▪︎RCSS၏ တပ်သားသစ် ၆၀၀၀ ကိုလည်း တွေ့ဆုံခဲ့ဟုဆို
မောင်မောင်/People’s Spring
စစ်ကောင်စီ၏ ပြည်သူ့ စစ်မှုထမ်း ဥပဒေ ထုတ်ပြန်ချက်ကြောင့် တုန်လှုပ်နေသော ပြည်သူများကို နှစ်သိမ့်မှု ပေးရန် ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော်(RCSS/SSA) ဥက္ကဋ္ဌ ဗိုလ်ချုပ်ကြီး ယွက်စစ်က အဖွဲ့ထိန်းချုပ်လှုပ်ရှားနယ်မြေများသို့ သွားရောက်ခဲ့ကြောင်း RCSSက ယနေ့ ထုတ်ပြန်သည်။
ပြည်သူများ အမှန်တကယ် ကြုံနေရသည့် အခြေအနေများနှင့် ပတ်သက်သည့် အချက်အလက်များ ရယူနိုင်ရန် တွေ့ဆုံပွဲများဖြင့် အပြန်အလှန် ဆွေးနွေးမေးမြန်းသွားရန် ရည်ရွယ်ပြီး RCSS ဥက္ကဋ္ဌ သည် မတ်လနှင့် ဧပြီလအတွင်း အဖွဲ့အစည်း လှုပ်ရှား ထိန်းချုပ်ရာ နယ်မြေများအတွင်းရှိ ပြည်သူများ၊ တပ်မဟာနယ်မြေ အသီးသီးတွင် စစ်ပညာ သင်ယူနေသည့် တပ်သားသစ်များအား တွေ့ဆုံအားပေးခြင်း ပြုလုပ်ခဲ့သည်ဟုဆိုသည်။
ခရီးစဉ်အတွင်း RCSS ထိန်းချုပ်ရာ နယ်မြေ ဒေသအတွင်းရှိ အခြေခံ စစ်ပညာ သင်တန်းများမှ တပ်သားသစ် ၆၀၀၀ ဦး ကျေးရွာ ၃၃ရွာမှ ဒေသခံ ပြည်သူများ နှင့်တွေ့ဆုံပြီး အသိပညာ ပေးခြင်း၊ အားပေးစကား ပြောခြင်း၊ မေးမြန်းဆွေးနွေးခြင်း ပြုလုပ်ခဲ့သည်ဟုဆိုသည်။
Public Service Announcement
လူထုမှ တင်ပြလာသည့် ဒေသတွင်း လိုအပ်ချက်များအနက် သင့်တော်သည့် လုပ်ငန်းများကို ပါဝင်ကူညီ လှူဒါန်းခဲ့ကြောင်း ဖော်ပြသည်။
RCSS အနေဖြင့် ဒေသတွင်း တည်ငြိမ်ရေး၊ ဖက်ဒရယ်ဒီမိုကရေစီ နည်းလမ်းတကျ တန်းတူရေး နှင့် ကိုယ်ပိုင်ပြဌာန်းခွင့်တို့ဖြင့်အောက်ခြေမှ စတင်သော အုပ်ချုပ်မှု ပြုပြင်ပြောင်းလဲရေးကို စတင်ဆောင်ရွက်နေပြီဖြစ်ပြီး ထိုသို့ ဆောင်ရွက်ရာ၌ တပ်မတော် အပါအဝင် သက်ဆိုင်ရာ လူမျိုးများ အစုအဖွဲ့များ ပူးပေါင်းပါဝင်လိုသူများကို ဖိတ်ခေါ် ကြိုဆိုကြောင်းလည်း ဖော်ပြခဲ့သည်။
အကြောင်းအမျိုးမျိုးကြောင့် RCSS/SSA ထံ တွင် အမှုထမ်းရန်နှင့် စစ်ပညာ ကို လာရောက်သင်ယူနေကြသည့် လူငယ် လူရွယ်များအား အမျိုးသားရေးဆိုင်ရာ တာဝန်များ၊ ရှမ်းပြည်နှင့် ဇာတိရပ်ရွာ အပေါ် တန်ဖိုးထားမှုများ မှန်ကန်စွာ သိမြင်လာစေရန်၊ မိမိကိုယ်ကိုယ်နှင့် မိမိရပ်ရွာကို ကိုယ်တိုင်ကာကွယ်နိုင်သည်အထိ အခြေခံ စစ်ပညာအား စနစ်တကျ သင်ကြားတက်မြောက်စေရန် ရည်ရွယ်ပြီး အဆိုပါ ခရီးစဉ်ကို ပြုလုပ်ခဲ့ဟု အသိပေးသည်။
ဖြတ်သန်းခဲ့ပြီးသော နိုင်ငံရေးဆွေးနွေးပွဲများမှ ထွက်ပေါ်လာသည့် ပြည်ထောင်စု အဆင့်၊ ပြည်နယ် အဆင့် သဘောတူညီချက်များကို လက်တွေ့ စတင် အကောင်အထည်ဖော်သွားရန် ၊ အထူးသဖြင့် ဒေသန္တရ အဆင့်မှ အခြေခံ တကျ ပြင်ဆင်တည်ဆောက်သွားနိုင်ရန် လည်း ရည်ရွယ်သည်ဟုဆိုသည်။
RCSSသည် စစ်တပ်အာဏာသိမ်းပြီးနောက် စစ်ကောင်စီကို တစ်ကြိမ်မျှ မတိုက်ခိုက်ခဲ့ဘဲ ၊အာဏာသိမ်းစစ်ကောင်စီနှင့် အမြဲတွေ့ဆုံဆွေးနွေးနေသည့် အဖွဲ့ဖြစ်သည်။
သို့သော် ၂၀၂၁နှင့် ၂၀၂၂ တွင် SSPP နှင့် ရှမ်းပြည်နယ်မြောက်ပိုင်းတွင်တိုက်ပွဲဖြစ်ပြီး SSPP နှင့် မဟာမိတ်အဖွဲ့များ၏တိုက်ခိုက်မှုကြောင့် ရှမ်းမြောက်တွင် ယခင်စိုးမိုးထာသောနယ်မြေများလက်လွတ်ဆုံးရှုံးခဲ့သည်။
စစ်ကောင်စီက ၂၀၂၄ ဖေဖော်ဝါရီ ၁၀ ရက်တွင် စစ်မှုထမ်း ဥပဒေ ထုတ်ပြန်ပြီး တစ်ပတ်ကျော်အကြာ ဖေဖော်ဝါရီ ၁၉ တွင် RCSSကလည်း ရှမ်းပြည်အတွင်းရှိ အရွယ်ရောက်ပြီးသူများ စစ်မှု မထမ်းမနေရ အမိန့်ထုတ်ပြန်ခဲ့သည်။ မလိုက်နာပါက မြေယာနှင့် နေအိမ်များကို သိမ်းဆည်းသည့် အရေးယူမှု ပြုလုပ်မည်ဟုဆိုသဖြင့် RCSS ၏စစ်မှုထမ်းအမိန့်အပေါ် ဝေဖန်မှုများစွာရှိခဲ့သည်။
