ကနီတွင် စစ်ကောင်စီရေယာဥ်များ စုန်ဆင်းလာ၍ ပြည်သူ့ရေယာဥ်များ သွားလာခြင်းမပြုရန် ပအဖသတိပေး

ဇေအောင်/People’s Spring

စစ်ကိုင်းတိုင်း၊ ကနီမြို့နယ်တွင် ချင်းတွင်းမြစ်အတွင်း စစ်ကောင်စီရေယာဥ်များ စုန်ဆင်းလာ၍ ပြည်သူ့ရေယာဥ်များ သွားလာခြင်းမပြုရန် မြို့နယ်ပြည်သူ့အုပ်ချုပ်ရေးအဖွဲ့က သတိပေးသည်။

ယင်းမာပင်ခရိုင်၊ ကနီမြို့နယ်အတွင်း ချင်းတွင်းမြစ်ကြောင်းအတိုင်း အစုန်အဆန် သွားလာကြမည့် ရေယာဥ်များအားလုံး ယနေ့ (စက်တင်ဘာ ၁၆ ရက်) နံနက် ၆ နာရီမှစတင်ကာ သွားလာခြင်းကို ခွင့်မပြုတော့ကြောင်း ကနီမြို့နယ် ပြည်သူ့အုပ်ချုပ်ရေးအဖွဲ့က ကြေညာသည်။

Public Service Announcement

စစ်ကောင်စီရေယာဥ်များ ဖြတ်သန်းသွားတိုင်း မြစ်ကမ်းဘေးဝဲယာ ရမ်းသမ်းပစ်ခတ်လေ့ရှိပြီး ပြည်သူများထိခိုက်သေဆုံးမှုရှိကြောင်း၊ ထို့ကြောင့် စစ်တပ်ရေယာဥ်များ ကနီမြို့နယ်နှင့် လွတ်ကင်းသွားမှသာ ပြန်လည်ခွင့်ပြုမည် ဖြစ်ကြောင်း ကနီ ပအဖက ပြောသည်။

မော်လိုက်မြို့နယ်မှ ချင်းတွင်းမြစ်အတွင်း စုန်ဆင်းလာသည့် စစ်ကောင်စီ၏ မော်တော် ၉ စီး သည် ကလေးဝမြို့နယ်၊ ပလူဇဝရွာသို့ ရောက်ရှိနေကြောင်း၊ ကလေးဝနယ်မှ မင်းကင်းနှင့် ကနီမြို့နယ်သို့ ဖြတ်သန်းသွားမည်ဖြစ်ကြောင်း ကနီသားများ၏ ရင်တွင်းအသံက အသိပေးသည်။

စစ်ကောင်စီရေယာဥ်၏ ပစ်ခတ်မှုအပြင် တော်လှန်ရေးအဖွဲ့များ၏ ကြားဖြတ်တိုက်ခိုက်မှုကြောင့် ပြည်သူများထိခိုက်မှုမရှိစေရန် မြစ်ကြောင်းမှ (၃)မိုင်ခန့်အကွာအထိ ယာယီရွှေ့ပြောင်းနေထိုင်ပေးရန် ကနီပကဖ ကလည်း သတိပေးထားသည်။