အာဏာရှင်ကြောင့် သေဆုံးသူများကို ဂုဏ်ပြုသည့်အနေဖြင့် ကျောက်တုံး ၅,၄၀၀ ထားရှိဟုဆို
-People’s Spring
၈၈မျိုးဆက်ကျောင်းသားခေါင်းဆောင်ကိုဂျင်မီ၊ အဆိုတော် ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့ကို စစ်ကောင်စီက ကြိုးပေးကွပ်မျက်မှု (၂)နှစ်ပြည့်အဖြစ် အမှတ်အသားပြုလုပ်ကြောင်း ရန်ကုန်မြို့ရှိ အမေရိကန်သံရုံးက ယနေ့ ထုတ်ပြန်သည်။
” စစ်အာဏာရှင်အဖွဲ့အစည်းက ကိုဂျင်မီ၊ ဖြိုးဇေယျာသော်၊ လှမျိုးအောင်နှင့် အောင်သူရဇော်တို့ကို ကွပ်မျက်မှု နှစ်နှစ်ပြည့်မြောက်ခြင်းကို အမေရိကန်သံရုံးက အမှတ်အသားပြုပါသည်”ဟု အမေရိကန်သံရုံးက ဆိုသည်။
Public Service Announcement
ထို့အပြင် အာဏာရှင်အဖွဲ့အစည်းကြောင့် အသက်သေဆုံးခဲ့ကြရသူများအား ဂုဏ်ပြုထားသည့် အမေရိကန်သံရုံး၌ ကျဆုံးသူများအမှတ်တရအထိမ်းအမှတ်နေရာတွင် ယနေ့အထိကျောက်တုံးပေါင်း ၅,၄၀၀ နီးပါးကို ထားရှိကြောင်း သံရုံးထုတ်ပြန်ချက်တွင် ဖော်ပြထားသည်။
ထို့အပြင် ၂၀၂၁ စစ်တပ်အာဏာသိမ်းမှုနောက်ပိုင်းမှစတင်ပြီး တဟုန်ထိုးမြင့်တက်လာသည့် မြန်မာနိုင်ငံအတွင်းမှ ပဋိပက္ခတွင် အသက်ဆုံးရှုံးခဲ့ရသူများအားလုံးအတွက် အမေရိကန်က ပူဆွေးသောက ရောက်ရသည်ဟုလည်း ဖော်ပြထားသည်။
စစ်ကောင်စီက ကိုဂျင်မီကို ၂၀၂၁ အောက်တိုဘာတွင် မြောက်ဒဂုံမြို့နယ် ပင်လုံအိမ်ရာ၌ ဖမ်းဆီးခဲ့ပြီး၊ ကိုဖြိုးဇေယျာသော်ကို ၂၀၂၁ နိုဝင်ဘာ ၁၈ ရက်တွင် ဒဂုံဆိပ်ကမ်းမြို့နယ် ရတနာနှင်းဆီအိမ်ရာတွင် ဖမ်းဆီးခဲ့ပြီးနောက် ၂၀၂၂ ဇန်နဝါရီ ၂၁ ရက်တွင် စစ်ကောင်စီက စစ်ခုံရုံးဖြင့် သေဒဏ်ချမှတ်ခဲ့သည်။
ထို့နောက် စစ်ကောင်စီက ကိုဂျင်မီ၊ ကိုဖြိုးဇေယျာသော်အပါအဝင် လေးဦးကို သေဒဏ် ကြိုးပေး စီရင်လိုက်ပြီဟု ၂၀၂၂ ဇူလိုင် ၂၅ ရက်တွင် ကြေညာခဲ့သည်။
