ကချင်ပြည်နယ် ဖားကန့်မြို့ ဆိုင်းတောင်တွင် ယနေ့ စက်တင်ဘာ ၂၂ရက်တွင်တိုက်ပွဲ ဆက်လက်ပြင်းထန်နေကြောင်း စစ်ရေးသတင်းရင်းမြစ်က ပြောသည်။
ဆိုင်းတောင်တွင် စက်တင်ဘာ ၇ရက်မှစ၍ စစ်ကောင်စီတပ်များကို ကချင်လွတ်လပ်ရေးတပ်မတော်(KIA)နှင့်ပြည်သူ့ကာကွယ်ရေးတပ်(PDF) ပူးပေါင်းတပ်က တိုက်ခိုက်နေခြင်းဖြစ်ပြီး ၁၆ ရက်မြောက်အဖြစ် ယနေ့တိုက်ပွဲဆက်တိုက်ဖြစ်ပွားနေခြင်းဖြစ်သည်။
“ဖားကန့် ဆိုင်းတောင် တိုက်ပွဲ ပြင်းထန်နေဆဲဟုတ်တယ်။ ဒီနေ့ ၁၂နာရီခွဲမှာ လေယာဉ် ၂စီးနဲ့ဗုံးလာကြဲတယ်။ ဆိုင်းတောင်ရပ်ကွက်(၄)ဘက်က အရပ်သား ပြည်သူ အိမ်တချို့ ထိခိုက်တာရှိတယ်။ဆိုင်းတောင် ယူမာ ကျောက်စိမ်းရုံး ဘက်မှာ တိုက်ပွဲပြင်းထန်နေပြီး အဲဒီဘေးနားပတ်လည်ဗုံးကြဲသွားတာ” ဟု ကချင်သတင်းရင်းမြစ်က ပြောသည်။
Public Service Announcement
စစ်ကောင်စီတပ်က လေကြောင်း တိုက်ခိုက်ရာ၌ ဖျက်အားပြင်း ပေါင် ၅၀၀ ဗုံးများအသုံးပြု တိုက်ခိုက်နေသည်ဟု ယူဆကြောင်း စစ်ရေးသတင်းရင်းမြစ်တစ်ဦးက ပြောသည်။
KIA ပူးပေါင်းတပ်သည် စက်တင်ဘာ ၁၂ရက်တွင် ဆိုင်းတောင်ရဲစခန်းကို သိမ်းပိုက်ပြီးနောက် စစ်ကောင်စီကဆိုင်းတောင်ရှိပြည်သူလူထုနေအိမ်များ မီးရှို့ဖျက်ဆီးမှုများ ဆက်တိုက်ပြုလုပ်ခဲ့သည်။ထို့ပြင် လေကြောင်း၊ လက်နက်
ကြီး ပစ်ခတ်မှုများပြုလုပ်ခဲ့၍ ပြည်သူလူထုနေအိမ်များလည်း ပျက်စီးခဲ့ရာ စုစုပေါင်း အိမ်ခြေ ၂၀၀ ကျော်ပျက်စီးခဲ့ကြောင်း KIA သတင်းပြန်ကြားရေးဌာနက အသိပေးထားသည်။
စက်တင်ဘာ ၂၀ရက်တွင် KIA ပူးပေါင်းတပ်က ဖားကန့် တပ်မကုန်းကို လက်နက်ကြီးများဖြင့် ပစ်ခတ်တိုက်ခိုက်ခဲ့သေးသည်။ ဖားကန့်တွင် တပ်မကုန်းဟုခေါ်သည့် ဖားကန့် ဗျူဟာစခန်း အပါအဝင် စစ်ကောင်စီတပ်စခန်း ၆ခုသာ ကျန်နေပြီး အဆိုပါတပ်စခန်းများ မကျရေး စစ်ကောင်စီက လေကြောင်း ပစ်ကူပေးလျက်ရှိသည်။
ဖားကန့်မြို့နယ်အတွင်း တပ်စခန်းအများစုကို KIA ပူးပေါင်းတပ်က သိမ်းပိုက်ထားပြီးဖြစ်၍ မြေပြင်မှစစ်ကူပေးရန် စစ်ကောင်စီအတွက်အခက်အခဲဖြစ်နေရာ လေကြောင်း ပစ်ကူပေး တိုက်ခိုက်နေခြင်းဖြစ်သည်။
တိုက်ပွဲများပြင်းထန်နေသည့်အတွက် ဖားကန့်ဒေသခံအများစုမှား ဘေးလွတ်ရာသို့ ထွက်ပြေးတိမ်းရှောင်နေကြကြောင်းဒေသခံအချို့ကပြောသည်။
