မိထက်/People’s Spring
မကွေးတိုင်း၊ ကျောမြို့တွင် PDFများ သိမ်းပိုက် ထိန်ချုပ်ထားသည့် MOGE ရေနံမှော်ကင်းစခန်း (Well-1 ထုတ်လုပ်ရေးစခန်း)နှင့် ရေနံကျင်းကင်းစခန်း ပြန်လည်ရယူရေး စစ်ကောင်စီက ကြိုးပမ်းနေပြီး လေကြောင်းတိုက်ခိုက်မှုအပြင် မြေပြင်မှလည်း စစ်ကြောင်းထိုးလာကြောင်း သတင်းရရှိသည်။
မြန်မာ့ရေနံနှင့်သဘာဝဓာတ်ငွေ့လုပ်ငန်း (MOGE)၏ ရေနံမှော်ကင်းစခန်းနှင့် ရေနံကျင်းကင်းစခန်းအား ပြည်သူ့ကာကွယ်ရေးတပ်ဖွဲ့(PDF)များက ဩဂုတ် ၁၅ရက်တွင် တိုက်ခိုက်သိမ်းယူခဲ့ပြီး
Public Service Announcement
စစ်ကောင်စီက စက်တင်ဘာ ၃ရက်မှစတင်ကာ လေကြောင်းမှ တိုက်ခိုက်လာခြင်းဟု ပြည်သူကာကွယ်ရေးရဲဘော်အချို့က ပြောသည်။
” သိမ်းထားတဲ့စခန်းတွေကို ပြန်ယူချင်ပုံရတယ်။ လေကြောင်းကနေတောက်လျှောက် ကင်းထောက်နေပြီး စက်တင်ဘာလ ၃ရက်မှာ စပစ်တယ်။ ဂျက်ဖိုက်တာသုံးစီးနဲ့ ၁၀ကြိမ်မကဘူးပစ်သွားတာ။ ဒီနေ့ မြေပြင်စစ်ကြောင်း စထိုးတယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
စစ်ကောင်စီ၏ လေကြောင်းတိုက်ခိုက်မှုကြောင့် ကျောမြို့၊ အမှတ်(၂)ရပ်ကွက်မှ အရပ်သားတစ်ဦးဒဏ်ရာအပြင်းအထန်ရရှိခဲ့ပြီး မျက်လုံးတစ်ဖက်ဆုံးရှုံးခဲ့ရသည်ဟု သတင်းရရှိသည်။
” ကျနော်တို့လည်း အတတ်နိုင်ဆုံးအသက်လု ပေးထားတယ်။ မြို့ပေါ်ရပ်ကွက်တွေရဲ့အစွန်တွေကို ပတ်ပစ်သွားတာ”ဟု ကာကွယ်ရေးရဲဘော် တစ်ဦးက ပြောသည်။
ထို့အပြင် တိုက်ပွဲဖြစ်လာနိုင်ခြင်းနှင့် လေကြောင်းအန္တရာယ်ကြောင့် ဒေသခံအများအပြားမှာ ဘေးလွတ်ရာသို့ထွက်ပြေးတိမ်းရှောင်နေကြသည်။
ကျောမြို့မှစစ်ဘေးရှောင်များသည် ဒေသချင်းထိစပ်နေသော စစ်ကိုင်းတိုင်း ပုလဲမြို့ဘက်သို့လည်း စစ်ဘေးတိမ်းရှောင်လာကြကြောင်း ပုလဲမြို့နယ်မှ ယင်းမာပင်ခရိုင် တပ်ရင်း(၁၂) တပ်ရေးတာဝန်ခံက ပြောသည်။
” စစ်ဘေးရှောင်က စုစုပေါင်းတစ်ထောင်လောက်ရှိတယ်။ နေရေးထိုင်ရေးကတော့ တရွာနဲ့တရွာကူညီကြတော့အဆင်ပြေပါတယ်။ စာရေးသောက်ရေးအတွက်တော့အကူအညီတွေလိုအပ်ပါတယ်”ဟု ၎င်းက ပြောသည်။
စစ်ဘေးရှောင်များအား ပုလဲမြို့နယ်ပြည်သူ့အုပ်ချုပ်ရေးအဖွဲ့နှင့် ပြည်သူ့ကာကွယ်ရေးအဖွဲ့များက ကူညီထောက်ပံ့မှုများပြုလုပ်နေကြောင်းသတင်းရရှိသည်။
ကျောမြို့တွင် စစ်ကောင်စီသည် ရဲစခန်းနှင့် ပုလဲမြို့နယ်နှင့်ထိစပ်နေသော ကန်းဒေါင့်ရွာအခြေစိုက်ကာကွယ်ရေးပစ္စည်းစက်ရုံ(၂၃)တွင် အခိုင်မာတပ်စွဲထားကြောင်း သတင်းရရှိသည်။
MOGEရေနံမှော်ကင်းစခန်း (Well-1 ထုတ်လုပ်ရေးစခန်း) နှင့် ရေနံကျင်းကင်းစခန်းသိမ်းတိုက်ပွဲအတွင်း စစ်ကောင်စီ ကပစ(၂၃) မှ ဗိုလ်ကြီး သော်ဇင်အောင်နှင့် ဒုရဲအုပ်ကိုကိုအောင် အပါအဝင် ၁၂ဦးသေဆုံးပြီး ကပစ(၂၃)မှ ဒုအရာဗိုလ် ဝင်းမြင့်ထွန်းအပါ ၁၂ဦး ဖမ်းဆီးရမိခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊အမှတ်(၁) စစ်ဒေသက ဩဂုတ် ၁၆ရက်တွင် သတင်းထုတ်ပြန်ထားသည်။
