ဇေအောင်/People’s Spring
စစ်ကိုင်းတိုင်း၊ ရွှေဘိုမြို့အဝင်တွင် တိုက်ပွဲနှစ် ကြိမ် ဖြစ်ပွားရာ စစ်ကောင်စီတပ် ထိခိုက်မှုရှိခဲ့ကြောင်း သတင်းရရှိသည်။
သြဂုတ် ၁၃ ရက် နံနက် ၁၁နာရီဝန်းကျင်က ရွှေဘိုမြို့အဝင် မုခ်ပေါက်မှ ရွှေဘို-မန္တလေးကားလမ်းပိုင်း အောင်ချမ်းသာကျေးရွာသို့ အင်အား ၅၀ခန့်ဖြင့် စစ်ကြောင်းထိုးလာသော စစ်ကောင်စီတပ်သားများအား ရွှေဘိုမြို့နယ်တိုက်နယ် (၅) ပကဖ တိုက်ခိုက်ရေးအဖွဲ့နှင့် တိုက်နယ်(၅) နယ်မြေခံပကဖများက ပူးပေါင်းတိုက်ခိုက်ခဲ့သည်။
Public Service Announcement
အဆိုပါ စစ်ကြောင်းနှင့် မီတာ ၁၀၀ဝန်းကျင်အကွာမှ တိုက်ခိုက်ခဲ့ခြင်းဖြစ်ပြီး နာရီဝက်ခန့်ကြာမြင့်ကာ စစ်ကောင်စီတပ် အထိနာခဲ့သည်ဟု ကာကွယ်ရေးရဲဘော်အချို့က ဆိုသည်။
“တိုက်ပွဲက ရွှေဘို-မန္တလေး လမ်းမကြီးပေါ်မှာပဲ ဖြစ်တာပါ။”ဟု ရွှေဘိုမြို့နယ်ပြည်သူ့ကာကွယ်ရေးအဖွဲ့၏ တာဝန်ရှိသူက ပြောသည်။
အထိနာသွားသော စစ်ကောင်စီတပ်မှာ အောင်ချမ်းသာရွာသစ် အရှေ့ဘက် ဆန်စက်ဟောင်းအတွင်း ခိုအောင်းနေခဲ့သည်။
ထိုနောက် ညနေ ၃ နာရီခွဲခန့်တွင် မီတာ ၅၀ခန့်အကွာမှ ထပ်မံတိုက်ခိုက်ခဲ့ရာ စစ်သား နှစ်ဦးထက်မနည်း သေဆုံးပြီး ပူးပေါင်းတပ်များမှ ကာကွယ်ရေးရဲဘော် ၂ဦး မစိုးရိမ်ရ ဒဏ်ရာရရှိခဲ့ကြောင်း ရွှေဘိုပကဖတာဝန်ရှိသူက ဆိုသည်။
တိုက်ပွဲကြောင့် ရွှေဘို-မန္တလေးလမ်းပိုင်း ယာယီပိတ်ထားရပြီး ယနေ့ပြန်ဖွင့်ပေးထားကြောင်း ဒေသခံများက ပြောသည်။
