ဘုရားသုံးဆူ – သံဖြူဇရပ်လမ်းပိုင်းက လွတ်ရှမ်းရွာ စခန်းကို KNU သိမ်းယူ

နိုင်ပကောင်း/People’s Spring

ကရင်ပြည်နယ် ၊ ကြားအင်းဆိပ်ကြီးမြို့နယ် ၊ ဘုရားသုံးဆူ – သံဖြူဇရပ် ကားလမ်းပေါ်က စစ်ကောင်စီရဲ့ လွတ်ရှမ်း တပ်စခန်းကို ဒီနေ့ စက်တင်ဘာ ၁၂ ရက်မနက်ပိုင်းမှာ KNU တပ်မဟာ ၆ နဲ့ ပူးပေါင်းတပ်တွေ သိမ်းယူလိုက်ပြီလို့ ကရင်စစ်ရေးသတင်းရင်းမြစ်အချို့ထံကသိရပါတယ်။

ဒီနေ့မှာ သိမ်းယူလိုက်တဲ့စခန်းဟာ လွတ်ရှမ်းရွာတပ်စခန်းဖြစ်တယ်လို့ မြေပြင်မှာရှိတဲ့စစ်ရေး သတင်းရင်းမြစ်နှစ်ဦီးက အတည်ပြုပေးပါတယ်။

Public Service Announcement

လွတ်ရှမ်းရွာမှာရှိတဲ့ တပ်စခန်းကို ပြီးခဲ့တဲ့ သြဂုတ်လကစပြီး KNU တပ်မဟာ ၆ နဲ့ ပူးပေါင်းတပ်တွေ ပိတ်ဆို့ တိုက်ခိုက်ခဲ့ရာမှာ ဒီနေ့မှာတော့ အပြီးသတ် သိမ်းနိုင်ခဲ့တာလို့ သတင်းရင်းမြစ်ကပြောပါတယ်။

စခန်းကို သိမ်းပြီး နယ်မြေရှင်းလင်းမှုတွေ ဆက်တိုက်လုပ်ဆောင်နေတာကြောင့် သိမ်းဆည်းရမိတဲ့ လက်နက်ခဲယမ်းအခြေအနေကို အသိပေးသွားမယ်လို့ KNU သတင်းရင်းမြစ်က လည်း ဆိုပါတယ်။

ဘုရားသုံးဆူ – သံဖြူဇရပ် လမ်းပိုင်းကိုထိန်းချုပ်ထားတဲ့ စစ်ကောင်စီရဲ့ လွတ်ရှမ်းရွာနဲ့ အနန်းကွင်းရွာ တပ်စခန်းတွေကို KNU ပူးပေါင်းတပ်တွေက ပိတ်ဆို့တိုက်ခိုက်ရာမှာ လွတ်ရှမ်းရွာ စခန်းကို ကနဦး သိမ်းယူနိုင်ခဲ့တာပါ။

စစ်ကောင်စီကလည်း တပ်စခန်းတွေ လက်မလွှတ်ရဖို့ လက်နက်ကြီးပစ်ကူ ၊လေကြောင်းပစ်ကူတွေနဲ့ ခုခံတိုက်ခိုက်ခဲ့ပြီး အဲဒီရွာတွေတဝိုက်က ဒေသခံတွေလည်းတိုက်ပွဲတွေကြောင့် ထွက်ပြေးနေရပါတယ်။