AAကို ဆန့်ကျင်သည့် ဆန္ဒပြပွဲအား ဘူးသီးတောင်၌ စစ်ကောင်စီက ကြိုးကိုင်လုပ်ဆောင်သကဲ့သို့ မောင်တော၌ထပ်လုပ်ရန် ကြိုးပမ်းနေဟု ဖော်ပြ
ရှိုင်း/People’s Spring
စစ်ကောင်စီအနေဖြင့် စစ်ရေးအရ ရှုံးနိမ့်နေမှုများကို အာရုံလွဲသွားစေရန် ထိလွယ်ရှလွယ်သော လူမျိုးရေး ဘာသာရေး ပဋိပက္ခများကို ဖြစ်ပေါ်အောင် ယခုရက်များအတွင်း ပိုမို အားစိုက်ကြိုးပမ်းနေကြောင်း ရက္ခိုင့်တပ်တော်(AA)က ထုတ်ပြန်သည်။
စစ်ကောင်စီက လေကြောင်း၊ လက်နက်ကြီးများ တိုက်ခိုက်၍ အရပ်သားပြည်သူများ သေဆုံးထိခိုက်မှု ဆက်လက်ရှိနေခြင်း၊ စစ်ကောင်စီက လူမျိုးရေးပဋိပက္ခဖန်တီးရန် ကြိုးပမ်းနေခြင်း၊ စစ်ကောင်စီက ရိုဟင်ဂျာများကို စစ်သားစုဆောင်းအသုံးပြုနေခြင်းနှင့် နိုင်ငံခြားရင်းနှီးမြှုပ်နှံမှု၊ စီမံကိန်းများ ကို ဖိတ်ခေါ်ကြောင်း ဖော်ပြသည့် အကြောင်းအရာများကို AAက ယနေ့ မတ်လ ၂၅ရက်တွင် ထုတ်ပြန်ခဲ့ခြင်းဖြစ်သည်။
မတ်လ ၁၉ရက်က ဘူးသီးတောင်မြို့ အခြေစိုက် စကခ(၁၅)မှ အဓိကကြိုးကိုင်ပြီး လူမျိုးရေး ပဋိပက္ခ ဖြစ်စေရန် ရည်ရွယ်ချက်ဖြင့် AAက ကို ဆန့်ကျင်ကြောင်း ဖော်ပြသည့် ဆန္ဒပြပွဲပြုလုပ်ခဲ့သည်ဟုဆိုသည်။
Public Service Announcement
ထို့ပြင် မောင်တောမြို့၌လည်း အလားတူ ဆန္ဒ ပြပွဲ ပုံစံမျိုးကို ကျင်းပရန်ကြိုးစားနေကြောင်း သိရသည်ဟု AAက အသိပေးသည်။
ထို့ကြောင့် ရက္ခိုင်ပြည်သူလူထုများအနေဖြင့် စစ်ကောင်စီက ဖြစ်စေချင်သည့် နိုင်ငံရေး ထောင်ချောက်အတွင်းသို့ သက်ဆင်းမကျသွားစေရန် နိုင်ငံရေးအသိ သမိုင်းထဲမှ အတွေ့အကြုံ သင်ခန်းစာများဖြင့် သတိထားနေထိုင်ကြရန် AAက သတိပေးသည်။
စစ်ကောင်စီ၏ လုပ်ရပ်များကို သတိထား စောင့်ကြည့်ရန် အလေးအနက်တိုက်တွန်းကြောင်းလည်း ထုတ်ပြန်သည်။
စစ်ကောင်စီသည် စစ်မှုထမ်းဥပဒေကို ပြဌာန်းပြီး လူမျိုးပေါင်းစုံကို အဓမ္မစစ်သားစုဆောင်းနေကြောင်း၊ ရက္ခိုင်ဒေသရှိ ဘင်္ဂလီလူမျိုးများကိုလည်း စစ်သားစုဆောင်းနေပြီး လွန်ခဲ့သော ရက်သတ္တပတ်အတွင်း ရသေ့တောင် တိုက်ပွဲ၌ ဘင်္ဂလီလူမျိုးများကို တိုက်ပွဲများအတွင်း ထည့်သွင်း အသုံးပြုနေသည်ကို တွေ့ရကြောင်း ဖော်ပြထားသည်။
AAနှင့် စစ်ကောင်စီသည် လက်ရှိတွင် ပြင်းထန် သော တိုက်ပွဲများ ဆက်ရှိနေ၍ စစ်ကောင်စီနှင့် ပူးပေါင်းတိုက်ပွဲဝင်နေသော မည်သည့် အဖွဲ့အစည်း မည်သူ့ကိုမဆို စစ်ကောင်စီဘက်တော်သားအဖြစ် သတ်မှတ်ပြီး တိုက်ခိုက်သွားမည်ဟုလည်း ထုတ်ပြန်သည်။
ရက္ခိုင်ပြည်နယ်အတွင်း AA မှ လွဲ၍ မည်သည့် လက်နက်ကိုင်အဖွဲ့အစည်းမှ မရှိစေရမူအတိုင်း ရှိနေမည်ဟုလည်း AAက ထပ်မံ အသိပေးသည်။
ရက္ခိုင်ဒေသတွင်းရှိ လက်နက်ချ အညံ့မခံသေးသည့် လက်ကျန်စခန်းအားလုံးကို ထပ်မံ သိမ်းပိုက်ရရှိရေး ကြိုးပမ်းနေသကဲ့သို့ လက်ရှိ သိမ်းပိုက်ထားသည့် မြို့ရွာများ၏ တည်ငြိမ်ရေး အုပ်ချုပ်ရေး၊ဒေသဖွံ့ဖြိုး တိုးတက်ရေး၊ လုံခြုံရေး၊ ကျန်းမာရေးနှင့် လူမှုစီးပွား အ၀၀ တို့ကို အကောင်းဆုံး ကြိုးစားဆောင်ရွက်လျက်ရှိကြောင်းလည်း ထုတ်ပြန်ခဲ့သည်။
AA အနေဖြင့် ဒေသဖွံ့ဖြိုးရေးကို အထောက်အကူပြုသော မည်သည့် နိုင်ငံခြား ရင်းနှီးမြှုပ်နှံမှု ကို မဆို ကြိုဆိုပြီး လုံခြုံရေးပိုင်းကို AAက တာဝန်ယူသွားမည်ဖြစ်ကြောင်းဖော်ပြကာ နိုင်ငံခြား ရင်းနှီးမြှုပ်နှံမှု စီမံကိန်းများ ဆက်လက် လည်ပတ်နိုင်ရေးအတွက် AAနှင့် အတူ ပူးပေါင်းဆောင်ရွက်ရန်လိုလားကြောင်း ထုတ်ပြန်ထားသည်။
