ရဲခေါင်/People’s Spring
ကရင်နီပြည်နယ်တွင် ရေဘေးကြောင့် လယ်ဧကတစ်သောင်းခန့် ပျက်စီးဆုံးရှုံးခဲ့ပြီး စားနပ်ရိက္ခာဖူလုံရေးအတွက် စိုးရိမ်ရသည့်အခြေအနေတွင်ရှိကြောင်း ကရင်နီပြည် ကြားကာလအုပ်ချုပ်ရေးကောင်စီ(IEC)အတွင်းရေးမှူး ဦးဗညားက လူထုနွေဦးသို့ ပြောသည်။
စက်တင်ဘာ ဒုတိယပတ်ကစ၍ မိုးအဆက်မပြတ်ရွာခြင်းနှင့် စစ်ကောင်စီက မိုးဗြဲရေကာတာဖောက်ချခြင်းတို့ကြောင့် ကရင်နီပြည်နယ်အတွင်း ရေကြီးရေလျံမှုများ ဖြစ်ပေါ်ခဲ့သည်ဟု ဆိုသည်။
“ အခြေခံအားဖြင့် အခု ရေနစ်ပျက်စီးသွားတဲ့ လယ်ဧကက တစ်သောင်းဝန်းကျင်လောက်ရှိတယ်။အထူးသဖြင့် မိုးစပါးစိုက်ပျိုးတဲ့ လွိုင်ကော်မြို့နယ်၊ဒီးမော့ဆိုမြို့နယ်ရယ် နန်းမယ်ခုံတစ်ကြောက တော်တော်လေးရေနစ်သွားတယ်။လက်ကျန်နွေစပါးနဲ့ အရင်နှစ်က စပါးတွေပေါင်းလိုက်ရင်တော့ နောက်နှစ်လစာပဲ ကျန်တော့တယ်” ဟု ဦးဗညားက ပြောသည်။
Public Service Announcement
စစ်ကောင်စီသည် ကရင်နီပြည်နယ်အတွင်းသို့ ပြည်မမှကုန်စည်စီးဆင်မှုကို ပိတ်ဆို့ထားကြောင်းလည်း ၎င်းက အသိပေးသည်။
“ စားနပ်ရိက္ခာနဲ့ပတ်သက်လို့က ကျွန်တော်တို့မှာ စိုးရိမ်ချက်တွေ အမြဲတမ်းရှိတယ်။ကျွန်တော်တို့ပြည်နယ်ထဲကိုလည်း ပြည်မဘက်က ဆန်စပါးဝင်လာမှုက မရှိသလောက်ဖြစ်သွား ပြီ” ဟု ဦးဗညားက ပြောသည်။
စစ်ကောင်စီ၏ ဖြတ်လေးဖြတ်စနစ်အပြင် လက်ရှိ ရေကြီး၊ရေလျှံမှုကာလတွင်ပင် စစ်ကြောင်းထိုးနေသည်မှာ ကရင်နီပြည်နယ်ရှိ ဆုံးရှုံးထားသော နယ်မြေများကို ပြန်လည်ရရှိရန် စစ်ကောင်စီက ကြိုးပမ်းနေကြောင်း ကရင်နီဒေသခံတစ်ဦးက ဆိုသည်။
“ တောင်ငူလမ်းဆိုပါတော့ ပြည်မဖက်ကနေ ဆန်တွေကို ကရင်နီထဲကို တင်လာလို့မရဘူး။စကစက ပိတ်ဆို့ထားတယ်။ဒါပေမဲ့ ကရင်နီထဲကနေ အဲဖက်ကို ဆန်တင်သွားရင် စကစကခွင့်ပြုတယ်။ဘာကြောင့်လဲဆိုတာ သဘောပေါက်ကြမှာပါ” ဟု ၎င်းက ပြောသည်။
ထို့ကြောင့် ကရင်နီပြည်နယ်အတွင်း ဆန်ရိက္ခာပြတ်တောက်မှုမရှိအောင် ကျန်နေသေးသည့် ဆန်စပါးများကို ထိန်းချုပ် သိုလှောင်ထားရန် ပြည်နယ်တာဝန်ရှိသူများ အနေဖြင့် ကြပ်မတ်ရန် လိုကြောင်းလည်း ၎င်းက တိုက်တွန်းသည်။
ကရင်နီပြည်နယ် ဖယ်ခုံ၊လွိုင်ကော်၊ဒီးမော့ဆို၊ရှားတော၊ဖားဆောင်း၊ဘောလခဲ နှင့် ဖရူဆိုမြို့နယ်တွင် ရေဘေးကြောင့် နေရပ်စွန့်ခွာနေရသူ ၂၁,၇၃၉ ဦးရှိ ကြောင်း ကရင်နီလူ့အခွင့်အရေးအဖွဲ့ က ထုတ်ပြန်ထားသည်။
ထို့အပြင် ရေဘေးနှင့်မြေပြိုမှုကြောင့် ဒီးမော့ဆိုမြို့နယ်တွင် သေဆုံးသူ ၁၈ ဦးရှိပြီး ဘောလခဲ၊ရှားတော၊လွိုင်ကော်၊ဖယ်ခုံမြို့နယ်၌ သေဆုံးသူ ၁၀ ဦးရှိသည်။
