တောင်သာမြို့နယ် ရုံးပင်ကျေးရွာကို စစ်ကောင်စီ မီးရှို့ဖျက်ဆီး

အင်ကြင်း/People’s Spring

မန္တလေးတိုင်း၊ တောင်သာမြို့နယ်ရှိ ရုံးပင်ကျေးရွာအား စစ်ကောင်စီအဖွဲ့ဝင်များက မီးရှို့ဖျက်ဆီးခဲ့ကြောင်း သတင်းရရှိသည်။

ယမန်နေ့ (စက်တင်ဘာ ၆ရက်) နံနက် ၉နာရီခန့်က တောင်သာမြို့နယ်၊ ဇဂျမ်းနယ်မြေရဲစခန်းမှရဲများ၊ ထနောင်းကုန်းရွာမှပျူစောထီးများ ပါဝင်သောအဖွဲ့သည် ကား ၂စီးဖြင့် ရုံးပင်ကျေးရွာရောက်ရှိပြီး နေအိမ်များ မီးရှို့ဖျက်ဆီးသွားကြောင်း လူထုလှုပ်ရှားမှုကော်မတီ-တောင်သာက အသိပေးသည်။

Public Service Announcement

“ငါးအိမ်အရှို့ခံရတယ်။ သူတို့တိုက်ခိုက်ရတာ ဘာညာမရှိဘူးဗျ။ သက်သက်ကို မီးဝင်ရှို့သွားတာ။”ဟု တောင်သာမြို့နယ်ပြည်သူ့ကာကွယ်ရေးအဖွဲ့ တာဝန်ရှိသူက ပြောသည်။

စက်တင်ဘာ ၅ ရက်က တောင်သာမြို့နယ်၊ ပဒတ်စာကုန်းကျေးရွာရှိ ပျူစောထီးစခန်းအား တော်လှန်ရေးတပ်များက တိုက်ခိုက်ခဲ့သေးသည်။

“ပဒတ်စာကုန်းကို ဝင်တိုက်လို့ ပဒက်စာကုန်းနဲ့ တခြားရွာကပျူနဲ့ စခအချို့က ရုံးပင်ကိုလာပြန်မီးရှို့တာ”ဟု ဒေသခံတစ်ဦးက ပြောသည်။

သြဂုတ်၁ဝရက်က စတင်ခဲ့သည့် မြင်းခြံခရိုင် အထူးစစ်ဆင်ရေးတွင် တောင်သာမြို့နယ်၊ ဝဲလောင်ရွာဓာတ်အားခွဲရုံစခန်းတိုက်ခိုက်မှုအတွင်း စစ်ကောင်စီတပ် ထိခိုက်မှုရှိခဲ့သည်။

သြဂုတ် ၁၂ရက်တွင် တောင်သာမြို့နယ်ရှိ စစ်ကောင်စီစခန်း ၄ခုအား ထပ်မံတိုက်ခိုက်မှုတွင်ဓာတ်ငွေ့ပိုက်လိုင်းစခန်းနှင့်စွပ်ကျယ်စက်ရုံစခန်းမှ စစ်ကောင်စီတပ်သားများ စခန်းစွန့်ထွက်ပြေးသွားခဲ့သည်။ ထို့နောက် သြဂုတ်လလယ်အတွင်း နန်းမြင့်တောင်ဂိတ်၊ နတ်စောင့်ရွာဂိတ်များကိုပါ PDFများက ဆက်လက်သိမ်းပိုက်ထားသည်။

ပြည်သူ့ကာကွယ်ရေးပူးပေါင်းတပ်များ၏ တိုက်ခိုက်မှုကြောင့် တောင်သာမြို့၌ စစ်ကောင်စီ၏ အုပ်ချုပ်ရေးယန္တရားပျက်စီးသွားပြီး စစ်ကောင်စီလက်အောက်ခံ Non CDM ဝန်ထမ်းများ ထွက်ပြေးတိမ်းရှောင်နေသည်။