးတို့ ဖြစ်ပါတယ်။ သူတို့ရဲ့ ပတ်စ်ပို့တွေကို စစ်ဆေးတဲ့အခါ သုဝဏ္ဏဘူမိ လေဆိပ်ကနေ ဝင်ရောက်လာတယ်ဆိုတဲ့ တံဆိပ်တုံး အတုတွေ ထုထားတာ တွေ့ရှိခဲ့ကြောင်း လူဝင်မှု ကြီးကြပ်ရေး အရာရှိတွေက ပြောပါတယ်။
နေ့လယ်ပိုင်းက ဆွန်ခလာမှာရှိတဲ့ ဟတ်ရိုင်မြို့က အဝေးပြေးလမ်း တစ်နေရာမှာ စုဝေးပြီး ထိုင်နေသူတွေကို လူဝင်မှု ကြီးကြပ်ရေး ကင်းလှည့် အရာရှိတွေက တွေ့ရှိလို့ စစ်ဆေး မေးမြန်းရင်း ပြဿနာ တက်ခဲ့တာလို့ ဆိုပါတယ်။
နောက်ဆက်တွဲ စုံစမ်းမှုတွေအရ မြန်မာနိုင်ငံသားတွေဟာမလေးရှားမှာ အလုပ်သွားလုပ်ဖို့အတွက် ပွဲစားတွေဆီ တစ်ယောက်ကို ဘတ် တစ်သိန်းနှစ်သောင်းစီပေးထားရတယ်လို့ ထွက်ဆိုခဲ့ကြောင်း သိရပါတယ်။ ပွဲစားတွေက သူတို့ရဲ့ ပတ်စ်ပို့တွေကို ယူသွားပြီး ထိုင်းမှာ ပြည်ဝင်ခွင့် တံဆိပ်တုံး ထုပေးထားတာလို့လည်း လတ်တလော ထိန်းသိမ်းခံထားရသူတွေက ပြောပြကြပါတယ်။
Public Service Announcement
သူတို့ဟာ လမ်းပြတစ်ဦးရဲ့ အကူအညီနဲ့ ထိုင်းနယ်စပ်ကို ကန်ချနာဘူရီကနေ ဖြတ်ကျော် ဝင်ရောက်လာပြီး အဲဒီကနေတဆင့် ဘန်ကောက်ထိ ရောက်လာပြီး တည်းခို နေထိုင်ခဲ့တယ်လို့လည်း ဆိုပါတယ်။ အဲဒီနောက် ပြီးခဲ့တဲ့ သီတင်းပတ်မှာ ဘတ်စ်ကားစီးပြီး ဟတ်ရိုင်ကို ထွက်ခွာလာပြီး မလေးရှား နယ်စပ်ဆီ ခရီးဆက်မယ့် အချိန်မှာ အဖမ်းခံခဲ့ကြရတာပါ။
သူတို့ကို လူဝင်မှု ကြီးကြပ်ရေး ဥပဒေတွေအရ တရားမဝင် ခိုးဝင်မှု၊ တံဆိပ်တုံး အတုပြုလုပ်မှုတွေနဲ့ စွဲချက်တင်ဖို့ စီစဉ်နေကြောင်း အာဏာပိုင်တွေက ပြောကြားထားပါတယ်။
