သုည/People’s Spring
စစ်ကိုင်းတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေက စစ်အာဏာရှင်ဆန့်ကျင်ရေး သပိတ်တွေ ဒီကနေ့ (သြဂုတ် ၅) အသီးသီး ချီတက်ဆန္ဒပြခဲ့ပါတယ်။
စစ်ကိုင်းတိုင်း မုံရွာမြို့ပေါ်က အထင်ကရနေရာအချို့မှာ မုံရွာပင်မသပိတ်ကရဲဘော်တွေဦးဆောင်ပြီး စစ်အာဏာရှင်စနစ် တိုက်ဖျက်ရေး လူထုလှုပ်ရှားမှု ပြုလုပ်ခဲ့ပါတယ်။
သပိတ်ရဲဘော်တွေက “လူထုတိုက်ပွဲတွေ ပြန်လည်ဖော်ဆောင်ကြ” ၊ “၁၀၂၇ စစ်ဆင်ရေးလှိုင်းတွေကို လူထုလှိုင်းတွေနဲ့ ကြိုဆိုကြ” ၊ “မုံရွာကကွယ် ခိုင်မာတယ် မုံရွာသမိုင်း မရိုင်းစေနဲ့” ၊ မတရားတဲ့ စစ်အာဏာတွေ ဖီဆန်ဖို့ မုံရွာသပိတ်ပြန်လာပြီ” ၊ “ဘူးသပိတ်ဆင်နွှဲ ဖက်ဆီဖြိုလှဲ” စတဲ့ စာသားတွေကို ကိုင်ဆောင်ပြီး ဆန္ဒထုတ်ဖော်ခဲ့ပါတယ်။
Public Service Announcement
ဒီလူထုလှုပ်ရှားမှုကို စစ်ကောင်စီက အဖမ်းအဆီး အစစ်အဆေးတွေ လုပ်ဆောင်နေတဲ့ မုံရွာမြို့ပေါ်ရှိ ကန်သာယာစျေး၊ ကန်သာယာ၊ ဇောတိကမီးပွိုင့်၊ မြင်းမူလမ်း၊ ဗိုလ်ချုပ်လမ်း၊ အာဇာနည်လမ်း၊ ကျောက္ကာလမ်း၊ ဘူတာအနီးတဝိုက်နေရာတို့မှာ အောင်မြင်စွာပြုလုပ်ခဲ့ကြောင်း မုံရွာပင်မသပိတ်က ဆိုပါတယ်။
ဆားလင်းကြီးမြို့နယ်မှာ တော်လှန်ပုန်ကန်ဒေါင်းတို့အားမာန်သပိတ်စစ်ကြောင်းနဲ့ ယင်းမာပင်-ဆားလင်းကြီး ရွာပေါင်းစုံသပိတ်စစ်ကြောင်းတို့ ပူးပေါင်းကာ စစ်အာဏာရှင်ဆန့်ကျင်ရေးသပိတ် ဆင်နွှဲခဲ့ပါတယ်။
ယင်းမာပင်မြို့နယ် မြောက်ခြမ်းမှာလည်း အောင်လံလွှင့်မည်ဒေါင်းသွေးနီသပိတ်စစ်ကြောင်း၊ အောင်လံလွှင့်မည်ရွှေရေကြည်လူထုသပိတ်စစ်ကြောင်း၊ ရွှေဥက္ကံ လူထုသပိတ်စစ်ကြောင်းတို့က စစ်အာဏာရှင်ကို ဆန့်ကျင်ကြောင်း ချီတက်ဆန္ဒပြခဲ့ပါတယ်။
ဓာတ်ပုံ – ရွာပေါင်းစုံသပိတ်၊ အောင်လံလွှင့်မည်ဒေါင်းသွေးနီသပိတ်၊ လူငယ့်အားမာန်သပိတ်၊ မုံရွာပင်မသပိတ်
