ဆိုင်းမင်း/People’s Spring
နာမည်ဆိုးနဲ့ ကျော်ကြားတဲ့ အင်းစိန်အကျဉ်းထောင်မှာ ဖြစ်ပွားခဲ့တဲ့ ထောင်တွင်း မုဒိမ်းမှုကိုအရေးမယူဘဲ ထောင်အာဏာပိုင်တွေက သတင်းဖုံးထားတဲ့လုပ်ရပ်ကို နိုင်ငံရေးအကျဉ်းသားဟောင်းတွေက ကန့်ကွက်ဆန္ဒပြလိုက်ကြပါတယ်။
အင်းစိန်ထောင်မှာ ပြီးခဲ့တဲ့ သြဂုတ်လ ၂၀ ရက်က ထောင်ဆေးရုံမှာ နိုင်ကျဉ်းလူငယ်တစ်ဦးကို အခြားအမှုနဲ့ထောင်ကျနေတဲ့ အခန်းကြီးကြပ်သူ အကျဉ်းသားက မုဒိမ်းကျင့်တဲ့ဖြစ်စဉ် ဖြစ်ခဲ့တာပါ။
Public Service Announcement
ဒီဖြစ်စဉ်ကို ထောင်အာဏာပိုင်တွေက သတင်းဖုံးထားတာကြောင့် ဒီလုပ်ရပ်ဟာ ကျုးလွန်သူကိုအကာအကွယ်ပေးနေတာလို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM) က ထောက်ပြပါတယ်။
ဒါကြောင့် ကျုးလွန်သူကို ရာဇဝတ်ကြောင်းအရရော ၊ အကျဉ်းထောင် ဥပဒေအရ ပါ အရေးယူရမယ်လို့ နိုင်ငံရေးအကျဉ်းသားဟောင်းတွေက မနေ့ စက်တင်ဘာလ ၉ ရက်က လှုပ်ရှားမှုပြုလုပ်ခဲ့ကြတာကို PPNM က ဖော်ပြလာပါတယ်။
“ထောင်တွင်း မုဒိမ်း ထိရောက်စွာ အရေးယူပေး ၊ထောင်ထဲက သူရဲကောင်းတွေကို ကာကွယ်ကြ ၊ နိုင်ငံရေးအကျဉ်းသားတွေဟာ လိင်အသုံးချခံတွေမဟုတ်” ဆိုတဲ့ စာသားတွေ နဲ့ ဆန္ဒပြတောင်းဆိုခဲ့ကြတာပါ။
စစ်ကောင်စီဘက်ကတော့ အင်းစိန်ထောင် ဖြစ်စဉ်နဲ့ပတ်သက်ပြီး တစုံတရာ ထုတ်ပြန်ရှင်းလင်းတာမျိုး မတွေ့ရပါဘူး။
PPNM ရဲ့ စက်တင်ဘာလ ၅ ရက် က သတင်းထုတ်ပြန်ချက်အရ မုဒိမ်းမှု ကျုးလွန်သူဟာ မုဒိမ်းမှု နဲ့ ထောင် ၁၀ နှစ်ကျနေသူ အကျဉ်းသားအခန်းလူကြီး ဇင်မျိုးကို ဖြစ်တယ်လို့ နာမည်နဲ့တကွ ဖော်ပြထားပါတယ်။
သူဟာ ထောင်အာဏာပိုင်တွေက အကျဉ်းသားအချင်းချင်းအုပ်ချုပ်ဖို့ ခန့်ထားသူဖြစ်ပြီးသူ့ရဲ့အထက်လူကြီး ဟာဆိုရင် အင်းစိန်ထောင်ပိုင် ရဲ့ တပည့်အရင်း ဖြစ်တယ်လို့ PPNM က ဆိုထားပါတယ်။
အကျဉ်းသားအချင်းချင်း အုပ်ချုပ်ဖို့ ရာဇဝတ်မှုနဲ့ နှစ်ရှည်ထောင်ကျ အကျဉ်းသားတွေကို ထောင်အာဏာပိုင်တွေက ခန့်ထားပြီး အဲဒီသူတွေကိုအသုံးပြုကာ နိုင်ကျဉ်းတွေကို ဖိနှိပ်တာ ၊ ငွေညှစ်တာ စတဲ့ လုပ်ရပ်တွေကို လုပ်ဆောင်နေကြတယ်လို့ အင်းစိန်ထောင်က လွတ်မြောက်လာတဲ့ နိုင်ကျဉ်းတွေ ထံကသိရပါတယ်။
