ဆိုင်းမင်း/People’s Spring
အင်းစိန်ထောင်ကနေ သာယာဝတီထောင်ဆီ ပြောင်းရွေ့ခံရတဲ့ ရာနဲ့ချီ တဲ့ နိုင်ငံရေးအကျဉ်းသားတွေ ရိုက်နှက်ခံရပြီး နိုင်ကျဉ်း ၄၀ ကျော် ဒဏ်ရာတွေရခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်( PPNM ) က ဒီနေ့မှာထုတ်ပြန်ပါတယ်။
ဇူလိုင်လ ၂၁ ရက်က နိုင်ကျဉ်းဦးရေ ၃၀၀ ဟာ အင်းစိန်ထောင်ကနေ သာယာဝတီထောင်ဆီ ပြောင်းရွေ့ခံရတာပါ။
Public Service Announcement
သာယာဝတီထောင်ဆီ ရောက်လာတဲ့ နိုင်ငံရေးအကျဉ်းသားတွေကို ထောင်အာဏာပိုင်တွေက အကြောင်းပြချက် တစုံတရာမရှိဘဲ အကြောက်တရား သွင်းတဲ့အနေနဲ့ ထောင်ဗူးဝမှာတင် ရိုက်နှက်ခဲ့တာလို့ PPNM က ဆိုပါတယ်။
ထောင်အာဏာပိုင်တွေရဲ့ ရိုက်နှက်မှုတွေကြောင့် နိုင်ကျဉ်း ၄၀ ကျော် ဟာ ဦးခေါင်းနဲ့ ခန္ဓာကိုယ်မှာ ဒဏ်ရာတွေရခဲ့တယ်လို့ PPNM က ဖော်ပြပါတယ်။
ဒါအပြင် ထောင်ပြောင်းခံရတဲ့ နိုင်ကျဉ်းတွေထဲက အမည်မည်း(Black List) စာရင်းသွင်းထားတဲ့ နိုင်ကျဉ်း ၁၀ ဦးကျော်ကို ရိုက်နှက်ကာ ခြေကျင်းခတ်ပြီး တိုက်ပိတ်ထားတယ်လို့ သိရပါတယ်။
သာယာဝတီထောင်ဟာ ကိုလိုနီခေတ်ကနေ စစ်အစိုးရ အဆက်ဆက်အပြင် လက်ရှိ စစ်ကောင်စီလက်ထက်မှာလည်း နိုင်ကျဉ်းတွေကို နှိပ်စက်ရာမှာ နာမည်ဆိုးနဲ့ ကျော်ကြားတဲ့ ထောင်ဖြစ်ပါတယ်။
