စစ်ကောင်စီ လက်အောက်ခံ ရဲများ စခန်းစွန့် ထွက်ပြေးသွားသည့် ဂန့်ဂေါမြို့နယ် တောင်ခင်ရန်း ရဲစခန်းတွင် မိုင်းများထောင်ခဲ့၍ ဝင်ရောက်ရှင်းလင်းလျက်ရှိကြောင်း မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး(ABSDF)စစ်ကြောင်း (၃)ကသတင်းထုတ်ပြန်သည်။
ဂန့်ဂေါမြို့နယ် မင်းရွာ ရဲစခန်းကို ABSDFနှင့် ဒေသခံ PDFများ ပူးပေါင်း တိုက်ခိုက်သိမ်းပိုက်လိုက်ခြင်းကြောင့် တောင်ခင်ရန်းရဲစခန်းမှ စစ်ကောင်စီလက်အောက်ခံရဲများသည် နိုဝင်ဘာလ ၄ ရက်နေ့ တွင် ၎င်းတို့ စခန်းကို စွန့်ခွာထွက်ပြေးသွားကြခြင်းဖြစ်သည်။
ထိုကြောင့် တောင်ခင်ရန်း ရဲစခန်းကို မိမိတို့ ABSDF အမှတ် ၁၂ တပ်ရင်း နှင့် မဟာမိတ် PDF တပ်ရင်းများမှဝင်ရောက်ရှင်းလင်းလျှက်ရှိရာ စစ်ကောင်စီတပ်ဖွဲ့ဝင်များက မြေမြုတ်မိုင်းများ ထောင်ထားခဲ့၍ ABSDF မှ မိုင်းကျွမ်းကျင်သူ ရဲဘော်များမှ မဟာမိတ်များနှင့် ပူးပေါင်း၍ မိုင်းများ လက်လံရှင်းလင်းပေးနေရဆဲဖြစ်ကြောင်း ထုတ်ပြန်သည်။
တောင်းခင်ရန်း ရဲစခန်းအတွင်း ရန်သူထောင်ခဲ့သည့် မိုင်းများအားရှင်းလင်းပေးနေသည့် ရဲဘော်များအား ABSDF အမှတ်(၃) စစ်ကြောင်း ၊ စစ်ကြောင်းမှူး ရဲဘော်မင်းဌေး က သွားရောက်အားပေးခဲ့သည်ဟုလည်း အသိပေးထားသည်။
Public Service Announcement
တောင်ခင်ရန်းရဲစခန်း ကို ABSDF နှင့် ဂန့်ဂေါခရိုင် PDF တပ်ရင်း (၁) ၊ တပ်ရင်း (၁၂) ၊ တပ်ရင်း (၁၄)၊ ပ.က.ဖ များက ၂၀၂၃ ခုနှစ် မေလကုန်မှ စတင်၍ အနီးကပ် (မီတာ ၂၀၀ ကျော်အတွင်း ) ဝိုင်းဝန်းပိတ်ဆို့ထားကြောင်း၊ နိုဝင်ဘာ ၂ ရက်၌လည်း အနီးကပ်တိုက်ပွဲများ ဖြစ်ပွားခဲ့ရာ စစ်ကောင်စီဘက်က ထိခိုက်မှုများရှိခဲ့ကြောင်း အသိပေးထုတ်ပြန်သည်။
ABSDFနှင့် PDF ပူးပေါင်းတပ်သည် မင်းရွာ ရဲစခန်းအား သိမ်းပိုက်စဉ် စစ်ကောင်စီတပ်မှ ၆ဦးသေဆုံးကာ ၁၁ဦး လက်နက်ချ အညံ့ခံခဲ့သည့် ။ ၅ဦးထွက်ပြေးသွားရာ အားလုံးကို ပြန်လည်ဖမ်းမိခဲ့သည်ဟုဆိုသည်။ အဆိုပါ တပ်စခန်းမှ သေနတ် ၁၇ရက် နှင့် ကျည်၊ ခဲယမ်းများ ရရှိခဲ့သည်ဟုလည်း အသိပေးသည်။
