▪︎လူသားချင်းစာနာမှု ထောက်ပံ့ရေး အကျပ်အတည်းတွေ ပိုဆိုးလာနိုင်ကြောင်း UNOCHAဆို
ရှမ်းပြည်နယ်မြောက်ပိုင်းမှာ တိုက်ပွဲတွေအပြင်းအထန်ဖြစ်ပွားခဲ့တာကြောင့် ကုလသမဂ္ဂ လူသားချင်းစာနာထောက်ထားမှုဆိုင်ရာ ညှိနှိုင်းရေးရုံး(UNOCHA)က အောက်တိုဘာ ၃၀ ထိ စုဆောင်း ရရှိထားတဲ့ အချက်အလက်တွေအရ ဒေသခံပြည်သူ ၆၂၀၀ ကျော်ဟာထွက်ပြေးတိမ်းရှောင်နေရတယ် လို့ UNOCHA ကထုတ်ပြန်ပါတယ်။
ဒါအပြင် အိမ်နီးချင်းတရုတ်နိုင်ငံကို ထွက်ပြေးတိမ်းရှောင်နေတဲ့ ပြည်သူရာနဲ့ချီ ရှိနိုင်တယ်လို့ ဆိုပါတယ်။
ညီနောင် မဟာမိတ်သုံးဖွဲ့ ဖြစ်တဲ့ MNDAA ၊ TNLA ၊ AA တို့က အောက်တိုဘာ ၂၇ ရက်မနက်ကစပြီး ရှမ်းပြည်နယ် မြောက်ပိုင်း အခြေစိုက် စစ်ကောင်စီ တပ်စခန်းတွေနဲ့ ရဲစခန်းတွေကို ၁၀၂၇ စစ်ဆင်ရေး အဖြစ်ထိုးစစ်ဆင် တိုက်ခိုက် သိမ်းယူရာက ဒေသတွင်းမှာ တိုက်ပွဲတွေ ပြင်းပြင်းထန်ထန် ဖြစ်လာပါတယ်။ လက်ရှိ အခြေအနေအရ ချင်းရွှေဟော်၊ သိန္နီ၊ ကွတ်ခိုင်၊ ကျောက်မဲ၊ လားရှိုး၊ လောက်ကိုင်၊ နမ့်ခန်း နဲ့ မူဆယ်စတဲ့ ဒေသတွေမှာ တိုက်ပွဲတွေ အဓိက ပြင်းထန်နေပြီး အရပ်သား အသေအပျောက် သတင်းတွေ ကြားနေရသလို ဒေသခံတွေ ထောင်နဲ့ချီ စစ်ဘေး ရှောင်နေရတယ်လို့ UNOCHAက ဆိုပါတယ်။
တိုက်ပွဲတွေကြောင့် နေရပ်စွန့်ခွာထွက်ပြေသူတွေဟာသစ်တောတွေ ၊ဘာသာရေး အဆောက်အအုံတွေကိုထွက်ပြေး တိမ်းရှောင် ခိုလှုံနေကြသလို၊ တရုတ်နိုင်ငံဖက်ခြမ်းထိ သွားရောက် ခိုလှုံနေသူ ရာနဲ့ချီ ရှိတယ်လို့လည်း သိရပါတယ်။
Public Service Announcement
စစ်ပွဲတွေကြောင့် လားရှိုးနဲ့ ရှမ်းပြည်မြောက်ပိုင်း ဒေသတွေ ဆက်စပ်ထားတဲ့ အဓိက လမ်းမတွေလည်း ပိတ်ကုန်ပြီး ကုန်စည် စီးဆင်းမှုတွေ ရပ်တန့်ကုန်သလို မိုဘိုင်းဖုန်းကွန်ရက် ဆက်သွယ်မှုတွေလည်း ပြတ်တောက်ကုန်တဲ့အတွက် ဒေသခံ လူ့အဖွဲ့အစည်းတွေဆီ လူသားချင်း စာနာမှု အထောက်အပံ့တွေ ပေးပို့မယ့် လုပ်ငန်းစဉ်တွေမှာ ထိခိုက် ကြန့်ကြာမှုတွေ ရှိလာပါတယ်။ လားရှိုး လေဆိပ်ကလည်း နိုဝင်ဘာ ၃ ရက်ထက် ပိုစောပြီး ပြန်ဖွင့်နိုင်မယ့် အခြေအနေ မရှိသေးပါဘူး။
လမ်းတွေပိတ်သွားလို့ ရောက်ရာမြို့ရွာတွေမှာပဲ ပိတ်မိနေတဲ့ ပြည်သူတွေလည်းရှိနေသေးပြီး လမ်းတွေပြန်ဖွင့်မယ့်ရက်ကိုစောင့်နေကြတယ်လို့ ဒေသခံအချို့က ပြောပါတယ်။
လောလောဆယ်တော့ စစ်ရှောင်တွေဟာ လက်ခံထားတဲ့ လူ့အဖွဲ့အစည်းတွေနဲ့ ပုဂ္ဂလိက အလှူရှင်တွေကိုပဲ အဓိက မှီခို အားကိုးနေရပြီး UNOCHAနဲ့ မိတ်ဖက် အဖွဲ့အစည်းတွေကတော့ အခြေအနေတွေ ပြန်လည် တည်ငြိမ်လာပြီး လုံခြုံရေးအရ ပိုမို စိတ်ချလာရတာနဲ့ ရှမ်းပြည်နယ် မြောက်ပိုင်းကို လူသားချင်း စာနာမှု အထောက်အပံ့တွေ ပို့ဆောင်နိုင်ဖို့ ပြင်ဆင်ထားတယ်လို့ ဆိုပါတယ်။
ရှမ်းပြည်နယ် မြောက်ပိုင်းမှာ တိုက်ပွဲတွေ စတင်တဲ့ နေ့မှာပဲ ကရင်ပြည်နယ်၊ ကော့ကရိတ် မြို့နယ်မှာလည်း ကရင်အမျိုးသား လွတ်မြောက်ရေး တပ်မတော် (KNLA)နဲ့ ပြည်သူ့ကာကွယ်ရေး တပ်မတော် (PDF)တို့က စစ်ကောင်စီကို ပူးပေါင်း ထိုးစစ်ဆင်ခဲ့ပါတယ်။ နိုင်ငံ အရှေ့တောင်ပိုင်းမှာ ဖြစ်ပွားလာတဲ့ အဲဒီ ပဋိပက္ခအတွင်း စစ်ရှောင်ရတဲ့ ပြည်သူတွေရဲ့ အခြေအနေကိုလည်း ဆန်းစစ်နေဆဲလို့ UNOCHAက ထုတ်ပြန်ပါတယ်။
လက်ရှိ အချိန်ထိတော့ ပဋိပက္ခ နယ်မြေတွေမှာ တိုးပွားလာတဲ့ စစ်ရှောင်ပြည်သူ အရေအတွက်ကို တိတိကျကျ အတည်ပြုနိုင်ဖို့ ခက်ခဲနေပြီး နောက်ထပ် ထပ်တိုးလာနိုင်ခြေတွေ ရှိနေဆဲလို့ UNOCHAက ခန့်မှန်းထားပါတယ်။
ညီနောင်မဟာမိတ် သုံးဖွဲ့ထဲမှာ အပါအဝင်ဖြစ်တဲ့ ရက္ခိုင့်တပ်တော် (AA)ဟာ ရခိုင်ပြည်နယ်မှာ စစ်ကောင်စီနဲ့ မနှစ်ကတည်းက အပစ်အခတ် ရပ်စဲထားပေမယ့် လက်ရှိ အခြေအနေအရ ရခိုင်အပါအဝင် မြန်မာတစ်နိုင်ငံလုံးရဲ့ စစ်ရေး အလှည့်အပြောင်း အခြေအနေတွေကို အလေးထား စောင့်ကြည့်ဖို့ လိုအပ်ကြောင်းလည်း UNOCHAက မှတ်ချက်ပေးသွားခဲ့ပါတယ်။
လက်ရှိ ဖြစ်ပွားနေတဲ့ တိုက်ပွဲတွေကြောင့် အရင်ကတည်းက ရန်ပုံငွေ အကျပ်အတည်း ပြဿနာတွေ ရှိနေခဲ့တဲ့ မြန်မာ့ လူသားချင်း စာနာမှု ထောက်ပံ့ရေး ကဏ္ဍအတွက် ဝန်ထုပ်ဝန်ပိုး ပိုကြီးမားလာကြောင်း UNOCHAက ဆိုပါတယ်။
