ကရင်ပြည်နယ်၊ ကော့ကရိတ်မြို့မှာ ဒေသခံတွေရဲ့နေအိမ်ကို စစ်ကောင်စီတပ်က မီးရှို့ ဖျက်ဆီး ဖို့ကြံစည်တဲ့ သက်သေတွေ နယ်မြေရှင်းလင်းချိန်မှာတွေ့ခဲ့ရတယ်လို့ NUG အစိုးရ တောင်ပိုင်းတိုင်း စစ်ဒေသ လက်အောက်ခံ ကျားဖြူစစ်ကြောင်းကဖော်ပြပါတယ်။
မီးရှို့ဖို့ လောင်စာတွေ၊ တာယာကွင်းတွေ၊ လောင်စာဆီ တွေကို တွေ့ရှိခဲ့ရတယ်လို့ ကျားဖြူစစ်ကြောင်းကဆိုပါတယ်။
နယ်မြေရှင်းလင်းခဲ့တဲ့ ကော့ကရိတ်မြို့ရဲ့ နေရာကိုတော့ ကျားဖြူစစ်ကြောင်းက မဖော်ပြပါဘူး။
ကျားဖြူ စစ်ကြောင်းက ဒီမနက် ထုတ်ပြလာတဲ့ ရုပ်သံဖိုင်ထဲမှာ နေအိမ်တစ်လုံးပေါ်မှာ အင်ဂျင်ဝိုင် ပုံးတွေ ၊ သစ်ရွက်ခြောက်တွေ နဲ့ တာယာကွင်းတွေ စုပုံထားတာကိုတွေ့ရပါတယ်။
Public Service Announcement
“သူတို့(စစ်ကောင်စီတပ် ) ပြန်ဆုတ်လို့ရှိရင် မီးရှို့ဖို့အတွက် အဆင်သင့် ကြိုလုပ်ပြီးသားအိမ်ပေါ့ ” လို့ အဲဒီရုပ်သံဖိုင်ထဲမှာ ကျားဖြူ စစ်ကြောင်းတပ်ဖွဲ့ဝင်တစ်ဦးက ပြောဆိုထားပါတယ်။
ပြီးခဲ့တဲ့သောကြာနေ့က ကော့ကရိတ်မြို့ အ.လ.က (၂) တောင်ပေါ်ရပ် လမ်းဆုံနဲ့ ချောင်းတောင်မြို့မ ဘုရားကျောင်းမှာ တပ်စွဲထားတဲ့ စစ်ကောင်စီတပ် တိုက်ခိုက်ခံရပြီး ပြန်လည်ဆုတ်ခွာချိန်မှာ နေအိမ်တွေကို မီးရှို့သွားခဲ့တယ်လို့ ကျားဖြူစစ်ကြောင်းက ထုတ်ပြန်ထားပါတယ်။
စစ်ကောင်စီခေါင်းဆောင်ကတော့ စစ်တပ်ဟာ လူထုရဲ့ အိုးအိမ်စည်းစိမ်ကို မီးရှို့ဖျက်ဆီးတာမရှိဘူးလို့ ကုလသမဂ္ဂ ရဲ့မြန်မာနိုင်ငံဆိုင်ရာအထူးကိုယ်စားလှယ်နိုလင်းဟေဇာ နဲ့ ပြီးခဲ့တဲ့ ၂၀၂၂ ခုနှစ်အတွင်း နေပြည်တော်မှာ တွေ့ဆုံချိန်က အခိုင်အမာပြောဆိုထားပါတယ်။
