လူအေး/People’s Spring
စစ်ကိုင်းတိုင်းဒီပဲယင်းမြို့နယ်ကိုယနေ့(အောက်တိုဘာလ ၅ရက်) ညနေပိုင်း၌ စစ်ကောင်စီက လေကြောင်းမှ ခြောက်ကြိမ် ဗုံးကြဲတိုက်ခိုက်ခဲ့ပြီး ဒေသခံများ လေကြောင်းအန္တရာယ် အထူးသတိထားနေထိုင်ကြရန်ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့(ပအဖ)က သတိပေးသည်။
စစ်ကောင်စီက ဂျက်ဖိုက်တာ၊ Mi 35 ရဟတ်ယာဥ်ဖြင့်အောက်တိုဘာ ၅ ရက်ညနေ ၂နာရီ ၂၇ မိနစ်မှ ၂နာရီ ၃၂မိနစ်ကြား၌ လေးကြိမ်၊ ညနေ ၆နာရီခန့်တွင် နှစ်ကြိမ် စုစုပေါင်း ၆ ကြိမ် တိုက်ခိုက်သွားသည်ဟု သိရသည်။
Public Service Announcement
ဒီပဲယင်းမြို့ကံပြား၊တောင်ပြင်၊အနောက်ကွက်သစ်၊တင်းတိန်ရန်ဘုရားကုန်းတို့ကို တိုက်ခိုက်ခြင်းဖြစ်ပြီး ညနေ ၆နာရီခန့်က တင်းတိန်ရန်ဘုရားကုန်းအနီးသို့ ပေါင် ၅၀၀ ဗုံးကြဲချတိုက်ခိုက်မှုတွင် ဒေသခံအမျိုးသမီးတစ်ဦးသေဆုံးကာ တစ်ဦးဒဏ်ရခဲ့ကြောင်း ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးကပြောသည်။
သေဆုံးသူမှာ ဒေါ်ဝင်းမာဆိုသူဖြစ်သည်။ စစ်ကောင်စီက ဒီပဲယင်းမြို့နယ်အား အကြောင်းမဲ့ လေကြောင်းတိုက်ခိုက်မှုများကို လူမဆန်စွာ ဆက်တိုက်ပြုလုပ်နေ၍ လေကြောင်းအန္တရာယ် အထူးသတိထားနေထိုင်ကြရန် ဒေသခံများအားဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ကသတိပေးထားသည်။
ဒီပဲယင်းမြို့ရှိ စစ်တပ်စခန်းနှင့် စစ်တပ်တပ်စွဲရာနေရာတို့ကို ပြည်သူ့ကာကွယ်ရေးပူးပေါင်းတပ်ဖွဲ့များက ဩဂုတ်လ၁၅ရက်ညနေမှ စတင်တိုက်ခိုက်ခဲ့ပြီး ဩဂုတ်လ ၁၈ ရက်၊ နံနက်တွင် သိမ်းပိုက်
နိုင်ခဲ့သည်။ ထို့နေ့တွင်ပင် စစ်ကောင်စီက လေကြောင်းမှအပြင်းအထန်တိုက်ခိုက်ပြီး စစ်ကူများပို့၍ ပြန်လည်ထိန်းချုပ်သွားခဲ့သည်။ ထိုနောက်ပိုင်းတိုက်ပွဲများဆက်လက်ပြင်းထန်ခဲ့ပြီး စစ်ကောင်စီသည် လေကြောင်းသုံး၍ အင်အားအများအပြားဖြည့်တင်းထားကြောင်းသတင်းရရှိသည်။
မြို့တွင်း၌ပြန်လည်တပ်ဆွဲထားသည့်စစ်ကောင်စီတပ်ဖွဲ့ဝင်များသည် နေအိမ်များ၊ ခြံဝန်းများအတွင်း ပြည်သူ့ကာကွယ်ရေးတပ်ဖွဲ့ဝင်များ ဝင်ရောက်နေရာယူမည်ကို စစ်ကြောင်းထိုး၍စစ်ဆေးခြင်း၊ မီးရှို့ဖျက်စီးခြင်းများပြုလုပ်ခဲ့သည်။
ဒီပဲယင်းမြို့ပေါ်ရှိ စစ်ကောင်စီတပ်များအထိုင်ချတပ်စွဲထားသော ကံပြားရွာ၊ ပုပ္ပါရုံဘုန်းကြီးကျောင်း၊ ဇွဲတိုက်၊ ရွှေဇာလီဘုရား၊ အ.ထ.က စာသင်ကျောင်းနှင့် ကုန်းသာဦးဘုရားဝင်းတို့အား ပြည်သူ့ကာကွယ်ရေးပူးပေါင်းတပ်ဖွဲ့များက စက်တင်ဘာလ (၁၇)ရက်တွင် တပြိုင်နက်တိုက်ခိုက်ခဲ့ သေးသည်။
အောက်တိုဘာ လဆန်းပိုင်းတွင် တိုက်ပွဲဖြစ်ပွားခြင်းမရှိဘဲ စစ်ကောင်စီကလေကြောင်းမှတိုက်ခိုက် နေခြင်းဖြစ်သည်။ ဒီပဲယင်းမြို့နှင့်တဆက်တည်းဖြစ်သောဘုတလင်မြို့တွင်စက်တင်ဘာလ ၃၀ ရက်နေ့က အင်အား ၈၅ ဦးပါ စစ် ကောင်စီစစ်ကြောင်းကို ပြည်သူ့ကာကွယ်ရေးတပ်ဖွဲ့များကတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃၃ ဦးသေဆုံးခဲ့ပြီး ဗိုလ်ကြီးနှစ်ဦး အပါအဝင် ၄၃ ဦးက်ို လက်နက်ခဲယမ်းများနှင့်အတူ အရှင်ဖမ်းမိထားသည်။
