ဟန်နွေ/People’s Spring
မသမာသူတချို့သည် ကိုးကန့်တပ်မတော် (MNDAA)တပ်ဖွဲ့ဝင်အဖြစ်ယောင်ဆောင်ပြီး ငွေညှစ်ငွေလိမ်ခြင်းများရှိနေကြောင်း MNDAAက သတိပေး ထုတ်ပြန်သည်။
မသမာသူတချို့သည် MNDAA တပ်ဖွဲ့ဝင်အဖြစ်လည်းကောင်း ၊ အထူးဒေသ(၁)ဘဏ္ဍာရေးဌာန သို့မဟုတ် အခြားသောဌာနအဖွဲ့ဝင်များအဖြစ်လည်းကောင်း အယောင်ဆောင်ပြီး မန္တလေး ၊ တောင်ကြီးနှင့် မူဆယ်စသည့် မြန်မာနိုင်ငံနေရာအနှံ့ရှိ ဆိုင်ဘာမူခင်း(ကျဖျင်)ကုမ္ဗဏီနှင့် စီးပွားရေးပိုင်ရှင်ထံ ငွေညှစ်ငွေလိမ်ခြင်း ၊ ရိက္ခာတောင်းခံခြင်း နှင့် ငွေကြေးကောက်ခံခြင်းများ ရှိနေသည့် အခြေအနေကြောင့် ယခုကဲ့သို့ သတိပေးချက်ထုတ်ပြန်ခဲ့ခြင်းဖြစ်သည်ဟု ဆိုသည်။
အထက်ဖော်ပြပါလုပ်ရပ်များသည် MNDAA၏ ဂုဏ်သိက္ခာကို ပြင်းပြင်းထန်ထန် ထိခိုက်စေသည့်အတွက်ကြောင့် မသမာသူများကို ဥပဒေနှင့်အညီ အချိန်အကန့်အသတ်မရှိ ပြင်းပြင်းထန်ထန်အရေးယူသွားပါမည်ဖြစ်ကြောင်း ထုတ်ပြန်သည်။
Public Service Announcement
မြန်မာနိုင်ငံ၏အခြေအနေမတည်ငြိမ်မှုကြောင့် မသမာသူများအား ပြစ်မှုကျူးလွန်သည့် အခွင့်အရေးများ ရရှိသွားစေကြောင်း၊ ထို့ကြောင့် ပြည်သူလူထုများအနေဖြင့် အသိတရားမြှင့်တင်ပြီး မလိုအပ်သည့်ဆုံးရှုံးမှုများ မဖြစ်စေရန်အတွက်ကြိုတင်ကာကွယ်ကြရန် မေတ္တာရပ်ခံကြောင်း ဖော်ပြထားသည်။
MNDAAတပ်ဖွဲ့သည် မြန်မာနိုင်ငံအမှန်တရားနှင့်တရားမျှတသော အမျိုးသားပါတီ (MNTJP) ၏ဦးဆောင်မှုအောက်ရှိ ပြည်သူ့ တပ်မတော်တရပ်ဖြစ်ပြီး ပြည်သူလူထု၏အသက်အိုးအိမ်စည်းစိမ်ကာကွယ်ပေးရေးကို အထူးအလေးထား ဆောင်ရွက်နေကြောင်း၊ ပြည်သူလူထုထံမှ ငွေညှစ်ငွေလိမ်သောလုပ်ရပ်များကို လုံးဝပြုလုပ်မည်မဟုတ်ကြောင်း ထုတ်ပြန်သည်။
အထူးဒေသ(၁)အုပ်ချုပ်ရေးကော်မတီအနေဖြင့် မန္တလေးတွင် အခွန်ကောက်ခံခြင်း နှင့် မန္တလေးဒေသကို ထိုးစစ်ဆင်တိုက်ခိုက်မည့် မူဝါဒများချမှတ်ထားခြင်းလုံးဝမရှိကြောင်း ထပ်လောင်း အသိပေးသည်။
ပြည်သူလူထုအနေဖြင့်လည်း ငွေညှစ်ငွေလိမ် ခြင်းနှင့်ပတ်သက်သောစာရွက်စာတမ်းများလက်ခံရရှိလာပါက အထူးဒေသ(၁) အုပ်ချုပ်ရေး ကော်မတီနှင့် MNDAAထံသို့ တက်ကြွစွာလာရောက်သတင်းပို့တိုင်ကြားရန် ဖိတ်ခေါ်ကြောင်း ဖော်ပြထားပြီး အတူတကွပူးပေါင်းပြီး မသမာသူများကို ဥပဒေနှင့်အညီ ဖမ်းဆီး အရေးယူသွားမည်ဖြစ်ကြောင်း ထုတ်ပြန်သည်။
