မိထက်/People’s Spring
ရှမ်းပြည်နယ်မြောက်ပိုင်း၊ မူဆယ်မြို့၊ စက်မှုရပ်ကွက် နှင့် တောင်ပေါ်တွင် ပစ်ခတ်သံများကြားနေရပြီး လုံခြုံရေးသတိပြုကြရန် ဒေသခံအချင်းချင်း သတိပေးနေကြသည်။
စက်မှုရပ်ကွက်နှင့်တောင်ပေါ်တွင် ယနေ့(ဇူလိုင်လ ၃၀ရက်) နံနက် ၉နာရီနှင့် ၁၀နာရီခန့်၌ ပစ်ခတ်သံများထွက်ပေါ်ခဲ့ခြင်းဟု ဒေသခံများကပြောသည်။
Public Service Announcement
“ အရင်သုံးလေးရက်ကတည်းက ပေါက်ကွဲသံတွေထွက်ခဲ့တာ။ ဒီနေ့ကတော့သေနတ်သံကြားတာ။တိုက်ပွဲတွေဖြစ်လာမယ်ထင်တယ်ဘာတွေဆက်ဖြစ်လာမလဲတော့မသိဘူး” ဟု ဒေသခံတဦးကပြောသည်။
စက်မှုရပ်ကွက်နှင့်တောင်ပေါ်သည် မူဆယ်မြို့ပေါ်နှင့် လေးမိုင်ခန့်သာဝေးသည်။ စစ်ကောင်စီတပ်စွဲထားသည့်နေရာများပတ်ဝန်းကျင်၌ မိုင်းများထောင်ထား၍ မိုင်းပေါက်ကွဲမှုများမကြာခဏဖြစ်ခဲ့သည်ဟု စစ်ရေးသတင်းရင်းမြစ်အချို့ကပြောသည်။
“ စစ်တပ်က စခန်းထဲက မထွက်ဘူး။မြို့ကဘာမှ လုပ်စားမရတော့ဘူး။ တိုက်ပွဲကနေ့လားညလားပဲ” ဟု ဒေသခံတဦးကပြောသည်။
မူဆယ်မြို့သည် ၁၀၂၇ စစ်ဆင်းရေးပထမပိုင်း၌ ညီနောင်သုံးဖွဲ့က တိုက်ခိုက်ရန် ပြင်နေစဉ် တရုတ်က ကြားဝင်မှုဖြင့် ဟိုင်ဂင်အပစ်ရပ်စာချုပ်ကြောင့် မတိုက်ခိုက်ဘဲ ကျန်နေသည့် မြို့ဖြစ်သည်။ ယခုအခါ ၁၀၂၇ စစ်ဆင်ရေး ဒုတိယပိုင်းတွင် ရှမ်းပြည်နယ်မြောက်ပိုင်းမှ လားရှိုးမြို့၊ သီပေါမြို့၊ ကျောက်မဲမြို့၊ နောင်ချိုမြို့တို့ ရှိစစ်တပ်စခန်းများကို မြောက်ပိုင်းမဟာမိတ်သုံးဖွဲ့နှင့် ပြည်သူ့ကာကွယ်ရေးပူးပေါင်းတပ်ဖွဲ့များက ထိုးစစ်ဆင်တိုက်ခိုက်နေသည်။ လားရှိုးနှင့်နောင်ချိုမြို့ကို ထိန်းချုပ်ထားသည်။ လားရှိုး မြို့ ကို တော်လှန်ရေးတပ်များက သိမ်းပိုက်ထိန်းချုပ်ပြီးပါက ရှမ်းမြောက်တွင် တစ်မြို့တည်း ကျန်နေသောမူဆယ်မြို့ကိုလည်း တော်လှန်ရေးအင်အားစုများက တိုက်ခိုက်မည်ဟုသတင်းများထွက်ပေါ်နေသည်။
မူဆယ်မြို့သည် တရုတ်နိုင်ငံနှင့် နယ်စပ်ကုန်သွယ်ရေးမြို့ဖြစ်ပြီး မူဆယ် ၁၀၅မိုင် ကုန်သွယ်ရေးဇုန်ကို တော်လှန်ရေးအင်အားစုများက ထိန်းချုပ်ထားပြီးဖြစ်သည်။ စစ်ကောင်စီတပ်သည် မူဆယ်မြို့ပေါ်၌သာတပ်စွဲထားနိုင်ပြီး အုပ်ချုပ်ရေးယန္တရားလည်း ကောင်းမွန်စွာမလည်ပတ်တော့ကြောင်း ဒေသခံများကပြောသည်။
